Read Vaiphei 1 LENGTE 22 Bible Online

1 LENGTE 22 - Vaiphei bible

1 LENGTE 22

¹Aramte tawh Israelte chu kum thum sung kidona umlo in a um tau a.

²Himaleh a kum thumna chun Judai gam ah Lengpa Jehoshaphat chu Israelte lengpa kiang in a hung suk a.

³Israelte lengpa chun a suakte kiang in, “Ramoth-gilead hi ei uh â ahi; himaleh, zia chu Aramte lengpa khut ah kipat lakdaw gaw lo hial ziang I hiu ti he lo la hiu em?” ti’n a gen a.

⁴Jehoshaphat kiang ah chun, “Ramoth-gilead ah kidona’n lei zui diam?” a tia. Jehoshaphat in Israelte lengpa kiang ah chun, “Kei hi nang ti gual gual hiziang ka hi; ka mite chu la mite a hiu in, ka sakolte chule la sakolte a hiu hilam,” ti’n a dawnhu a.

⁵Himaleh, Jehoshaphat in Israelte lengpa kiang ah chun, “LALPA thu dong masa phot in,” a tia.

⁶Ziaphatchun, Israelte lengpa chun jawlneite zosia a ko khawm ah, za li vel a hiu ah; a kiang un, “Ramoth-gilead ah galdo dingin kuan to ding ka hem, ahiloleh, kuan da mai ding ka hem?” ti’n a gen a. Amau chun, “Kuan to in; zia chu LALPA‘n lengpa khut ah hun pia ding ahi,” a tiu a.

⁷Himaleh, Jehoshaphat in, “I dot thei ding un zia tak ah hin LALPA jawlnei dang um talo a hiu em?” a tia.

⁸Israelte lengpa chun Jehoshaphat kiang in, “LALPA kiang ah I dotsak thei ding un a dang pakhat a um nalai hi, Imlah chapa Mikaiah chu; himaleh, kei â dingin a pha lam hikha’ lo in, siatna bepcha a gen sek ziakin, ama chu ka hua ahi,” ti’n a dawnhu ah. Jehoshaphat chun, “Lengpa’n zia gual chun gen dâ in,” a tia.

⁹Ziaphatchun, Israelte lengpa chun hotu pakhat a ko ah, a kiang in, “Imlah chapa Mikaiah chu kin tak in hun pui un,” a tia.

¹⁰Zia hun ah chun Israelte lengpa tawh lengpa Jehoshaphat chu Samaria kotpi lutna bul ah, phualjang ah chun a puan ua kithuam in a lalchutpha chung un a kichuu a; chuleh, a ma-âng un jawlneite zosia’n thu a gen zing ui.

¹¹Kenaanah chapa Zedekiah in thik kî a kisiam ah, “LALPA‘n zia gual hin a gen hi: Aram mite chu zia kîte ah hin suksiat ahi masang siau siu in a tii,” ti’n a gen a.

¹²Jawlneite zosia chunle zia gual chiat ah chun a gen tau a, “Ramoth-gilead ah chia to inla, gal vazo in; LALPA chun lengpa khut ah peding ahi,” a tiu a.

¹³Mikaiah ko ding ah vakuan thupawpa chun a kiang in, “En in, jawlneite thugen haw chu kituak tak in lengpa â ding ah a phalam ngen ahi; la thu chule a lak ua pakhat gual hihen la, a phalam in gen in,” a tia.

¹⁴Himaleh, Mikaiah chun, “LALPA min suang in, LALPA‘n ka kiang ah a gen taphot chu, zia bep chu gen ding ka hi,” a tia.

¹⁵Lengpa kiang a hung tun phatin, lengpa chun a kiang in, “Mikaiah, Ramoth-gilead do ding ah kuan ding ka hiu em, kuan lo ding?” a tia. Ama chun, “Chia to inla, vazo in; LALPA chun lengpa khut ah pia ding ahi,” ti’n a dawnhu a.

¹⁶Himaleh, lengpa chun a kiang in, “LALPA min ah thutak lo ngal bangmacha gen lo ding ah bang zat vei hun kihaksialsak ding ka hem?” a tia.

¹⁷Ziaphatchun, Mikaiah in, “Israelte zosia chu tâng chungte ah belam a ching ding nei lo gual ah taijak in ka mu’n; chuleh, LALPA‘n, ‘Ziate hi hotu bei a hiu hi; mi tin thamuang tak in a In lam chiat un chiasak un,’ a tii,” ti’n a dawnhu a.

¹⁸Israelte lengpa chun Jehoshaphat kiang in, “Kei chung thu ah thil a phalam bangma gen pua’n ah, ka tisa hilo a hem?” a tia.

¹⁹Ziaphatchun, Mikaiah in, “Ziaziakchun, LALPA thu a la ngai in: LALPA chu a lalchutpha chung ah kichu’n ka mu’n, a kiang in van sepai zosia chu a vei leh chang in a ding un.

²⁰LALPA chun, ‘Ahab chu Ramoth-gilead ah a chia to ah a va kipûk theina dingin kua’n vazawl pûk ding a hem?’ a tia. Mi pakhat in thu khat a gen ah, mi dang khat inle thu dang khat a gen kit a;

²¹zia lai tak ah chun thagau pakhat a hung kipan ah, LALPA âng in a hung ding ah, ‘Ken vazawl puk ing ka,’ a tia.

²²LALPA chun, ‘Bangti’n la zawl pûk diam?’ ti’n a dong ah. Ama chun, ‘Chiadok ing ka tin, a jawlneite zosia kam ah thagau lepchia vahi’ng ka,’ ti’n a dawnhu a. LALPA chun, ‘Vazawl pûk in la tin, lawting ngei ding la hi; chia inla vabawl in,’ a tia.

²³Tichun, ngai in, LALPA‘n zia la jawlneite zosia kam ah hin thagau lepchia a koi tai; LALPA‘n la chungah thil phalo tung dingin a supûk tai,” a tia.

²⁴Ziaphatchun, Kenaanah chapa Zedekiah chu Mikaiah kiang in a hung to ah, a biang a bet piak ah, a kiang in, “LALPA thagau chun kei ah kipat chiadok in nang kiangah thugen dingin khoilam a haw em?” a tia.

²⁵Mikaiah chun a dawnhu a, “Pindan sungnung khat ah kisêl ding ah la lut phat leh hun he ta’n la,” a tia.

²⁶Ziazaw chun, Israelte lengpa chun thu a hun pia, “Mikaiah chu pui unla, khawpi ukpa Amon leh lengpa chapa Joash kiang in va umsak kit unla,

²⁷zia gual hin vagen un, ‘Lengpa’n zia gual hin a gen hi: Ziapa hi suangkul in khum unla, thamuang takah ka hung vaikit masangsia vaithum leh tui tawmcha bep a la pesek un,’ ti’n,” a tia.

²⁸Mikaiah in, “Nang thamuang tak ah la hung kile’kit chun, LALPA‘n ka kiang ah thu gen lo himai ding ahi,” a tia. Chuleh, “Nanghaw mipite haw, la leng un ngaithau in!” a ti tai.

²⁹Tichun, Israelte lengpa leh Judai gam ah Lengpa Jehoshaphat chu Ramoth-gilead ah a chia to tau a.

³⁰Israelte lengpa chun Jehoshaphat kiang in, “Kei kisiam danglam ing ka tin kidona’n lut ing ka; nang in vang la lal puan sil in,” a tia. Tichun, Israelte lengpa chu a kisiam danglam ah, kidona’n a lut tai.

³¹Ziaphatchun, Aramte lengpa chun a kângtalai hotu sawmthum leh nite kiang in, “Israelte lengpa tilo ngal a lian hi’n a neu hileu kidopi kiu in,” ti’n thu a la piaksa ahi’n.

³²Kângtalai hotute chun Jehoshaphat a mu phât un, “Zia hi Israelte lengpa hita ngei ngei in a,” a tiu a. Tichun, ama lam nga’n a do dingin a kihei tau a; tichun, Jehoshaphat a hung kikodok tai.

³³Kângtalai hotute chun Israelte lengpa ahi puai ti a het phat un, delzom talo in a hung kinunghei kit tau a.

³⁴Himaleh, mi pakhat in a thalpi chu a luai ah, tup chuam nei lo ah a kâp leh, Israelte lengpa chu a phawpi tawh a awmphaw kikâl in a kâp kha ta’n; tichun a kângtalai pu kiang in, “Kihei kual inla kido’na kipat ei puidok in, ka liam tai,” a tia.

³⁵Zia ni kido’na chu a huaisia ma ma ah, lengpa chu Aram mite lam ngatsak in, nitâk lam ah a thi tiang in kângtalai chung in a tudet zing tau hi. A liamna be’ kipat in a thisan chu kângtalai tawdâp tiang a la luang lut tai.

³⁶Ziazaw, nisa tum ding kuan vêl in sepaite lak ah, “Mi tin ama khawpi chiat leh a gam lam chiat del un!” ti’n a kiko pek tau hi.

³⁷Tichun, lengpa chu a thi ta’n, Samaria khua’n a paw lut tau a; lengpa chu Samaria khua chun a vui tau hi.

³⁸Kângtalai chu Samaria tuikul gei in a sawp ua; LALPA‘n thu a la gen dungzui in, a thisan chu uichate’n a liak ua, nawchizuakte le zia tuiah chun a kisil sek ui.

³⁹Tu’hin, Ahab nasep dangte leh a thilbawl zosia, a saiha Insak leh a khawpi siamte zosia, ziate chu Israel lengte khangthu a kizik hilo a hem?

⁴⁰Ahab chu a pu leh pate kiang in a ipmu ta’n; a chapa Ahaziah in a tha a sâng tai.

⁴¹Israelte lengpa Ahab lal kum li’na’n Asa chapa, Jehoshaphat chu Judai gam chung in a lal pan tai.

⁴²Jehoshaphat chu kum sawmthum leh nga’ upa ahi in a lal panah; Jerusalem ah kum sawmni leh nga a la hi. A nu chu Shilhi chanu Azubah ahi.

⁴³A pa Asa lampi zosia a haw ah; zia chu pêtsan lo in, LALPA mit mu ah thilpha a bawl hi; ahi’n la, thoimualte chu lakdaw ahi pua, mipite chun thoimualte ah chun gimtui lân in a kithawi zing nalai ui.

⁴⁴Jehoshaphat in Israelte lengpa tawh kichamna le a bawl hi.

⁴⁵Tu’hin, Jehoshaphat nasep dangte leh a thilhitheina a taklatte leh, a galdo dante haw zosia chu Judai gam ah lengte khangthu kizik hilo a hem?

⁴⁶Asa hun lai ah um nalai, gam sung ah tempul ah pawsal nawchizuak um nalaite chu ama’n a nawdok sik sek hi.

⁴⁷Edom ah leng a um pua’n; a thasângpa chun leng hi’na a chang mai hi.

⁴⁸Jehoshaphat in Ophir ah chia ah sana vapua dingin Tarshish longlian chi gual a bawl a; himaleh, long liante chu Ezion-geber ah a siat tak ziak un a chia ta puau hi.

⁴⁹Ahab chapa Ahaziah in Jehoshaphat kiang in, “Ka suakte hi la suakte tawh long liante chu zuisak in,” a tia; ahi’n la, Jehoshaphat a nuam puai.

⁵⁰Jehoshaphat chu a pu leh pate kiang in a ipmu tai. Chuleh, a pu leh pate kiang in a pa David khawpi ah a vui tau hi; a chapa Jehoram in a lalna a lua tai.

⁵¹Ahab chapa Ahaziah chu, Judai gam ah Lengpa Jehoshaphat lal kum sawm leh sagi’na chun, Israelte chung in a lal pan a; Israelte chung in kum ni a lal hi.

⁵²LALPA mit mu ah thil phalo a bawl ah; a pa leh nu lampi a zuiah, Israelte gitlosak leh, Nebat chapa Jeroboam lampi chule a zui hi.

⁵³Baal na sêm in a ho tai; a pa khan a la bawl gual in, LALPA, Israelte Pathian chu a sulungna tai.