Read Vaiphei 1 LENGTE 9 Bible Online

1 LENGTE 9 - Vaiphei bible

1 LENGTE 9

¹Solomon in LALPA In leh lal In tawh, Solomon in a saknop zosia a zawthian phatin,

²Gibeon ah a kiang ah a kilâk gual in, Solomon kiang ah a niveina dingin LALPA a hung kilâk kit a.

³LALPA‘n a kiang in, “Ka kiang ah la pauchapna leh la dotna chu ka ngaitha tai; zia la In sak hi ka suthiang ta’n; zia tak ah chun kumtuang dai dingin ka min ka koi tai; zia tak ah chun ka mitte leh ka lungthim bangtik lai ah le um zing ding ahi.

⁴Nangma la hileh, la pa David ka mit mu ah lungthim diktatna leh phatna ah a la um gual ah la um ah, ka thupiakte zosia dungzui ah la bawl ah, ka thugelte leh ka dan bawlte zosia la vop zing ahi chun,

⁵la pa David kiang ah ka la thutep, ‘Israel lalchutpha ah kichu ding la nung ah mi tasam pua’n la,’ ka ti gual in, Israel chung ah la lalna lalchutpha kumtuang dai dingin phudet ding ka hi,” a tia.

⁶Nang hi’n, la chate hi taleu, ei zui zing lo ah la pêtmang ua, la ma-âng ua ka koi, ka thupiakte leh ka thugelte la vop lo ua, pathian dangte kiang ah chia ah la ho ua leh vang,

⁷zia tak chuleh, amau â ding ah ka piakna gam, Israelte lâkpiak ing ka tin; chuleh, ka min ding ah ka sukthian In chu ka mit mu ah kipat koimang ing ka tin; Israelte chu midangte zosia lak ah paukikna leh nuizatbûk hung hita’n au.

⁸Zia In hi In chimsa hung hita’n tin; a hung haw kha taphot in maksa’n, a guk in nui sul sul intin uh: “Bangtidan ah LALPA‘n zia gam leh zia In hi hiti bawl ziang a hem?” ti’n au.

⁹Ziaphat chuleh amau in, “Aigupta gam ah kipat a pu leh pateu puidok, a LALPA leh Pathian uh a nusiau ah, pathian dangte zui ah, ho in, a nau a sep piak tâk ziak un ahi; LALPA‘n zia gual ah siatna hi a chung un a tunsak ahi tai, ti’n au,” a tia.

¹⁰Solomon in In panite, LALPA In leh lengpa In a sak sung kum sawmni zaw in,

¹¹Tura ah Lengpa Hiram in sidar leh châk thingtumte leh sana, Solomon in a dawi zat zat a la piak zaw phatin, Lengpa Solomon in Galili gam ah khawpite sawmni Hiram a pia tai.

¹²Himaleh, Hiram in Tura ah kipat Solomon in a piak khawpite entha ding ah a hung phatin, ziate chun a sulungawi ta puai.

¹³Ziaziakchun ama’n, “Ka unaupa, bang tawhbang khawpite ahi tau em lei piak hi?” a tia. Tichun, ziate chu tu’ni tiang in Kabul gam a ti tau hi.

¹⁴Himaleh, Hiram in lengpa kiang in sana talent za leh sawmni a la thot zo tai.

¹⁵Lengpa Solomon in nasêm ah mi a gawite chanchin chu zia gual hi ahi: LALPA In leh ama In, Millo chuleh Jerusalem, Hazor, Megiddo, Gezer kulbângte sakna ding,

¹⁶(Aigupta Lengpa Pharaoh a kuan to ah, Gezer a la’n, a hâltum ah, a khawpi sung ah chêng Kanaan mite chu that gam in, a chanu, Solomon ji chu a la kensaksa a hia;

¹⁷tichun, Solomon in Gezer a siamthak hi,) Beth-horon nuainung,

¹⁸Baalath, gamthip ah um, gam sung in a huap Tamar,

¹⁹zia haw chu tawh, Solomon thil koikhawmna khawpite, a kângtalaite koikhawmna ding khawpite, a sakol sepaite â ding ah khawpite leh Solomon in Jerusalem ah, Lebanon leh a thunuai ah um gam zosia ah a sak nop taphot sakna ding ah mat a hiu hi.

²⁰Israel mi hilo, Amor mite, Hit mite, Periz mite, Hiv mite, Jebus mite a um nalai sunte leh,

²¹gam ah um nalai, a suan leh pâkteu, Israelte’n a suksiat chimit theilo uh, ziate haw chu Solomon in nasêm ah a gawi ding ah a matte chu a hiu ah; tu’ni tiang in zia gual chu a hizing tau hi.

²²Himaleh, Israel chate lak ah mi vang Solomon in suak in a mang puai; amau haw chu sepaite a hiu ah, a miliante, a sepai hotu liante a sepai hotute leh a sakol kângtalai lam leh sakol chungchuang sepaite lamah hotute a hiu hi.

²³Solomon nasepna chung ah hotute chu: nasêm mite chung ah vaipua mi za nga leh sawmngate chu a hiu hi.

²⁴Himaleh, Pharaoh chanu chu David khawpi kipat in ama In ding ah Solomon in a sak piakna lam in a chia to ta’n; chun, ama’n Millo chu a sa tai.

²⁵Solomon in, LALPA âng in gimtuite a hâl ah; LALPA â ding ah mâichâm a siam ah chun, hâlmang thilpiakte leh chamna kithoinate kum khat in thumvei a lân sek ah. Tichun, In chu a sa zo tai.

²⁶Lengpa Solomon in, Edom gam, Tuipi San gei ah um Eloth kiang Ezion-geber ah chun long hon khat a siam a.

²⁷Hiram in a suakte, long chung ah sêm, tuipi chung ah khawsa ngaite chu Solomon suakte tawh long honte a zuisak a.

²⁸Ophir ah a vachiau ah, zia kipat chun sana talent za li leh sawmni a hun paw lut ua, zia chu Lengpa Solomon a pia tau hi.