Read Vaiphei 2 LENGTE 7 Bible Online

2 LENGTE 7 - Vaiphei bible

2 LENGTE 7

¹Himaleh, Elisha chun, “LALPA thugen hi ngai in: LALPA‘n zia gual hin a gen hi, Jing phat leh tu’hun vêl ding ah hin changbuang a te’na pakhat dim chu shekel khatah, chuleh barli a te’na dim ni chu shekel khat in Samaria kotpi bul ah kizuak ding ahi,” a tia.

²Sepai hotu, lengpa’n a khutmatchâk pen ah a neipa chun, Pathian mi kiang ah chun, “LALPA‘n van laizawl ah khin tukvante siam ziang leh le, zia tawhbang thil chu tung thei ding a hem?” a tia. Himaleh ama chun, “Zia chu la mit ngei in mu’n la tin, himaleh zia haw chun ne lo ding la hi,” a tia.

³Zia hun lai ah chun, khawpi kotpi pawlam in phâkvei mi pali a um un, amau chu a kiholim ua, “Bang ziak ah, zia hi thi mai ding ah kichu zing ding I hiu em?

⁴‘Khawpi sung ah lut hitiu,’ tileuhin la, kial ziakin khawpi sung ah chun vathi tho ding I hiuah; himaleh, zia hin kichu leu hinle thi tho tho ding I hiu in. Ziaziakchun, Aram mite kikulna ah vatai lut mai hitiu; ei hinghoi ua leh pha, ei thalup ua leh la thi mai hitiu,” a kitiu a.

⁵Tichun, khaw’ngui zul in a kipan ua, Aram mite kikulna ah a chun a chia tauah; himaleh, Aram mite kikulna kiang a tun phat un, zia chun kuama a la um ta puau hi.

⁶LALPA chun Aram sepaite chu kângtalaite leh sakolte tai git, chuleh sepai tam tak kijawt git a la hiatsak ah; tichun, a kiho ua, “Israel lengpa’n Hit mite lengpa tawh Aigupta lengpa ei do ding ah a chial hi’nah,” a kitiu a.

⁷Tichun, khaw-ngui zul ah chun, a puanbûkteu, a sakolteu, leh a sabiltungteu nusia in a jam tauah, a kikulnau chu nusia in a hinna ding un a jam gam tau hi.

⁸Zia phâkte chu a kikulna kiang uh a hung tun phat un, puanbûk pakhat in a lut un, a neu in a dawn ua, dangka, sana leh kithuamna puante a a kilâk ua, a vakisêlgûk tau hi. Chuleh a hung kit ua, puanbûk dang pakhat in a lut kit ua, a thil umte chu pawdok in, a vasêlgu kit tau hi.

⁹Tichun, a hung kiho ua, “I thilbawl uh hi a dik puai. Tu’ni hi chanchinpha tun ni ahi; thipbek ah jingkal khawvak I ngak ua chun, a maw chang ding I hiu; ziaziakchun, chia hitiu in, lengpa In ah mite vahil hitiu,” a kitiu a.

¹⁰Tichun, a hung ua khawpi kotpi ngâkte a ko ua, a kiang un, “Aram mite kikulna’n ka vachiau in, himaleh zia chun kuama mu ding leh husa het ding a um ta puau hi; sakol kihênte, sabiltung kihênte, chuleh, puanbûkte a um ngai ngai ua um tilo ngal chu bangma mu ding a um ta puai,” a tiu a.

¹¹Tichun, khawpi kot ngâkte chun, lengpa In ah mite kodok in, a hilsawn tau a.

¹²Jan in lengpa chu a tho ah, a suakte kiang in, “Aram mite’n ei uh siatna ding ah a thil guanggal uh chu hun hil ing ka. I gilkial ui ti a hiauah; tichun a kikulnau chu nusia’n mun dang in a kisêl ua, ‘Khawpi ah kipat a hung pawt daw phat ua leh a la hingmat hitiu in, khawpi ah lut hitiu,’ ti’ a guanggal uh ahi,” a tia.

¹³A suakte lak ah pakhat chun, “Sakol um nalai pangate kha mi bang zat a hem in pui uh hen la; zia kinusiate hile Israel mangthaita te chung ah thil tung chu hun tuak têi ding ahi ngal un; amau chu vasawl inla vahechian uh hen,” a tia.

¹⁴Tichun, sakol chungchuang mi pani a hun pui ua, amau chu lengpa’n Aram sepaite vadelsak ding a gua, a kiang un, “Chiau inla vakan chian un,” a tia.

¹⁵Tichun, Jordan lui tiang hial a vadel ua; lampi chun Aram mite’n a kinaw tâkluat ziak ua a nutsiau kivanna puante leh van matchâkte kithe’thâng zeng zung chu a muu a. Tichun, thupawte chu a hung kile’kit ua lengpa a hil tau hi.

¹⁶Ziaphatchun, mipite chu a chiau ah, Aram mite kikulna chu a phejak tau a. Tichun, LALPA thu dungzui in, changbuang a te’na dim khat chu shekel khat ah, barli bu le a te’na dim ni chu shekel khat ah zawk ahi tai.

¹⁷Ziaphatchun, lengpa’n a matchâk pen sepai hotu kha kul kotpi enkol in a la pansak ah; Pathian mi kiang ah lengpa a vachia suk lai ah a la gen gual ngei ah khan, ama chu mipi’n kotpi bul in a la chuan chil ua, a thi tai.

¹⁸Pathian mi’n lengpa kiang ah, “Jing leh tu’hun ding vêl ah hin Samaria kotpi ah barli a te’na dim ni chu shekel khat ah, chuleh, changbuang chu a te’na dim khat ah shekel khat ah kizuak ding ahi,” a la ti tâk kha a ginchâk lo ziakin,

¹⁹sepai hotu chun Pathian mi kiang ah, “LALPA‘n van laizawl ah khin tukvante siam leh le, zia tawh bang thil chu tung thei ding a hem?” ti’n a la dawnhu a. Chuleh, ama’nle, “Zia chu la mit ngei in mu’n la tin, himaleh, nepha lo ding la hi,” a la ti gual ngei khan a hung guitung tai.

²⁰A chung in a hung guitung ngei ta’n; mipite chun kotpi bul ah chun a chuan lum tau hi.