Read Vaiphei 2 LENGTE 2 Bible Online

2 LENGTE 2 - Vaiphei bible

2 LENGTE 2

¹Tu’hin, LALPA‘n chîmpei ah Elijah van ah a lâk to ding kuan ah chun, Elijah leh Elisha chu Gilgal ah kipat lampi a hung kiton lai un.

²Elijah chun Elisha kiang in, “Zia tak hin a la um in; LALPA chun Bethel lam ah chia dingin ei sawl ahi,” a tia. Himaleh Elisha chun, “LALPA a hin zing ziakin leh, nang ngei le la hin zing ziakin, hun nusia lo hial ding ka hi,” a tia. Tichun, Bethel ah a chia suk tau a.

³Bethel ah jawlnei pawlkhatte chu Elisha kiang in a hung ua, a kiang in, “Tu’ni hin LALPA‘n la hotupa hi nang ah kipat lamang ding ahi ti he lo la hem?” a tiu ah. Ama chun, “Ahi, ka henai; thip hiat hiat un,” a tia.

⁴Elijah in a kiang in, “Elisha, zia hin a la um ta’n; LALPA‘n Jeriko ah ei sawl ahi,” a tia. Himaleh, ama chun, “LALPA a hin zing ziak in leh, nang ngeile la hin zing ziakin, hun nusia lo hial ding ka hi,” a tia. Tichun, Jeriko a hung tung tau hi.

⁵Jeriko ah jawlnei pawl khat umte chun Elisha a hun nai ua, a kiang in, “Tu’ni hin LALPA‘n la hotupa nang ah kipat lamang ding ahi ti he lo la hem?” a tiu ah. Ama’n a kiang un, “Ahi, ka henai; thip hiat hiat un,” a tia.

⁶Ziaphatchun, Elijah in a kiang in, “Zia hin a la um in; LALPA‘n Jordan ah ei sawl ahi,” a tia. Himaleh, ama chun, “LALPA a hin zing ziakin leh, nang ngei le la hin zing ziakin, hun nusia lo hial ding ka hi,” a tia. Tichun, a paniu in a chia pek tau hi.

⁷Jawlnei pawl khat umte lak ah mi sawmnga chule a chia tau a, amau tawh kigamla deu in a ding ua, amau teni chu Jordan lui gei in a ding ua.

⁸Elijah chun a puan chu a la, a zialtom ah, tui chu a khen a; tui chu a langkhat leh a langkhat gêl in a hung kikhen ah, amau teni chun lei keu chung in a kai phei tau hi.

⁹A gâlkâi phat un, Elijah in Elisha kiang in, “La kiang ah kipat lakmang ah ka um masang in, bang hun bawl piak leng la nuam em ei gen in,” a tia. Elisha chun, “Lungsiat tak in la thagau chan a le’ni ei gosia in,” a tia.

¹⁰Ama’n a dawnhu ah, “La dot chu thil haksa tak ahi; ahi’n la, nang ah kipat lâk mang ah ka um lai tak ah lei mu chun, zia chu piak ah um ding la hi; ahiloleh vang, piak hilo ding la hi,” a tia.

¹¹A chia kawm ua a holim zel lai un, meikuang kângtalai tawh meikuang sakolte’n amau teni chu a hung khendan ta’n, Elijah chu chîmpei in van ah a kal to tai.

¹²Elisha chun a et zing kawm in a kiko zing a, “He pa, he pa! Israel kângtalaite leh a sakolpute chu!” ti in. Himaleh, a mu phâk tâk lo phatin, a puan chu a la, phel ni’n a botthêk tai.

¹³Elijah puan ama ah kipat ngei hung ketha chu a la, a nung chia kit ah Jordan luigei in a ding tai.

¹⁴Elijah puanchual ama ah kipat hung ketha chu a la, “LALPA, Elijah Pathian ngei chu khoi ah a um em?” ti kawm in tui chu a khen a. Tui chu a khet phatin, a langkhat leh a langkhat lam gêl in a hung kikhen ta’n, Elisha chu a chia gâlkâi tai.

¹⁵Jeriko ah jawlnei pawl khat umte’n ama chu a la gâl mu phat un, “Elijah thagau Elisha ah a um tai,” a la tiu a. Ama lamtua dingin a hung un, a âng ah leitual in a bokkhup tau hi.

¹⁶Amau chun a kiang in, “En tiam in, la suakte hin pawsal thahât sawmnga I nei uh hilam; lungsiat tak in amau chu la hotupa hawl ding in sawl hitu in; LALPA thagau in ama chu a pui to ah, khoi tak tâng a hem, ahiloleh phâijang a hem khat ah a hun kiakthâk le hithei ahi,” a tiu a. Ama’n a kiang un, “Ahipuai, amau chu sawl kiu in,” a tia.

¹⁷Himaleh, a zachatna ding hial ah a dot tun tun phat un, ama chun, “Ahileh, sawl mai un,” a tia. Tichun mi sawmga a sawl ua, amau chun ni thum sung a hawl ua; himaleh, a mu zo puau hi.

¹⁸A kiang ah a hung kile’kit phat un (ama chu Jeriko ah a la um zing ah,) a kiang un, “Chia kiu in, ka hun ti’sa hilo la hiu em?” a tia.

¹⁹Khawpi ah chêngte chun Elisha kiang in, “Ka lalpau in la mu gual ngei hin, zia khawpi umna mun hi a pha ma ma’n; himaleh, a tui hi a pha pua’n, a gam hinle ga sua lo ahi,” a tiu a.

²⁰Ama chun, “Belbu thak pakhat ei hun choi piak unla, a sung ah chi hung koi un,” a tia. Tichun a kiang in a hun chawi tau a.

²¹Tichun, a chia ah tuinâk ah chun, chi chu a sep lut ah, “LALPA‘n zia gual hin a gen hi, ‘Zia tui hi damna tui in ka siam tai; tu’kipat hin thi’na ahiloleh naunei theilo’na hung pawt ta pua’n ah’ a tii,” a tia.

²²Elisha in a gen gual in, tu’ni tiang in sukdamna tui a hizing tai.

²³Zia kipat chun Bethel ah a chia to ah; chun lampi ah a chia to zing lai in, khawpi ah kipat pawsal naupang khenkhatte a hung ua, a hun daî ua, “Chia mang in, lukolpa! Chia mang in, lukolpa!” a tiu a.

²⁴A kihei vêl leh a mau chu a hun mu ta, LALPA min in hânsia a lawkhum tai. Chun, gamlak ah kipat in savompi pani a hung pawtdok ua, pawsal naupangte lak ah sawmli leh ni chu a hung petlum tau hi.

²⁵Zia kipat chun Karmel tâng tiang in a chia pek ah, zia nung ah chun Samaria ah a kile’kit tai.