Read Vaiphei 2 LENGTE 15 Bible Online

2 LENGTE 15 - Vaiphei bible

2 LENGTE 15

¹Israel Lengpa Jeroboam chu kum sawmni leh ni leng ahi kum in, Judah Lengpa Amaziah chapa Azariah chun Judai gam in vaihawm in a hung pang hi.

²A vaihawm limah chun ama chu kum sawm leh guk ah upa bep ahi nalai ah. Ahi’n, Jerusalem ah chun kum sawmnga leh ni sung vai a hawmah, a nu chu Jekoliah, Jerusalem ah um mi ahi.

³A pa Amaziah thil hi’dan a enton ah, LALPA mit muah chun thilpha tak ngen a bawl hi.

⁴Himaleh, thoimualte chu a susia diak pua’n, mipite chun kithoina leh gimtui hâl dingte chu thoimual in a bawl thei zing ui.

⁵Zia hun lai ah chun, LALPA‘n lengpa chu a hun gawt ah, a thi tiang in a phâk zing ah, a chuam in a umsak ui. Ziaphatchun, lengpa chapa Jotham chu a gam pumpi leh a Inkuante zosia chung ah vaihawm in a pang tai.

⁶Ahi’n, Azariah nasep dangte haw zosia chu Judah Lengte Chanchin zikna Lekhabu a kizik ta hilo a hem?

⁷Tichun Azariah chu a pu leh pate kiangah chun a ipmu ta’n, David khawpi ah a pu leh pate thân in a vui tau ah, chun, a chapa Jotham chun ama thasâng in vaihawm in a hung pang tai.

⁸Judai gam ah Lengpa Azariah chu kum sawmthum leh giat leng ahi kum in, Jeroboam chapa Zekariah chun Israelte chung ah Samaria in tha guk sung vai a hawm hi.

⁹Ahi’n, a pa gual in LALPA mit mu ah thil phalo tak a hun bawlah, Israel gitlona lampi zui sek Nebat chapa Jeroboam gitlona chu a kiheisan nuam diak puai.

¹⁰Chun, Jabesh chapa Shallum chun ama do ding a hun gua, mipi ma-ângah chun a kidelpi ah a hun that tai, ziaphatchun, ama chu a thasâng ah leng in a hung pang tai.

¹¹Ahi’n, Zakariah nasep dangte chu, ngai tia, Israel Lengte Chanchin Lekhabu a kizik ta hilo a hem?

¹²Zia hi LALPA thu Jehu kiangah a la gen kha ahi, “Khang li’na tiang in la chate chu lalchutpha ah chutsak ding ka hi,” tia a la gen gual ah khan a hung guitung tai.

¹³Chun, Judah ah Lengpa Uzziah kum sawmthum leh kua’na ah chun, Jabesh chapa Shallum chun Israel gam in vai a hun hawm panah, Samaria ah chun tha khat sung bep vai a hawm hi.

¹⁴Gadi chapa Menahem chu Torzah ah kipat chun a kuan to ah, Samaria a hung tung phut in, Samaria ah Jabesh chapa Shallum chu a kidopi ah, a that ah, ama thasâng ah chun ama chu vaihawm in a pang tai.

¹⁵Ahi’n, Shallum nasep dangte leh a thil sawmgukte chu, Israel lengte Chanchin Lekhabu chun a kizik hi.

¹⁶Zia nungah chun Menahem chun Tiphsah leh a sungah um zosiate chu a sawisa, Tirzah ah kipat luiphâi gam chu a bulu zui pek ah, zia chu ama â ding ah lampi a la hon piak ziak ua chutia chu a sawisak malam a hia, tichun, a gam sung ah numei nauvopte chu a phil kêk malam pek hi.

¹⁷Judah ah Lengpa Azariah kum sawmthum leh kua a ti’n kum ah chun, Gadi chapa Menahem chu Israel chung ah leng in a hung pang ah; tichun, Samaria ah kum sawm sung vaihawm in a pang hi.

¹⁸Ama hinle LALPA mit muah chun thil diklo tak chu a hun bawl kit zel ah, Israel gitlona lampi zui Nebat chapa Jeroboam gitlonate chu a damsung ah chun a kihei mang san thei diak puai.

¹⁹Ziaphatchun, Menahem khutah a gam uh chu, sukdet a hi’theina ding a ngaitua ziakin Pul kiangah chun dangka talent sang khat a la pia’n.

²⁰Ziaziakchun, Menahem chun Israel gam ah chun dangka a hun dawl ah, a mi hausate zosia ah kipat chun dangka shekel sawmnga nga’n a hun dawl ah, zia chu Assuria lengpa piak ding ah a dawl ahi’n. Tichun Assuria lengpa chule zia gam ah chun um talo in a kile’kit tai.

²¹Ahi’n, Menahem thilhite leh a nasep dangte chu Israel Lengte Chanchin kizikna Lekhabu a kizik ta hilo a hem?

²²Tichun, Menahem chu a pu leh pate kiang in a ipmu ta’n, a chapa Pekahiah chun a thasâng ah vaihawm in a hung pang tai.

²³Judai gam ah Lengpa Azariah chu kum sawmnga leng ah a hung pan kum in, Menahem chapa Pekahiah chu Israelte chung ah vaihawm in a hung pangah, Samaria ah chun kum ni sung vaihawm in a pang hi.

²⁴Ahi’n, ama hinle LALPA mit mu ah chun thil diklo tak chu a bawl kit ah, Israelte gitlona lampi chu Nebat chapa Jeroboam chun a kihei mang san nuam diak puai.

²⁵Himaleh, Remaliah chapa Pekah chun, a sepai hotupa tawh Geliad mi sawmngate pui in, Samaria khawpi a bulu tau ah; a lengpa In ah valut in, Argob leh Arieh tawh lengpa chu a va thatlum ua, a thasâng in ama leng in a hung pang tai.

²⁶Ahi’n, Pekahiah nasep leh a thilhi dangte haw chu, Israel lengte Chanchin kizikna Lekhabu a kizik tai.

²⁷Judah ah Lengpa Azariah chu leng ah a hung pan, kum sawmnga leh ni ahi in, Remaliah chapa Pekah chu Israelte chung in vaihawm in a hung pang a; Samaria ah chun kum sawmni sung vaihawm in a pang hi.

²⁸Ahi’n, ama hinle LALPA mit mu ah thil diklo tak chu a bawl kit a; Israel gitlona lampi chu zui in, Nebat chapa Jeroboam gitlona chu a kihei mang san nuam diak puai.

²⁹Israel ah Lengpa Pekah vaihawm sung ah chun Assuria ah lengpa Tiglath-pilesar chu a hung kuanah, Aijon tawh, Abelbeth-maakah leh Janoah tawh, Kedesh leh, Hazor tawh, Gilead leh, Galili tawh, Naphtali gam zosiate chu a hun la ta’n, tichun amau haw chu Assuria lam ah sal in a pui tai.

³⁰Elah chapa Hoshea chun Remaliah chapa Pekah a thalup theina ding chu a gûk in a la ngaitua ah, a kidelpi ah, a hun that ta’n, tichun, vaihawm in a pang tai.

³¹Ahi’n, Pekah thilhite leh a nasep dang zosiate chu, Israel Lengte Chanchin kizikna lekhabu chun a kizik tai.

³²Israel ah Lengpa Remaliah chapa Pekah vaihawm hun kum ni a ti’n kum ah chun, Judai gam in Lengpa Uzziah chapa Jotham vaihawm in a hung pang hi.

³³Ama chu leng a hung hi’pat kum in, kum sawmni leh nga ah upa a hita’n, tichun Jerusalem ah kum sawm leh guk sung vaihawm in a pang ah, a nu chu Zadok chanu Jerusha ahi.

³⁴Ama hin, a pa Uzziah thil hidan pha tak in a zui ah, LALPA mit mu in thilpha a bawl hi.

³⁵Himaleh, thoimualte chu sukbei in a um diak pua, tichun, mipi chu zia thoimualte chun a kithawi zing tho ua, gimtuite chu zia mun chun a hâl zing sek ui. Ama chun, LALPA In kêlkot saknung zaw chu a hun siamdok hi.

³⁶Ahi’n, Jotham nasep leh thilbawlte, zia tak ah kizik lo hile Judah lengte khangthu a kizikna hilo a hem?

³⁷Zia lai ah chun LALPA chun Aram ah Lengpa Rezin leh Remaliah chapa Pekah chu Judah do dingin a hun sawl pan tai.

³⁸Ahi’n, Jotham chu a pu leh pate kiang in a ipmu ta’n, a pa David khawpi ah chun a pu leh a pate thân ah vui in a um tai; zia nungah chun a chapa Ahaz chun ama thasâng ah vaihawm in a hung pang tai.