Read Vaiphei 2 LENGTE 3 Bible Online

2 LENGTE 3 - Vaiphei bible

2 LENGTE 3

¹Jehoshaphat chu Judai gam ah leng ah a pan kum sawm leh giatna chun, Ahab chapa Jehoram chu Samaria khua’n Israel chungah leng in a pang ah; ama’n kum sawm leh ni vai a hawm hi.

²Ama chun LALPA mit mu ah thil phalo chu a bawl ah, a pa leh a nu gual vang ahi puai, a pa’n Baal suangphûm a la bawl chu a koimang a.

³Himaleh, Nebat chapa Jeroboam gitlona, Israel a gitlosakna chu a tuchak zing ah; a nusia puai.

⁴Moab ah Lengpa Mesha chu belam vul mi ahi’n, Israel lengpa kiang ah belamnote nuai khat tawh belamte nuai khat mul a la piak sek ahi’n.

⁵Himaleh, Ahab a thi phatin, Moab lengpa chu Israel lengpa kãl in a hel tai.

⁶Tichun, Lengpa Jehoram chun zia hun ah Samaria ah kipat a chia lai in, Israelte zosia a kai khawm a.

⁷Chutia, a chia lai in, Judai gam ah Lengpa Jehoshaphat kiang in thu a thot a, “Moab lengpa’n ka chung in helna a bawl ta’n; Moab tawh kido dingin ei zui ding la hem?” ti in. Ama’n a dawnhu a, “Aw le; la lamah pang ka hi, ka mite chu la mite a hiu in, ka sakolte chu la sakolte a hiu,” a tia.

⁸Chun, hitin a dong a, “Khoilam pen ah kuan to ding I hiu em?” ti in. Jehoram in, “Edom gamthip lampi lam ah,” ti’n a dawnhu ta’n.

⁹Tichun, Israel lengpa, Judai gam ah lengpa leh Edom lengpa chu a kuan tau ah; tichun, ni sagi sung a vêl nung un, sepaite leh a gancha umpiteu â dingin tui a um ta pua’n.

¹⁰Ziaphatchun, Israel lengpa’n, “Tamaijen! LALPA‘n ei uh lengte pathum hi, Moab khut ah piakdaw ding bep ah ei kodaw a hita hi,” a tia.

¹¹Himaleh, Jehoshaphat chun, “LALPA dong thei ding jawlnei, LALPA‘n a matchâk ding um talo ahi em?” a tia. Tichun, Israel lengpa suakte lak ah pakhat chun a dawnhu a, “Elijah khut chung ah tui a la buak sek, Shaphat chapa Elisha kha a um hi,” a tia.

¹²Jehoshaphat chun, “LALPA thu chu ama kiangah a um hi,” a tia. Chun Israel lengpa tawh Jehoshaphat tawh Edom lengpa chu a kiang in a vachia suk tau a.

¹³Elisha chun Israel lengpa kiang in, “Nang â ding bang bawl ding ka nei em? La jawlneipate kiang a hem, la jawlneinute kiang a hem in vachia ta’n la,” a tia. Himaleh, Israel lengpa chun a kiang in, “Ahipuai; Moab kiang ah piakdaw ding bep ah kei uh lengte pathum ei hung kodokpa hi LALPA ahi,” a tia.

¹⁴Elisha chun, “A na ka sep, sepai honte LALPA min sâl in ka gen hi, Judah ah Lengpa Jehoshaphat ka ja’na ziak hilo leh etle hun en lo ah, mule nuam lo ka hi.

¹⁵Himaleh, tingtang tum thiam khat ei hun sawl piak in,” a tia. Zia phat ah chun, tingtang tum thiamte chun a hun tum phat un, LALPA thilhitheina a chung in a hung um ta’n.

¹⁶Zia gual hin a hun gen a, “LALPA‘n zia gual hin a gen hi, ‘Zia wadi zosia hi tuikul ah hun dimsak ding ka hi,’ a tia.

¹⁷LALPA‘n zia gual hin a gen ta’ngal a, ‘Gua leh hui him him mu pua’n la tiu in; himaleh, zia phâijang zosia dim ah hin tui hung um ding ahi; tichun, nang uh leh, la gan-gualteu, la ganchateu tawh dawn ding la hiu,’ a tia.

¹⁸Zia hi LALPA mit mu ah chun thil neucha bep ahi, Moab la khut un pedok ding ahi.

¹⁹Kul ah ki-ûm khawpi taphot leh khawpi doichuam taphot chu la’n la tin uh; thing pha taphot phuk in la tiu in, tuinâk taphot huk ta’n lau, gam phatna mun taphot chu suang ah sepsia ding la hiu,” a tia.

²⁰A jing ah chun, jingkal lam thillat hun ding vêl in, Edom lamkâi ah kipat in tui a hung luang suk ziang ta’n, khua pawlam ah gam pumpi chu tui in a chûm tai.

²¹Moab mite zosia’n lengte chu amau do dingin a hung to tau hi ti a het phat un, gâlthuam ah kivan thei zosia, a naupang pen ah kipat a upa pen tiang in a kikodok ua, gamgi zul ah chun a kitiang tau a.

²²Jingkal ma tak ah a thawdaw phat ua, nisa’n tui a hun khaw phatin, Moab mite chun a âng zawn ua tui chu thisan gual ah san in a mu tau a.

²³Amau chun, “Zia hi thisan ahi; lengte chu a kido ua, khat leh khat kithat tua ziang hita’n au. Tu’hin, Moab, gâl lâk la di’n kuan un!” a ti tau a.

²⁴Himaleh, Israelte kikulna mun a hung tun phat un, Israelte a kipan ua, Moab mite chu a do tau ah, a naw mang tau hi; Moab ah a lut un a do pek nalai ui.

²⁵Khawpite chu a bungbutun ua, chuleh gam phatna mun taphot ah chun suang a sep lut ua, a hukdim kei tau a; tuinâk taphot chu a huk tan ua, thingpha taphot le a phuk tau hi. Kir-hareseth bep in suang kulbângte chu a um zing a, ahi’n vaisuangse choite’n a hun ûm ua, a do tau hi.

²⁶Moab lengpa’n kido’na chun ding det zo talo ah a kihiat phatin, chemjam chawite za sagi a pui ah, Edom lengpa âng zawn chu phutvan a gua’n; himaleh a zo puau hi.

²⁷Ziaphatchun, ama panna mun hung lua ding, a chapa upa pen chu a pui ah, kulbâng chung ah chun hâlmang thillat in a la’n ta’n. Tichun Israel chung in a lungna ta ma mau in, a âng ua kipat in a kizukdok un, a gam lam un a kile’kit tau hi.