Read Vaiphei 2 LENGTE 18 Bible Online

2 LENGTE 18 - Vaiphei bible

2 LENGTE 18

¹Judai gam ah Lengpa Ahaz chapa Hezekiah chu vaihawm in a hung pang pan hi.

²Ama chu a vaihawm pat kum ah chun kum sawmni leh nga upa a hita; tichun, Jerusalem ah kum sawmni leh kua sung vai a hawm ah, a nu chu Zekariah chanu Abi ahi.

³Ama hin a pa David thil hi dan zui in, LALPA mit mu ah thil dik tak chu a bawl sek a.

⁴Thoimualte chu a subei ah, milim haw chu a subei sik sekah, dawikhuamte a phuk sik sek ah, Mosi bawl sa sum-eng gul lim Nehusthan kiti khale, zia hun tiang ah chun a pathian uh hona’n gimtui a hâl zing nalai ua; ziate haw chule a khen gawp sik sek hi.

⁵Ama chu LALPA Israel Pathian ah chun a kinga, Judah lengte lakah chun a masang leh a nungah le ama gual leng dang him him a um kha puai.

⁶Ama chun LALPA chu a tuk zing ziakin, ama nung chu a zui khial kha puai, Mosi kiang ah LALPA‘n thu a piak ngei kha a zui zaw ta ahi.

⁷Tichun, ama chu LALPA‘n a umpi ah, a kiheina lam lam ah chun a lamjang pekah; Assuria lengpa chung ah hung kiphin in, a na a hun sêm nuam ta puai.

⁸Philistinte chu a hun do ah, Gaza gam pumpi a gâlvenbûk Insâng ah kipat ah chun a khawpi kulbâng tiang in a zo pek tai.

⁹Hezekiah leng ahi’na kum li a tin kum ah chun, Israel Lengpa Elah chapa Hoshea le leng a hi’na kum sagi a tin kum ahi; Assuria Lengpa Shalmaneser chu Samaria do dingin a hung kuanah, a hun nuaisia ta’n.

¹⁰Kum thum tin kum in a zo tai; zia chu Hezekiah lengah a pan a kum gukna a hia, chuleh Israel Lengpa Hoshea leng ahi kum kuana ahi kit ah, zia chu Samaria a lak kum chu ahi.

¹¹Tichun, Assuria lengpa chun Israel chu Assuria lam ah a pui mang ah, Gozan lui lian pâm ah Halah leh Habor ah Mede khawpite chu a umsak tai.

¹²LALPA a Pathian uh aw chu ngaisak lo in, a thuthung chu a botsiauah, LALPA‘n a suak Mosi mang ah a thupiakte chu a zui nuam puau a, ngaile a ngai nuam puau hi.

¹³Lengpa Hezekiah kum sawm leh li leng ahi kum ah chun, Assuria Lengpa Senakherib chu Judah khawpi kul ah ki-ûm zosia bulu dingin a hung kuanah, a hung la kit tai.

¹⁴Lengpa kiang ah chun mi a sawl ah, “La chung in thil ka hikhial hi, ei nusia mai ta’n; ka chung ah la bawldan dan chu thuak mai ing ka,” a vatisak tai. Ziaphatchun, Assuria lengpa chun Judai gam ah Lengpa Hezekiah ah kipat ah chun, dangka talent za thum tawh sana talent sawm thum a ngek a.

¹⁵Ziaphatchun, Hezekiah chun LALPA In ah um leh, leng In ah um dangka zosia chu a kiang in a pia tai.

¹⁶Zia hun ah chun, Hezekiah chun, ama In leh LALPA biak In tempul kotkhak leh; a khuam ah sana a luan khum chu khok tha’n, Assuria Lengpa kiang in a pia tai.

¹⁷Ziaphatchun, Assuria Lengpa chun, Lakish ah kipat chun, Tartan leh, Rabsaris chuleh Rabshakeh tawh Jerusalem ah Lengpa Hezekiah kiang in a sawl ah. A hung kuan to ua, Jerusalem chu a hung tung tau hi. Chutia, a hung kuan ziang phat un, puansawptu lou lampi kiang ah dil saknung zawk umna ah chun a hung ding tau hi.

¹⁸Zia tak ah chun lengpa chu a hun ko ua leh, a In enkolpa Hilkiah chapa Eliakim leh chanchin zikpa Asaph chapa Joan tawh a hung pawtdok tau hi

¹⁹Rabshakeh chun a kiang un, “Hezekiah kiang in, Leng lopi tak chun hitin a gen hi, Assuria lengpa ngei chun: La gin chu kua a hia, zia gual tak ah hi kisuang la hem?

²⁰Thu mai ah lemguat thiam hi, kido’na ding ah hatna la ngai a hem? Kua kisuanpi ah zia gual tak ah hi ka chung ah kiphin ziang la hem?

²¹Ngai in, tu’hin, Aigupta luangkang bongsum chung ah kinga bep la hi; zia gual chung ah ki-ngate chu ama ngei sun ding ahi: Aigupta Lengpa Pharaoh chule zia gual chu ahi.

²²Himaleh, nang chun, ‘Pathian chung ah kinga ka hi’n, Hezekiah in thoimual leh mâichâm a suksiat hilo a hem, Jerusalem leh Judate kiang in, Jerusalem ah, zia mâichâm ah hin la bokkhup ding ahi,’ lei ti khumsa hilo a hem?

²³Tu’hin, ka LALPA Assuria Lengpa kiangah hin hung kitiam inla, zia tak chuleh sakol sang ni hun pia’ng ka tin, a chungchuang ding chu nang in la kingaitua ding ahi.

²⁴Chuangmite leh kângtalaite kisuanpi la hi chun, ka hotupa suakte lak ah hotu neupen ziang hile bangtidan ah kiheisak thei ding la hem?

²⁵Zia mun hung susia ding ah hin LALPA panglo ah hung kuan to dingah lei ngaitua a hem? LALPA‘n ka kiang in thu a gen ah, zia gam do dingah hin hang kuan to inla, hung hise sik sek in ei ti ahi,” a tia.

²⁶Ziaphatchun, Hilkiah chapa Eliakim leh, Shebnah tawh, Joan chun Rabshakeh kiang in, “Mipi bâng chungah umte het thei dingin; lungsiat tak in, Juda pau hilo in, Aramaic pau in thu hun gen in; ka hetheitho ngal ua,” a tiu a.

²⁷Himaleh, Rabshakeh chun a kiang in, “Kulbâng chung ah mipi kichute kiang ah hilo in, la hotupa leh nangma ngei kiang ah, amau êk kinêk ah a zun uh kidawn hial ah, a chung ua siatna tung dingte kiang ah; ka hotupa’n ei sawl hilo ka hia a hem?” a tia.

²⁸Ziaphatchun, Rabshakeh chu a hung dingah, Judate pau in thu a hun gen ah, aw ngai tak in a hung kiko ah, Leng lopi thu chu a la ngai un:

²⁹Lengpa chun zia gual hin a gen hi: Hezekiah chu kithep zawsak kiu in la, ama chun ka khut ah kipat chun hun hukdok thei lo ding ahi ngal a;

³⁰Hezekiah chun LALPA ah le hun kingaksak diak ki’hen, ama chun, “LALPA‘n ei hukdok ding ahi’n, zia khawpi hi Assuria lengpa khutah chun piak hilo him him ding ahi,” hun tiding ahi.

³¹Ziaziakchun, Hezekiah thugen chu taksang kiu inla: Assuria lengpa chun zia gual hin a gen hi, Thilpiakte mang in ka kilepna ding uh hun siam uh hen la, kei lam in hung pang tau hen, chutileh mi tin chun amau grep ga chiat leh a theichang ga chiat uh kinêk thei ding a hiu; tichun, mi tin chun amau bêl ah tui chu kidawn chiat ta’n au, ti’n;

³²keima ka hung ah, nangmau gam tawh kibang, bu leh uain gam, vaithum leh grep huan tamna, Oliv thau leh khuaizu tamna gam, la um ua la thi lona diu gam ah ka hun pui lût theina dingin; Hezekiah thugen kha a la taksang kiu in, a hun thep leh le, LALPA‘n hun hukdok in ah, ti bep hiding ahi ngal a.

³³Assuria lengpa khut ah kipat hukdok thei ding kua nam pathiante a um ah a hem?

³⁴Hamath leh Arpad pathiante chu khoilam ah um a hiu em? Sapharva-im te, Hena te, Ivah te haw pathiante kha khawi ah um a hitau em? Ziate chun ka khut ah kipat hin Samaria khawpi a hukdok kha ngai ua a hem?

³⁵LALPA chun Jerusalem ka khut ah kipat a hukdaw lo ngal leh; kuate pathian chu a hem ka khut ah kipat a gam uh hukdok ding? a tia.

³⁶Mipite chu a thip chil chel tau a.

³⁷Ziazaw chun a Inkuan lak ua hotu pen, Hilkiah chapa Eliakim leh dan lam ah mithiam Shebnah tawh, a lekhazik ua pang sek Asaph chapa Joah chun a puan uh botthêk in, Hezekiah kiang in a hung ua, Rabshakeh thugen haw chu a hung hil tau a.