Read Vaiphei 1 LENGTE 20 Bible Online

1 LENGTE 20 - Vaiphei bible

1 LENGTE 20

¹Aram gam ah Lengpa Ben-hadad in a sepaite a ko khawm ah; leng sawmthum leh ni tawh sakol leh kângtalai haw tawh ama lam in a pang ua. Samaria sim in a kuan tau a; a ûm ua, a la tau hi.

²Ziaphatchun, Israel gam ah Lengpa Ahab kiang in thangko a sawl ah, a kiang in zia gual hin a vagensak ah, “Ben-hadad in zia gual hin a gen hi:

³La dangka leh sana chu kei â ahi tai; la ji melhoi pente leh la chate chule kei â a hitau hi,” ti in.

⁴Israelte Lengpa chun a dawnhu a, “La gen gual ah chun, ka LALPA, aw lengpa, nang â ka hi’n, ka nei zosia hi tawh,” a tia.

⁵Thangkote chu a hung kit ua, a kiang in, “Ben-hadad in zia gual hin a gen hi: ‘La dangka leh sana tawh, la jite leh la chate ei hun pedok in,’ ti’n mi ka hun sawl ta hen,

⁶ahi’n la, jing leh tu’hun tuamvêl ah hin ka suakte la kiang ah hun sawl ing ka tin, amau chun la In leh la suakte In haw chu hung thek vêl intin uh, a dawi taphot uh chu kilâk in paw mang ding a hiu,” ti’n a hung gen tau a.

⁷Ziaphatchun, Israelte lengpa chun a gam sung ah upate zosia a ko khawm ah a kiang un, “Tu’hin vak ngaitua tiam u! Zia mipa hi buaina hawl a hi ti hi la hechiat tau a; ka jite, ka chate, ka dangka leh ka sana ei hun dotsak ah, ka la nial paw’ngâl a,” a tia.

⁸Upate zosia leh mipi zosia chun a kiang in, “Ngaisak kin la, buaipi kin,” a tiu a.

⁹Tichun, Ben-hadad kiang ah thangko ah hungte kiang ah chun, “Ka LALPA, lengpa kiang in zia gual hin vagen un: La suak kiang ah lei phût masak zosia kha bawl ing ka; himaleh, zia thil hi vang bawlthei pua’ng ka,” a tia. Thangkote chun a nusiau ah, thu a vatut kit tau a.

¹⁰Ben-hadad in a kiang in mi a sawl ah, “Ka nungzui mipite zosia hin, a khutdim chiat ua Samaria leivui a choi kham uh a tin ngei ngei leh, pathiante’n zia gual ah chun ka chung in bawl uh hen la, a nasa zaw’nle,” a tia.

¹¹Israelte lengpa chun a dawnhu a, “A kiang in zia gual hin vagen un: Gâlvan ah kithuam chun a kisûttha ta gual in ki-uangsak ki’hen,” a tia.

¹²Ben-hadad in zia thuthot a la het phat ah chun, (ama chu lengte chu tawh bûkcha sung ah uain a la dawn lai tak uh ahi’n,) a gâlhatte kiang in, “La panmun uh la chiat un!” a tia. Khawpi mai zawn ah chun a panmunteu a la chiat tau hi.

¹³Ziaphatchun, jawlnei pakhat Israelte Lengpa Ahab kiang in a hung to ah, a kiang in, “LALPA‘n zia gual hin a gen hi: Zia mi tam takte hi la mu em? En in, zia chu tu’ni hin la khut ah pia ding ka hi; kei hi LALPA chu ka hi ti hun he ta ding la hi,” a tia.

¹⁴Ahab in, “Kua bawl ding a hem?” a tia. Ama chun, “LALPA‘n zia gual hin a gen hi: Gambung tin ah hotute nasêm tangvalte chun bawl ding a hiu,” a tia. Tichun, ama chun, “Kua gâlmatawng ding a hem?” a tia. Ama chun a dawnhu a, “Nang in,” a tia.

¹⁵Tichun, gambung tin ah hotute nasêm tangvalte chu a chom khawm ah; za ni leh sawmthum leh ni a hiu a; amau nung in Israel gam ah mipi zosia a chom khawm ah, sangsagi a hiu hi.

¹⁶Sûnchang lai tak in a kuandok tau a; Ben-hadad in ama pankhawmpi leng sawmthum leh nite tawh uain a dawn kham lai tak uh ahi’n.

¹⁷Gambung tin ah hotute nasêm tangvalte chu a kuandok masau ah. Ben-hadad in gâldo ngal thei ding a koisa ahi’n; amau chun a kiang in, “Samaria khua kipat mi a hung pawtdok ui,” ti’n thu a tut ua.

¹⁸Ama chun, “Kichamna ding ah hung pawtdok a hiu leh a hing in man un la; kido ding ah hung pawtdok a hiu leh le, a hing in man un,” a tia.

¹⁹Himaleh, gambung tin ah hotute nasêm tangvalte leh a nung uh zui sepaite tawh,

²⁰mi tin in amau bituk chiat chu a that tau a; Aram mite chu a jam ua, Israelte’n a delzui tau ah; himaleh, Aram Lengpa Ben-hadad chu sakol in sepaite tawh a la suakcha tai.

²¹Israelte lengpa chu a pawt ah, sakolte leh kângtalaite chu a do ah, mi tam tak that in Aram mite chu a zo tai.

²²Ziaphatchun, jawlnei chun Israel lengpa a vanai ah, a kiang in, “Hung in, kisuhat inla, la thil bawl ding hi gun tak in ngaitua in; kumkihei phat leh, Aram Lengpa nang do ding ah hung kuan to ding ahi,” a tia.

²³Aram lengpa suakte chun a kiang in, “Amau pathiante chu mualchungte pathiante a hiu ah, ei uh sâng in a hatzaw tau hi; himaleh, phâicham in amau chu kidopi hi tiu; chutileh, amau sâng in hatzaw ngei ngei ding I hiu.

²⁴Chuleh, zia hi bawl in: lengte chu a panmun chiat ua kipat ladok in la, a thasâng un sepai hotute koi in;

²⁵chuleh, la sepai thitate gual kha sepai lakhawm kit in; sakol thasâng ah sakol, kângtalai thasâng ah kângtalai; chuleh, amau chu phâicham ah do hitiu in, amau sâng ah matheilo in hatzaw ding I hiu,” a tiu ah. A thugen uh chu a ngaisak ah a bawl ngâl tai.

²⁶Kum kihei bul in Ben-hadad chun Aram mite chu a ko khawm ah, Israelte do dingin Aphek ah a kuan to tau a.

²⁷Israel mite chu a kichom khawm ua, nêk dingte a puaksak zaw phat un, amau cho dingin a kuandok tau a; Aram mite chun gam chu a lua dim zing lai un, Israel chate chu a âng zawn un kêlcha tawmcha hon ni tawhbang in a vakikul tau hi.

²⁸Pathian mi pakhat Israelte lengpa kiang in a hung ah, “LALPA‘n zia gual hin a gen hi: Aram mite chun, ‘LALPA chu mualchungte pathian ahi’n, luiphâite pathian ahi puai,’ a tiu in; ziaziakchun, zia mi tam takte hi la khut ah hun pia’ng ka tin; tichun, LALPA ka hi ti hun he ta’n la a tii,” ti’n a gen a.

²⁹Kigâlchân in ni sagi a kikul tau ah. A ni sagi ni’ chun a kido pan tau hi; Israel mipite chun ni khat thu’n Aramte keng sepai nuai khat a that tau hi.

³⁰A dang cheng chu Aphek khawpi sung in a jam tau ah; a um nalai sâng sawmni leh sagite chu kulbâng chim in a del lum tai. Ben-hadad le a jam ah, khawpi sung ah kisêl dingin a tai lut tai.

³¹A suakte’n a kiang in, “En tiam in, Israel Inkuan ah lengte chu leng ja’ngai thei tak a hiu, ti ka la he khau in; ka kawng un saidip puan cheng in, ka luzang un khauhualte koi ing ka tiu in, Israel lengpa kiang in vachia ing kau; la hinna hun hawi piak mai thei a hiu,” a tiu a.

³²Tichun, a kawng ua saidip puan chêng in, a lujang ua khauhual lomte a koi ua, Israel Lengpa Ahab kiang in a chia tau ah; a kiang in, “La suak Ben-hadad in, ‘Lungsiat tak in ei hawi in,’ a tii,” a vatiu ah. Ama chun, “A dam nalai a hem? Ama chu ka suapipa ei vei,” a tia.

³³Tu’hin, pawsalte chun tepte’na thu a la ngaichâng zing ua; ama ah kipat chun kin tak in a mandok ngâl tau ah; a kiang in, “Ahi, Ben-hadad chu la suapipa ahi,” a tiu a. Ziaphatchun, ama chun, “Chiau inla vapui un,” a tia. Tichun, Ben-hadad chu a kiang in a hung a; kângtalai chung ah chun a kaldawsak a.

³⁴Ben-hadad in a kiang in, “Ka pa khan la pa ah kipat a lâkpiak khawpite kha hun pekit ing ka tin; chuleh, ka pa khan Samaria ah a la bawl gual in nang in Damaska khua hin kotzingte kibawl thei inla,” a tia. Israelte lengpa chun a dawnhu a, “Zia thute dungzui ah chun hun tha’suak ing ka,” a tia. Tichun, ama tawh kichamna thuthung a bawl ah, a chiasak tai.

³⁵LALPA‘n thu a pia, jawlnei honte lak ah kipat pakhat chun a dang pakhat kiang in, “Ei vua’n!” a tia. Himaleh, mipa chun a vaw nuam pua.

³⁶Ziaphatchun, a kiang in, “LALPA aw la zawp lo ziakin, lei nutsia phat leh sakeibaknei khat in hun that in a,” a tia. Ama chu a nutsia phatin sakeibaknei in a that tai.

³⁷Ziazaw chun, mi dang pakhat a mu a kiang in, “Ei vua’n!” a tia. Tichun, mipa chun a jep ah, liam hial in a jep tai.

³⁸Jawlnei chu a chiadok ah, a mit puanthem ah kituam in, a kisulamdang ah, lam gei ah Lengpa a la ngak tai.

³⁹Lengpa a hung phatin, Lengpa kiang in a kiko ah, “La suak hi gâl kido’na ka vavâk lut in; chun, sepai pakhat a hung kiheiah, pawsal khat ka kiang in a hun puiah, Zia mipa hi la veng in; ama la matsua leh a hinna thasâng ah la hinna piakdaw hi’ntin, ahiloleh, dangka shekel khat la liau ding ahi,” a hung ti’n.

⁴⁰La suak hi a la buai kâl in, ama chu a la mang tai, a tia. Israelte lengpa chun a kiang in, “Zia gual chun la chung thu ah thu tan hiding ahi; nangma ma’n la kisukpuk tai,” a tia.

⁴¹Ziaphatchun, kin tak in a mit tuamna puanthem chu a suttha tai. Jawlneite lak ah pakhat ahi ti Israelte lengpa chun a hun he tai.

⁴²Tichun, a kiang in, “LALPA‘n zia gual hin a gen hi: ‘Sukmangthai ding ah la latdawsa mipa chu la chia mang sak tâk ziakin, ama hinna thasâng ah la hinna hi’ntin, ama mipite thasâng ah la mipite hiding a hiu,’ a tii,” ti’n a gen tai.

⁴³Israelte lengpa chu lungawi lo tak leh ngui tak in In lam zuan in a chia ah, Samaria khua a hung tung tai.