Read Vaiphei 2 LENGTE 12 Bible Online

2 LENGTE 12 - Vaiphei bible

2 LENGTE 12

¹Jehu kum sagi’na chun Jehoash in vai a hun hawm pan ah; Jerusalem ah kum sawmli vai a hawm hi. A nu chu Beer-sheba mi Zibiah ahi.

²Thiampu Jehoiada in a hilna zal in Jehoash chun a dam sung sia’n LALPA mit mu ah thilpha chu a bawl hi.

³Himaleh, thoimualte chu phiatnâm a hipua’n; mipite chun thoimualte ah chun kithoina leh thillatte a bawl zing nalai ui.

⁴Jehoash in thiampute kiang ah chun, “Dangka LALPA In ah kipia a kilânsa, mi pakhat chiat leh mi tin thasâng ah, kiphalna dungjui ah LALPA In ah hun kichawi chu tawh,

⁵thiampute’n a petute ah kipat la unla; In siamphat ding ah a poimawna kimute taphot chu siamphat hi hen,” a tia.

⁶Himaleh, Lengpa Jehoash kum sawmni leh thumna tiang inle thiampute’n In chu bangma a siampha nai puau hi.

⁷Ziaziakchun, Lengpa Jehoash in thiampu Jehoiada chu thiampu dangte haw tawh a ko lut ah, a kiang un, “Bangziak ah, In chu siamphalo la hiu em? Ziaziakchun, dangka hun pete ah kipat la ta kiu in, In siamphatna dingin pedok zaw tau in,” a tia.

⁸Tichun thiampute chun mipite ah kipat dangka lak belap talo ding leh In chule siampha diak talo dingin a kithutuak tau hi.

⁹Ziaphatchun, thiampu Jehoiada chun thik kuang pakhat a hun la, a sitna chu a vitvang ah, zia chu mâichâm kiang ah, LALPA In ah lutna changlam zawn in a tung ah; LALPA In ah dangka hung kichawi zosia chu zia chun a thun lut ta’n.

¹⁰Thik thingkuang sung ah chun dangka tam tak a um tai ti a hun het phat un, lengpa lekhaziktu leh thiampu lian chu a chia to ua, LALPA In ah dangka kimu chu a sim ua, dip in a thun zel tau hi.

¹¹Dangka a kisim sate chu LALPA In enkol nasêmtute khut in a pedok sek un; ziaphat chuleh, amau in LALPA In bawl ah pang thingbawl thiamte leh Insamite kiang in a pezel sek ui,

¹²suang châlmatte leh suang khenpheltute chu tawh, chuleh LALPA In siamphatna ding ah thingtumte leh suang kisêksate chawkna dingle a hi’n, In siamphatna ding ah kiseng ding cheng chu tawh le ahi.

¹³Himaleh, LALPA In ah hung kichawi lut dangkate ah kipat in, LALPA In â ding dangka kuangdalte, noliante, belbute, pengkulte ahiloleh, ûm leh bêl sana a hem dangka a hem him him ah bawl ahi puai,

¹⁴Zia chu mangcha’ LALPA In bawlphatna nasêmtute kiang ah zia chu kipia ahi zawi.

¹⁵Nasemte kiang ah piak dingah a lakdaw sau dangka chu, amau in ginum tak ah a mat sek ziak un, a matdan uh hilchian dingin a phût ngai puau hi.

¹⁶Sukkhialna thillatte ah kipat leh, gitlo thillatna dangka haw chu Thiampute â ding ahiziak in, LALPA In ah a chawi lut ngai puau hi.

¹⁷Zia hun lai ah chun Aram ah Lengpa Hazael chu a kuan toah, Gath a vado ah a la ta’n. Himaleh, Hazael in Jerusalem do dingah chia to gua a hung kihei phatin,

¹⁸Judai gam ah Lengpa Jehoash chun Judah lengte, a suanpa Jehoshaphatte, Jehoram leh Ahaziah in a go lak ua kipat thilpiak a latdawsateu leh, ama go ah kipat a thilpiakte, LALPA In leh lengpa In ah go koikhawmte, sana leh dangka zosia chu a la, ziate chu Aram Lengpa Hazael kiang in a thot tai. Ziaphatchun, Hazael in Jerusalem chu a do ta puai.

¹⁹Judah lengte khangthu ah a kizik ta hilo a hem?

²⁰A suakte chu a hung kipan ua, a gûk ah vaisawm in, Silla zot sukna lampi kiang ah Milo In ah chun Joash a that tau hi.

²¹Ama chu a suakte, Shimmeath chapa Jozakar tawh Shomer chapa Jehozabad in a la khen pâi ua, a thi den tai. Ama chu David khawpi ah a pu leh pate thân in a vui tau hi; chun, a chapa Amaziah in a tha a hun sâng tai.