Read Vaiphei 2 LENGTE 8 Bible Online

2 LENGTE 8 - Vaiphei bible

2 LENGTE 8

¹Tichun, Elisha’n a chapa thisa a kaithaw kit numei kiang ah khan, “Kipan inla, la In sung mite tawh chiau inla, la chêntheina na un va chêng un; LALPA‘n kial tunsak ding a hita ngal ah, zia gam ah hin kum sagi kial hung tung ding ahi,” ti’n a gen tai.

²Tichun, numei chu a kipan ah, Pathian mi thugen dungzui ah chun a bawl ta’n; a Insung mite tawh a chiau ah Phillistinte gam ah kum sagi a vachêng tau hi.

³Kum sagi chu a tawp phatin, numei chu Philistinte gam ah kipat a hung kile’kit phat ah, a In leh a gam, lengpa kiang ah vadon dingin a chia tai.

⁴Zia hun ah chun, lengpa chu Pathian mi suakpa Gehazi tawh a la kiholim lai tak uh ahi’n, a kiang in, “Elisha thilbawl thupite zosia chu ei hil in,” a tia.

⁵Elisha’n mithisa a kaithaw kit dan lengpa kiang ah a gen lai tak in, a chapa thisa a kaithaw piak numeinu chun, lengpa kiang in a In leh gam a hung don ta’n. Gehazi chun, “Ka lalpa lengpa, numeinu chu zia hi ahi, chun Elishan a kaithaw kit a chapa chu zia hi ahi,” a tia.

⁶Lengpa’n numeinu chu a dot ziakin amanu chunle a gen chian tai. Tichun lengpa chun amanu â dingin hotu khat a guat ah, a kiang in, “Ama neisa taphot leh, gam a nutsia ni kipat a lou ah piangte man zosia pedok kit un,” a tia.

⁷Aram Lengpa Ben-hadad damlo lai tak in Elisha chu Damaska ah a vachia ah. A kiang in, “Pathian mi kha zia hin a hung hi,” ti a hil phat un,

⁸lengpa chun Hazael kiang in, “Thilpiak chawi inla, Pathian mi chu lamtua dingin vachia in. Zia damlona kipat hin ka damdok kit diam ti ama chu LALPA dotsak in,” a tia.

⁹Tichun, Hazael chun thilpiak, Damaska van chikim, sangawngsau sawmli puakkhop sêt a keng ah, ama kimupi dingin a chia tai. A lut ah, a ma-âng in, “La chapa Aram ah Lengpa Ben-hadad in, ‘Zia ka damlo’na kipat hin ka damdok kit diam? ti vadong in,’ tia ei sawl ka hi,” a tia.

¹⁰Elisha chunle a kiang in, “Chia inla, ‘Damdok kit ngei ding la hi,’ va ti’n; ahi’n vang thi ngei ding a hi’dan LALPA‘n ei hetsak hi,” a tia.

¹¹Ama chun a en zing ah, zakcha hial in a ensâl ziang ta’n. Tichun, Pathian mi chu a hung kap tai.

¹²Hazael chun, “Ka lalpa chu bangziak ah kap la hem?” a tia. Ama chun, “Israel mite chung ah la thil phalo hun bawl ding chu ka het ziakin ahi; nang in a kulpiteu chu mei in hun hâl in la tin, a tangvalteu chu chemjam ah that in, a naupangteu chu hun sât tel in, chuleh, a numei nauvop laiteu chu hun philjak ding la hi,” ti’n a dawnhu a.

¹³Hazael chun, “La suak, uicha bep hi bang ka hia hem, zia thil lopi tak chu ka hun bawl ding?” a tia. Elisha in a dawnhu a, “Aram ah leng la hung hi ding LALPA‘n ei musaksa ahi,” ti’n a dawnhu a.

¹⁴Elisha chu a nusia ah, a hotupa Ben-hadad kiang in a chia ta’n, ama chun, “Elisha in la kiang ah bang a gen em?” ti’n a la dong ah. Ama chun a dawnhu a, “Hung damdok ngei ding la hi, ti’n ei hil hi,” a tia.

¹⁵Himaleh, a jing ah chun puanpha chu a la, tui ah a diatop ah, lengpa mai chu a tuam piakah, a thi tai. Tichun, Hazael chu a thasâng in a hung pang tai.

¹⁶Israel ah Ahab chapa Joram Leng ahi a kum nga’na chun, Judai gam ah Lengpa Jehoshaphat chapa Jehoram chu leng in a pang pan a.

¹⁷Ama chu zia hun ah chun kum sawmthum leh ni ah upa ahi’n, chun Jerusalem ah kum giat vaihawm in a pang hi.

¹⁸Ahab Inkuante bawl gual in, Israel ah lengte lampi a zuiah, Ahab chanu chu ji’n a nei nalai sêt hi. LALPA mit mu ah thil phalo chu a bawl tai.

¹⁹Himaleh, LALPA‘n a suak David zal in, Judai gam chu a sumangthai nuam puai, ama leh a pu leh pate kiang ah kumkhua dingah thaumei pakhat pia zing ding ah a la kitiamsa ahi ngal a.

²⁰Ama hun lai in Edom chu Judai gam ah vaihawmna doilo in a hel ta’n, amau leng ding a kitundaw tau a.

²¹Joram chun a kângtalai zosia tawh Zair a gâlkâi ah. Jan in a kuandok ah, ama hun ûm kîmvêl Edom mite tawh a kângtalai hotuteu chu a do ta’n; himaleh a sepaite chu In lam in a la jam mang tau hi.

²²Tichun, Edom chu Judai gam ah vaihawmna doilo in tu’ni tiang hin a hel den tau hi. Zia hun tawh kituak ah chun Libnah le a hung hel hi.

²³Joram nasep dangte, a thil hi zosia, ziate chu Judah Lengte Chanchin Lekhabu ah a kizik ta hilo a hem?

²⁴Tichun, Joram chu a pu leh pate kiang in a ipmu ta’n, amau kiang ah David khawpi chun a vui tau hi; a chapa Ahaziah chu leng in a hung pang tai.

²⁵Israel ah Ahab chapa Joram Leng ahi a kum sawm leh ni’na chun, Judai gam ah Lengpa Jehoram chapa Ahaziah chu leng in a hung pang pan a.

²⁶Ahaziah chu leng a hung hi in kum sawmni leh ni ah upa ahi’n; Jerusalem ah kum khat leng in a pang hi. A nu chu Israel ah Lengpa Omri tunu Athaliah ahi.

²⁷Ama’nle Ahab Inkuante lampi a zuiah, Ahab Inkuan bawl gual in, LALPA mit mu ah thil phalo chu a bawl hi; ama chu Ahab Inkuante mâkpa le ahi ngal a.

²⁸Ama tawh Ahab chapa Joram chu Ramoth-gilead ah Aram Lengpa Hazael do dingin a kuan to ua, zia chun Aram mite’n Joram a la hi’liam tau a.

²⁹Lengpa Joram chu Aram ah Lengpa Hazael tawh a kido lai un, Aram mite’n Ramah ah a sukliamnau be chu hi’dam dingin Jezreel ah a kilêkit a. Judai gam ah Jehoram chapa, Lengpa Ahaziah chu Jezreel ah Ahab chapa Joram a liam tak ziakin, a ve dingin a chia suk tai.