Read Vaiphei 2 LENGTE 6 Bible Online

2 LENGTE 6 - Vaiphei bible

2 LENGTE 6

¹Tichun, jawlnei pawlkhatte chun Elisha kiang in, “Nang inle la mu gual in, la ma bul ah I chut khawmnau mun hi ei uh â dingin a neu ta luai.

²Jordan ah vachia’i tiu in, zia chun, ei uh â ding thingtum pakhat chiat valâi tiu in, zia chun I um na diu In sa’i tiu,” a tiu a. Ama chun, “Zia gual ah chun vabawl un,” ti’n a dawnhu hi.

³Chun a lak ua pakhat chun, “Lungsiat tak in la suakte hi hung zui in,” a tia. Ama chun, “Hung ing ka,” ti’n a dawnhu a.

⁴Tichun a mau chu tawh a chiau a. Jordan a tun phat un thing a phuk pan ngal tau hi.

⁵Himaleh, mi pakhat chun thing a phuk leh, a heicha chang chu tuili lai in a kiak lutsak ta’n; a hung kikodok ah, “A khawk na e, ka hotupa! mi â ka khêl ahi,” a hun tia.

⁶Chun Pathian mi chun, “A kiakthâkna chu khoitak a hem?” a tia. A mun chu a hil phat in, molkang khat a sat bong ah a se’lut leh, heichachang chu a hung kilapdok tai.

⁷Ama chun, “Kilâk in,” a tia. Tichun a kilâk tai.

⁸Khatvei chu, Aram lengpa tawh Israel a kido lai un, a hotute a lemguatpi a. Ama chun, “Zia mun leh zia tak kha ka kikulna mun hiding ahi,” a tia.

⁹Himaleh Pathian mi chun Israel lengpa kiang in thu a thot a, “Zia tak mun hi vahaw malam kha’n la, a ziak chu zia chun Aram mite chia suk ding a hiu,” ti in.

¹⁰Israel lengpa chun Pathian mi gen na mun ah chun thu a vathot ta’n. Khatvei, nivei bep hilo in, zia tawhbang mun chu a genlawk piak sek ah, tichun a la kivêng sek ui.

¹¹Ziaziakchun, Aram lengpa lungthim chu a buai ta ma ma ah; a hotute chu a ko khawm ah a kiang un, “Tu’hin ei hil un, I lak ua kua pen I hiu em Israel lengpa lam ah pang?” a tia.

¹²Chun a hotute lak ah pakhat chun, “Kua ma a pang puai, lengpa ka lalpa. La lupna pindan sung ah la thugente Israel lengpa hil sek chu Israel ah jawlnei, Elisha ahi,” a tia.

¹³Ama chun, “Chia unla a umna chu vahawldok un; a man ding mi hun sawl ding ka hi,” a tia. Ama chu, “Dothan ah a um hi,” ti’n a hil tau a.

¹⁴Tichun zia tak ah chun sakolte leh kângtalaite leh sepai tam tak a sawl ta’n; jan in a hung un, khawpi chu a ûm tau hi.

¹⁵Pathian mi, nasêmte lak ah mi khat chu jingkal matak in a tho ah a pawtdaw phatin, sepaite chu sakolte leh kângtalaite tawh khawpi kîmvêl in ala ûm suak ziang tau a. A suakpa chun, “A khawk na e, ka hotupa! Bang I law ta diam uh?” a tia.

¹⁶Ama’n a dawnhu a, “Lau kiu in, amau lam ah pangte sâng in ei uh lam ah pangte a tam zawu hi,” a tia.

¹⁷Chun Elisha chu a pauchap ah, “Aw LALPA, lungsiat tak in a muthei na dingin a mit hun hi’vâk piak in,” a tia. Tichun LALPA‘n zia suakpa mit chu a hi’vâk piak ta’n, a mu tai; tâng chung ah chun Elisha kîmvêl in meikuang sakolte leh kângtalaite a dim ah um in a mu tai.

¹⁸Aram mite chu ama man ding ah a hung kuan suk phat un, Elisha chu LALPA kiang in a pauchap ah, “Lungsiat tak in zia mite hi a mit uh thûmsak in,” a tia. Tichun Elisha dotna gual in amau chun khua a muthei ta puau hi.

¹⁹Elishan a kiang un, “Zia hi lampi chu a hipua’n, khawpi chule ahi puai; ei hun zui un, la mi hawl pau kiangah chun hun pui ing ka,” a tia. Chun amau chu Samaria ah a pui lût tai.

²⁰Samaria a lut zaw phat un, Elisha chun, “Aw LALPA, zia mite hin a mutheina ding un a mitteu hi’vâk piak in,” a tia. LALPA‘n a mitteu a hi’vâk piak ah, chun Samaria kul sung ah um a hiu ti a he tau hi.

²¹Israel lengpa’n amau chu a mu phât in, Elisha kiang in, “He pa, ka that diam? Ka that mai diam?” a tia.

²²Ama’n a dawnhu a, “Hilo e! La tha guatte haw chu la chemjam leh la thal ah la matsau hilo a hem? A nêk diu leh a dawn ding uh an leh tui a ma-âng un lui piak unla; a lengpau kiang in chiasak kit tau in,” a tia.

²³Tichun amau â di’n luaithe’na thupi tak a siam piak tau ah; a neu ah a dawn zaw phat un, a lengpau kiang in a chia kit tau hi. Aram mite chu Israel sung ah mi bulu dingin a hung ta puau hi.

²⁴Hun bangchan a hem nung in, Aram ah Lengpa Ben-hadad in a sepaite zosia a kai khawm a; Samaria bulu dingin a kuan ua, a ûm chak tau hi.

²⁵A ûm chak den ziak un, Samaria ah kial huaisia tak a tung ta’n, sabiltung luchang pakhat chu dangka shekel sawmgiat in; chuleh, vakhu êk kab se’li sua ah se’khat chu dangka shekel nga man a hung hi tai.

²⁶Zia hun ah chun, Israelte Lengpa chu khawpi kulbâng chung ah a vâkdaw leh, numei pakhat in a kiang in, “Ka lalpa, ei panpi in!” a tia.

²⁷Ama chun, “Hilo e! LALPA‘n hun panpi hen. Ken bangti hung panpi ding ka hem? Buphual ah kipat maw, ahiloleh grep sûkna kipat?” a tia.

²⁸Himaleh, Ziazaw chun lengpa chun, “Bang a hem la buaina chu?” ti’n a dong ah. Amanu chun a kiang in, “Zia numei hin ka kiang in, ‘La chapa pia’n la; tu’ni’n ama sa chu ne’ hi tin, jing leh kei chapa ne’ nai ti,’ ei ti ahi’n.

²⁹Tichun, ka chapa chu ka huan un ka ne zo tau a. A jing in amanu kiang ah, ‘La chapa hun pia ta’n ne tai ti,’ ka tileh ama’n a chapa chu a la sêlgu tai,” a tia.

³⁰Lengpa’n numeinu thugente chu a het phat in, a puante a botthêk ah — ama chu khawpi kulbâng chung ah chia pêt ahiziak in, a puan nuai ah saidip puan sil ahi ti a muu a;

³¹ama chun, “Tu’ni hin, Shaphat chapa Elisha chu a luvom a man lo’nâk leh, Pathian in a law law ei law hen la; a huaisia zaw’n le, ka chung in bawl mai hen,” a ti tai.

³²Tichun, mi khat a sawl ngal tai. Elisha chu a In ah a la kichu’n, upate chule a kiangin a um ua. Thupawtu a hung tun ma chun Elisha’n upate kiang in, “Zia tualthatpa hin ka ngawng tan dingin mi khat a hun sawl tai, ti la hiau em? A hung tun phat leh, kot a la khak unla, a la tuchak ziang un. A LALPA kalsuan git in a nung a hun delzui hilo a hem?” a tia.

³³Amau tawh a kiho zing lai un, lengpa chu a kiang in a hung sukah, “Zia buaina hi LALPA ah kipat ahi! Bangziak ah, LALPA ah kinem zing nalai ding ka hem?” a hung ti tai.