Read Vaiphei 2 LENGTE 22 Bible Online

2 LENGTE 22 - Vaiphei bible

2 LENGTE 22

¹Josiah chun vai a hun hawm pat kum ah chun, kum giat ah upa bep ahi nalai ah; tichun, Jerusalem ah chun kum sawmthum leh khat sung vai a hawm ah. A nu chu Bozkath ah um Adaiah chanu Jedidah ahi.

²Ama hin, a pa David lampi a haw ah; LALPA mit mu in thil dik tak in a bawl ah, a veilam leh a changlam inle a pêtmang kha him him puai.

³Lengpa Josiah vaihawm kum, sawm leh giat a ti’n kum ah chun zia gual hin a hung um a: Meshullam chapa Azaliah chapa Shaphan, a lekhazikpa chu LALPA In ah a sawl ah, zia gual hin a gen a:

⁴“Kotkhak vêngpa’n mipi ah kipat a la dawldaw, LALPA In ah dangka kichawikhawm haw kha hun simdok dingin thiampu lianpen Hilkiah kha hil dingin hang chia inla;

⁵chuleh, a nasêmte khut in la pedok hen la, amau chun LALPA In a siatna chu hawldaw ah nasêmte, LALPA In ah um ah, a siatnate zosia bawl ding ah umte kiang ah khan pedok hen,

⁶thing lam khutthiamte tawh, a lemte tawh, a suangsêkte tawh, a thing chawkna ding uh tawh, a suang lakkhawmna ding uh tawh; tichun, In chu pha tak in hun bawlpha tau hen.

⁷Ahi’n la, a khut ua piakdawah a um gual ah chun dangkate chu, amau chun ginum takah a bawl ziak un amau tawh etkhawmna tak tak a um diak puai,” a tia.

⁸Tichun, thiampu lianpen Hilkiah chun, lekhazikpa Shaphan kiang ah chun, “Zia LALPA In ah hin dan lekhabu ka mudok hi,” a tia. Tichun, Hilkiah chun zia lekhabu chu Shaphan kiang in a pia, ama chun a sim a.

⁹Ziazaw chun, lekhazikpa Shaphan chu Lengpa kiang ah hung in, thu a hun tut kit a, “La suakte chun LALPA In ah dangka kidawl khawmte chu a hun lakhawm ua, nasêmte leh LALPA In ah nasepna lam endikte kiang ah chun a pedok ui,” a tia.

¹⁰Ziazaw chun, lekhazikpa Shaphan chun Lengpa chu etsak kawm in, “Thiampu Hilkiah chun Lekhabu pakhat ei la pia hen, zia hin ka hun chawi hi,” a tia. Tichun, Shaphan chun, zia lekhabu chu Lengpa ma-âng ah chun a hun sim tai.

¹¹Lengpa chun zia Dan Lekhabu ah thute chu a hun het phat in, a puante chu a botthêk tai.

¹²Ziaphatchun, lengpa chun Thiampu Hilkiah, Shaphan chapa Ahikam, Mikaiah chapa Akabor, lekhazikpa Shaphan tawh, lengpa suakpa Asaliah tawh a ko ah, thu a pia:

¹³“Chiau inla, keima leh mipite leh Judai gam ah mi zosiate chung thu dingin LALPA thu vadong un; LALPA lungnatna I chung ua kuang hi a nasa ta ma ma ahi, I pu leh pateu hin zia lekhabu thute hi a la limsak nuam puau ah, eimau chung thu ah zia thu kizikte hi a la khawksak lo uh ahi,” a tia.

¹⁴Tichun, thiampu Hilkiah tawh, Ahikam tawh, Akhbor tawh, Shapham tawh, Asahiah tawh, puan koikhawmna vengpa, Harhas tupa Tikvah chapa Shallum ji jawlneinu Huldah kiang ah chun a vachiau ah; amanu chu Jerusalem ah zilna mun ah um ahi’n; tichun, amanu chu tawh a vaholim tau a.

¹⁵Amanu chun a kiang un, “LALPA, Israelte Pathian chun zia gual hin a gen hi: ‘La kiang ah mi hung kisawlte kiang ah khan zia hi a la gen in,

¹⁶LALPA chun zia gual hin a gen hi: Zia mun leh zia tak ah umte chung ah hin thil phalo hun tut ding ka hi; Judah Lengpa’n lekhabu a simdaw thute ngei chu hun guitunsak ding ka hi:

¹⁷Amau chun, keima ei kihei mang san ua, pathian dangte â dingin gimtuite a hâl ua, amau khutsuak ngei ngei ah chun keima lungnatna ding lam tak in ei bawl ua; ziaziakchun, zia mun ah hin ka lungnatna hung kuangdok ding ahi; zia chu phelmit zaw gual hilo ding ahi.

¹⁸Himaleh, Judah Lengpa, nangmau hun sawlpa chun LALPA chu thu a dot a hi; ziaziakchun, ama kiang ah chun zia gual hin gen tau in: LALPA, Israelte Pathian chun zia gual hin a gen hi, la thu hiatte chun a hun koi dan takah chun,

¹⁹la lungthim chu a nem ziakin leh nangma ngei chu LALPA ma-âng ah, zia tak leh a mun ah chêngte hânsia khuk leh sukgam ah um dingte chung thu ding ka gen la het phatah, la puante la botthêk ah, ka ma-âng ah la kâ ziak hin, la kingainiam ma ma hi ti ka hia’i; ziaziakchun, la thu hi ka hun ngaithâk piak ahi.

²⁰Ziaziakchun, la pu leh pate kiang in hun pui ing ka tin, nangma chu thamuang tak ah thân ah chia ding la hi; ziaziakchun, zia mun chung ah ka thil tunsak dingte hi nangma mit in vang mu pua’n la, LALPA‘n a tii,’ tiu in,” a tia. Tichun, lengpa kiangah chun zia thu chu a tut tau hi.