Read Vaiphei 2 LENGTE 23 Bible Online

2 LENGTE 23 - Vaiphei bible

2 LENGTE 23

¹Lengpa chun mi a sawlah, Jerusalem ah Judah upate zosia chu a hun ko khawm ua.

²Lengpa chu LALPA In ah chun a chia to ah; tichun, Judah mipi zosia tawh, Jerusalem ah chêngte zosia chunle a zui ua; thiampute tawh, jawlneite tawh, mipi a lian a neule a pang chiat tau a; tichun, LALPA In ah lekhabu a mudawu ah kizikte chu aleng alam in mipi zosia nakhang bul ah chun a hun simdok tai.

³Ziazaw chun, Lengpa chu khuam pakhat bul in a hung ding ah, LALPA hiatsakte leh a dan thupiakte chu pha tak ah zawm ding leh, hi’ding ah a hilnate chu lungthim leh thagau ah ti tak tak ah zui dingin leh, lekhabu kizik gual gual ah hi’ding um taphot chu hi zel dingin thu a tiam a. Tichun, mipi zosia chule zia thuthung ah chun a hung ding tau hi.

⁴Ziaphatchun Lengpa chun, thiampu lianpen Hilkiah tawh, ama nuai ah nasem ding thiampute tawh, a kotkhak vêngpa tawh, LALPA In ah ûm leh bêl, Baal tawh Asher leh van lam thil haw biakna ding ah kikoi haw zosia chu hun ladok dingin thu a pia; chuleh, Jerusalem pawlam pek ah, Kidron loulai ah chun a hâl tum tau ah; ziazaw chun a vâmte chu Bethel lam in a puau a.

⁵Tichun, Judai gam ah Lengpa’n milim thiampu, gimtui hâl ding ah a la namdette, Judai gam ah khawpite ah thoimual ah thil lân ding ah a la umte chu tawh, Jerusalem leh a kîmvêl ah um zosiate tawh pum in; Baal biaknate leh van lam thilte haw biakna zosiate chu a hun haisak sik sek tau a.

⁶Tichun, LALPA In ah Asherah milim umte chu a hun ladok ua, Jerusalem pawlam pek ah Kidron lui lam in a puau ah; zia Kidron luidung ah chun a hâl tum ua, a vâm chule a gawt buang dim diam ua, a mipite chate thân chung in a the’ tau hi.

⁷Milim ah khai ding, puankhawng numeite umna mun, LALPA In kiang ah um, pawsal nawchizuakte In haw chule a hun phel sik sek tau hi.

⁸Tichun, Judai gam ah khawpite ah kipat chun thiampute chu a kaidok ah, Geba ah kipat Beer-sheba tiang in, thoimual ah thiampute gimtui hâlna munte chu a sukbuak piak ah; khawpi kul kotkhak veilam pang ah um, khawpi sung awptu Joshua In lutna kêlkot ah thoimual haw chule, a susia sik sek tai.

⁹Chuti bawl maleh, thoimual ah thiampute chu Jerusalem ah, LALPA mâichâm ah chun a hung to puau ah, a unauteu kiang ah thawipanglo vaithum nêkna chun a hung pang zaw tau a.

¹⁰Chuleh, Molekh ah a chapa a hem a chanu a hem, mei ah kithoina kuama’n a mat tâk lona ding un, Hinnom chate umna phâizang ah Topheth chu a vasubuak tai.

¹¹Chuleh, LALPA In lutna, In vengpa, mitilge Nathan-melek pindan kiang ah um, Judai gam ah lengte’n nisa kiangah a piak sek uh, a khawpel ua um sakolte chu a lamang a; tichun, zia nisa kângtalaite chu mei in a hâl tum a.

¹²Judah lengpa Ahaz in a la siam pindan chungnung lam tak ah a la koi mâichâm tawh, Manasseh in a siam LALPA In pindan pani ah koi ding ah a siam a koite chu lengpa chun a hun latha’, a hun khen nawi ah, a nawn haw chu Kidron lui lam ah chun a vasun thâksak a.

¹³Jerusalem sualam ah um, thoimualte siatna tâng simlam pang ah um, Israel ah Lengpa Solomon in Sidon mite buakna, Astarte â ding ah a bawl, Moabte buakna Khemosh â ding leh, Ammon chate buakna, Milkom chu Lengpa chun a hun subuak a.

¹⁴Tichun, milim khet gawp theite chu a khen gawp ah, a gawp theilote chu a tan bot thaw ah, zia munte zosia chu mithi gu ngen in a hun koidim tai.

¹⁵Zia ban ah chun Bethel ah um mâichâm leh thoimual, Nebat chapa Jeroboam, Israelte gitlo sakpa khan a siam, mâichâm leh thoimualte chu a sukchip piak sik sek a; thoimual chu mei in a hâl ah, vut a suaksak ah; chuleh, a milim dawikhuamte chule a hâl tum piak tai.

¹⁶Ziazaw chun, Josiah chu a hung kihei leh tâng chung ah thân umte chu a vak mu; zia thânte sungah gute chu hun ladok dingin mi a sawl a; ziate chu mâichâm chung in a hun hâl ua; Kût hun ah Lengpa Jeroboam chu mâichâm bul ah a din tak leh, Pathian min thu a puandaw sek dungzui ah, a ho dan uh chu a sukbuak piak tai.

¹⁷Ziazaw chun, ama chun, “Zia thân sung ah ka mu saw kua a hem?” a hun tia. Zia chu a khawpi ah mite chun a hil ua, “Zia saw Pathian mi thân ahi; ama chu zia Bethel mâichâm chungah la thil hi ding dan a la puangdok masapa kha ahi,” a tiu a.

¹⁸Ziaphatchun ama chun, “Chuti umsak tau in; ama gu chu vang kuama’n ladok kiu hen,” a tia. Tichun, ama gu leh Samaria ah kipat hung pawt jawlnei gute chu tichun a umsak tau a.

¹⁹LALPA lungnatna ding bepah Israel lengte’n a la bawl khâk uh, Samaria khawpite ah thoimual um leh, a In zosiau chu Josiah in Bethel ah a bawltâk gual in a susia dik dek tai.

²⁰Mâichâm chungah chun thoimual thiampute chu a that ah, a chung un mithi gute zosia chu a hâl tum ah, ziazaw chun Jerusalem lam in a kile’kit tai.

²¹Zia lai ah chun, Lengpa chun mipi zosia kiang in thu a pia, “Zia thuthung lekhabu kizik gual gual ah hin, LALPA la Pathian uh ti dan gual tak in Chiakân Kût dan chu la zui diu ahi,” a tia.

²²A dik tak in, Israel gam ah vaihawmte hun ah kipat leh, Israel lengte hun lai leh, Judah Lengte hun lai inle zia gual lawm ah hin Chiakân Kût hi a la mang kha ta puau hi;

²³ahi’n, Lengpa Josiah a hung lal kum sawm leh giat a hung tin kum ah chun, Jerusalem ah LALPA â dingin zia Chiakân Kût hi a hung kipan kit bep ahi.

²⁴Ziazawchun, LALPA In ah thiampu Hilkiah in lekhabu a hun mudaw ah kizikte chu pha takah a hun zuitheina ding un, thitha minthangte, Judai gam ah a mu khâkteu haw zosia; chuleh, Jerusalem ah a mu khâkteu zosia chu Josiah chun a hun paidok sik sek tai.

²⁵Ama gual hi a masang in Leng dang him him a um kha nai puau ah, ama hi a lungthim zosia ah LALPA lam nga chu ahi; tichun, a hinna zosia tawh, a hatna zosia tawh, Mosi dan dungzui takah tawi in a um ah, ama nung inle ama tawhbang Leng hi a um kit kha nai puai.

²⁶Zia sapichunle, Judai gam chung ah LALPA lungnatna a la kuangdoksa chu, Manasseh in a la suklungnat sawn diak ziakin a dai zo nai diak puai.

²⁷Ahi’n la, LALPA chun zia gual hin a gen a: “Israel ka bawdaw gual ah khan Judah le ka mit mu ngei ah kipat hun botdok ing ka tin; zia ka hun nol ding ka hi tai,” ti in.

²⁸Ahi’n, Josiah nasep dangte leh a thilhite zosia chu Judai gam ah Lengte Khangthu ah chun a kizik ta hilo a hem?

²⁹Ama hun lai ah chun, Aigupta ah Lengpa Pharaoh Neko chu Euphrates luidung ah chun, Assuria Lengpa tawh kido dingin a hung kuan to a; Lengpa Josiah chule Pharaoh Neko do dingin a kuan ah, a kido phat un, Pharaoh Neko chun Megiddo mun ah chun a that tai.

³⁰Megiddo ah kipat chun a suakte chun a sakol kângtalai in Jerusalem a hun paw tung ua, ama thân in a vui tau hi. Ziaphatchun, mipite chun Josiah chapa Jehoahaz chu a hun pui ua, sathau a nuu’ ah, a pa thasang ah Leng in a pansak tau hi.

³¹Jehoahaz in vai a hun hawm pat kum ah chun, ama chu kum sawmni leh thum ah upa a hita’n; Jerusalem ah chun tha thum vai a hawm ah. A nu chu Libnah ah um Jeremiah chanu Hamutal ahi.

³²Ama hinle a pu a pate dungsûn in, LALPA mit mu ah chun thil phalo tak tak a hun bawl a.

³³Ama chun Jerusalem ah vai a hawm sawtlona dingin, Pharaoh Neko chun Hamath gam ah Riblah mun ah chun a khâktan ah; tichun, khasana ding dan in dangka talent za khat leh sana talent khat a piaksak a.

³⁴Chuleh, Pharaoh Neko chun Josiah chapa Eliakim chu a pa thasâng ah leng dingin a siam ah; a min chu Jehoiakim ti’n a then piak ah, Jehoahaz chu Aigupta lam in a pui mangah; zia tak ah chun a hung thi den tai.

³⁵Tichun, Jehoiakim chun dangka leh sana chu Pharaoh kiang ah chun a pia; himaleh, Pharaoh thupiak dungzui ah chun a gam khasana chu a sum ah a piak ding a la hi; tichun, a gam sungah chun a mipi lak in dangka leh sana a dawl kit zel ah, mi tin chu a khasana ding gual chiat un zia Pharaoh Neko piak ding ah chun a la sek hi.

³⁶Jehoiakim chun vai a hawm pat kum ah chun, kum sawmni leh nga ah upa ahi tai; Jerusalem ah chun kum sawm leh khat sung vai a hawm ah. A nu chu Rumah khua ah um, Pedaiah chanu Zebidah ahi.

³⁷Ama hinle a pu leh pate dungsûn in a thilhiteu chu a zui ah, LALPA mit mu in thil diklo takte a bawl hi.