Read Vaiphei 2 LENGTE 13 Bible Online

2 LENGTE 13 - Vaiphei bible

2 LENGTE 13

¹Judai gam ah Ahaziah chapa, Lengpa Joash kum sawmni leh thum leng a hi’lai in. Jehu chapa Jehoahaz chu Samaria ah Israelte leng in a hung pang pan hi; ama chun kum sawm leh sagi vai a hawm hi.

²Ama chun LALPA mit mu ah thil phalo chu a bawl ta’n, Nebat chapa Jeroboam gitlonate, Israel gitlona lampi chu a zui ah; a kiheisan puai.

³LALPA chu Israelte chung in a lungna ta’n, a vêl vêl in Aram ah Lengpa Hazael khutah leh, a chapa Ben-hadad khut in, a pelut tai.

⁴Himaleh, Jehoahaz chu LALPA kiang in a pauchap ah, LALPA‘n a ngaitha; Israelte nuaisia ah a umdan uh leh, Aram lengpa nuaisiaah a umdan zosiau chu a mu tai.

⁵Ziaziakchun, LALPA chun Israel hukhing ding pakhat a pia ta’n, tichun, Aram mite khut ah kipat a suakcha tau ah; chun, Israel mite chu a masang lam gual ah khan a In un a chêng tau hi.

⁶Himaleh, Jeroboam Inkuan gitlonate, Israelte gitlona lampi chu a nusia diak puau ah, ziate chu a zui zaw tau in; dawikhuam chule Samari ah a um zing hi.

⁷Tichun, Jehoahaz in sepai lakah sakol chungchuang mi sawmnga, kângtalai sawmkhat, leh keng sepai sîng khatte bep lo’ngal gâldo mi a nei ta pua’n; Aram lengpa’n a suchimit ah, leivui gual mai in a koi tai.

⁸Chutichun, Jehoahaz nasep dang zosiate, a thil hi zosia tawh, a hatdan tawh, ziate zosia chu Israel lengte khangthu ah a kizik ta hilo a hem?

⁹Tichun Jehoahaz chu a pu leh pate kiang in a ipmu ta’n, Samaria ah a vui tau hi; chun a chapa Joash chu a thasâng in a hung pang tai.

¹⁰Judah ah Lengpa Joash kum sawmthum leh sagi’na’n Jehoahaz chapa Jehoash chu Samaria ah Israelte chung in vai a hawm panah; kum sawm leh guk vai a hawm hi.

¹¹Ama’nle LALPA mit muah thil phalo chu a bawl ta’n; Nebat chapa Jeroboam gitlonate, Israel a gitlona lampi chu a nusia pua’n, ziate chu a zui zaw tai.

¹²Tichun, Joash nasep dangte zosia, a thil hi zosia tawh, Jodah ah Lengpa Amaziah, hat tak ah a do dan tawh, ziate chu Israel Lengte Khangthu a kizik ta hilo a hem?

¹³Tichun, Joash chu a pu leh pate kiang in a ipmu ta’n; a lalchutpha chu Jeroboam in a lua tai; Joash chu Samaria ah Israel lengte thân in a vui tau hi.

¹⁴Israel Lengpa Joash chu a kiang in a vachia ah, a ma-âng in a va kap ta’n, “He pa, he pa! Israel kângtalaite tawh a sakol chungah chuangte chu!” ti’n a kiko a.

¹⁵Elisha chun a kiang in, “Thal pakhat tawh a changte hun chawi in,” a tia, tichun thal pakhat tawh a changte a hun la ta’n.

¹⁶Ziaphatchun, Israel lengpa kiang ah chun, “Thal chu luai in,” a tia; ama’nle a luai tai. Elisha chun a khut chu lengpa khut chung in a vak nga’n,

¹⁷“Tukvan sualam kâi saw hong in,” a tia; ama’nle a hong a. Elisha chun, “Kâp in,” a tia; ama’nle a kâp tai. Ziaphat ah chun, “LALPA galzawna thalchang, Aram chung ah galzawna thalchang! Aram mite chu la sukbei masang sia Aphek ah do ding la hi,” a tia.

¹⁸Ama chun a gen zawm pek ah, “Thalchangte chu chawi in,” a tia; ama’nle a chawi ta’n. Israel lengpa kiangah chun, “Ziate chun lei tual chu khen in,” a tia; ama’nle thumvei a khenah, a chawl tai.

¹⁹Ziaphatchun, Pathian mi chu a chung in a lungna ta’n, “Ngavei a hem gukvei a hem bêk la khet ding hive’n; chutileh Aram mite chu la sukbei tiang un nuaisia ding la hia; ahi’n tu’hin Aram chu thumvei bep nuaisia ding la hi tai,” a tia.

²⁰Tichun, Elisha chu a thi ta’n, a vui tau hi. Tichun, Moab mite chun a hon hon in kum kihei si’n leh gam chu a hun bulu sek ua.

²¹Mi pakhat a vui ding kuan tak ua chun, mi bulu hon khat a mu tau ah, mithi chu Elisha thânkhûk sung in a sep lut ziang tau a; zia mithi luang chun Elisha gute chu a sukkhak phatin, a hung hing ta’n, a keng in a hung dingdok tai.

²²Tichun, Aram ah Lengpa Hazael chun Jehoahaz dam sung sia’n Israel a nuaisia zing a.

²³Himaleh, LALPA chu a chung un a hung ja’ngai ah, amau a lainat ta’n; Abraham, Isak leh Jakob kiangah a thuthung ziakin amau lam a nga tai, amau chu hi chimit lo in, tu’tiang in a mau chu a umpi’na ah kipat a naw mang nai diak puai.

²⁴Aram ah Lengpa Hazael a thi phatin, a chapa Ben-hadad a thasâng in a hung pang tai.

²⁵Ziaphatchun, Jehoahaz chapa Jehoash chun Hazael chapa Ben-hadad ah kipat in a pa Jehoahaz hunah kido’na a laksa khawpite chu a hun la kit ta’n. Joash in ama chu thumvei a zo ah, Israel khawpite chu a la kit tai.