Read Vaiphei 2 LENGTE 9 Bible Online

2 LENGTE 9 - Vaiphei bible

2 LENGTE 9

¹Jawlnei Elisha chun jawlneite pawl khat lak ah mi pakhat chu a ko ah, a kiang in, “La kawng gâk det in; zia sathaubûk hi chawi inla, Ramoth-gilead ah vachia in.

²La vatun phat leh, Nimshi chapa, Jehoshaphat chapa Jehu hawldok inla; lut inla, a lawite lak ah kipat puidok inla, pindan sungnung khat ah puilût inla;

³sathau bûk chu la’n la, a luchung in buak in la tin, ‘LALPA‘n zia gual hin a gen hi: Israel chungah leng hiding ah sathau ka nu’ la hi,’ ti’n la. Ziazaw chuleh kotkhak hawng inla jam in; khawdâng hial kin,” a tia.

⁴Tichun tangval pakhat, jawlnei tangval chu, Ramoth-gilead ah a chia tai.

⁵Sepai hotute’n vaihawmna a nei lai tak un a tung ah, ama chun, “Nang, hotupa â ding thuvaithak ka hun puai,” ti’n a puang ta’n. Jehu chun, “Ka lak ua kua pen â ding hi em?” ti’n a dong a. “Hotupa, Nang â ding ahi,” a tia.

⁶Tichun Jehu a ding ah sunglam in a valut ah; tangval chun a luchung ah sathau a sung ta’n, “LALPA, Israel Pathian in zia gual hin a gen hi: LALPA mipi, Israelte chung ah leng dingin sathau ka nu’ la hi.

⁷Nang in la hotupa Ahab Inkuan chu jep jak in la tin, tichun, ka suak jawlneite thisan tawh, LALPA suakte zosia thisan phuba Jezebel chung ah la ding ka hi.

⁸Ahab Inkuan pumpi chu mangthai ding ahi; Ahab ah kipat pawsal taphot, suak leh suak lo hitaleule, Israel ah kipat sumangthai ding ka hi.

⁹Ahab Inkuan chu Nebat chapa Jeroboam Inkuan gual in leh, Ahijah chapa Baasah Inkuan gual in hun bawl ding ka hi.

¹⁰Jezebel chu Jezreel khua kûl kotbul in uichate’n a sa hun ne’n tiu in, kuama’n vui pua’n au,” ti’n a gen a. Tichun kotkhak chu a hongah a jam mang tai.

¹¹Jehu chu a LALPA hotute kiang ah a hung kit phatin, a kiang in, “Bangkim a pha nai maw? Bangziak ah, zia mingolpa kha la kiangah hung a hem?” a la tiu ah. Ama’n a kiang un, “Amau tawhbang haw kha la hiatsau ahi, a dangnâl uh tawh,” ti’n a dawnhu a.

¹²Amau chun, “Milepchia pa! Ei gen ziang in!” a tiu a. Tichun ama’n, “Ei gen piak chu zia hi ahi: ‘LALPA‘n zia gual hin a gen hi, Israel chung ah leng hiding in sathau ka nu’ la hi,’ ti a gen hi,” a tia.

¹³Kin tak in a leng un a puansilteu chu a lau ah a chiana dingin kalbite ah chun a pha tau ah; chuleh, pengkul a mut ua, “Jehu leng ahi,” ti’n tâng a sam tau hi.

¹⁴Zia gual ah chun Nimshi chapa, Jehoshaphat chapa Jehu chun Joram kãl in thu a vaisawmgu tai. Joram chu Israelte zosia tawh Ramoth-gilead ah Aram Lengpa Hazael hung ding vêngah a la um zing ahi’n,

¹⁵himaleh, Lengpa Joram chu Aram lengpa Hazael tawh a kido lai ua Aram mite’n a sukliamnau be chu sudam dingin Jezreel ah a la kile’kit ta’n. Tichun, Jehu in, “La lung lam uh a hinâk leh kuama’n khawpi ah kipat a la kilepdok in Jezreel ah chanchin hi vatut kiu hen,” a tia.

¹⁶Jehu chu a kângtalai ah chuang in Jezreel ah a vachia ta’n, zia’ chun Joram chu damlo in lupna ngâk in a um a. Judah Lengpa Ahaziah chu Joram ve’ dingin a hung suk tai.

¹⁷Jezreel ah chun gâlvêng Insâng chung ah ding pakhat chun, Jehu pawlte hung tun chu a mu guk phatin, “Mi pawl khat ka mui,” a tia. Joram chun, “Sakol ah chuang pakhat ko inla a lamtua ding in vasawl in, ‘A pha lam thu a hem?’ vatisak in,” a tia.

¹⁸Tichun, sakol ah chuangpa chu a kimupi dingin a chia ta’n; ama chun, “Lengpa’n zia gual hin a gen hi, ‘A pha lam thu a hem?’ ti’n,” a tia. Jehu in a dawnhu a, “Thil pha ding la dawiah a hem? Ka nung in hung um in,” a tia. Gâlvêngpa chun, “Thupawpa kha a kiang uh a tung ta’n, himaleh a hung kit ta puai,” ti’n thu a tut tai.

¹⁹Chuleh, sakol ah chuang dang pakhat a sawl kit ah, ama chu a kiang un a hung a, “Lengpa’n zia gual hin a gen hi, ‘A pha lam thu a hem?’ ti in,” a tia. Jehu in a dawnhu a, “Thilpha lam la dawi ah a hem? Ka nung ah hung um in,” a tia.

²⁰Gâlvêngpa chun, “A kiang uh a tung tai, himaleh a hung kit ta puai. A kângtalai tawldan saw Nimshi chapa Jehu hileh a kilawm hi; miphok tawl gual in a tawl ngalah,” a tia.

²¹Joram chun, “Kiging un,” a tia. Tichun, a kângtalai chu a kiging sa’n a koi tau a. Israel ah Lengpa Joram tawh Judai gam ah Lengpa Ahaziah chu amau kângtalai gêl in a kipandok tau ah, Jehu lamtua dingin a chia tau hi; ama chu Jezreel mi Naboth gam ah chun a kimupi tau a.

²²Joram in Jehu a mu phât in, “Jehu, a pha lam thu a hem?” a tia. Ama chun, “La nu Jezebel ângkawmnate leh dawi leh kau biakte sutzop ahi laisia bang thil pha um thei ding a hem?” a tia.

²³Ziaphatchun, Joram chu a kihei kual ah a jam tai. Ahaziah kiang in, “Ahaziah, Kithepna ahi!” a ti malam a.

²⁴Jehu chun a theitawp in a thal chu a luai ah, Joram chu a îktâng a kap kha ta’n; tichun, thalchang chun a lungchang a sunthil ah; a kângtalai sung in a bok den tai.

²⁵Jehu in ama kithuapipa Bidkar kiang in, “Vapaidok inla, Jezreel mi Naboth huan ah chun vaseptha’n, a pa Ahab tawh sakol kângtalai ah I taikhawm lai ua, I siatna ding ngen uh a gen kha hezing in: LALPA‘n a chung ah thil tung ding a gensa him ahi:

²⁶‘LALPA chun, ja’ni ka la mu Naboth thisan thasâng leh a chate thisan thasâng dingin zia mun ngei ah hin dit ding ka hi, ti’n ka kihaksial hi,’ a ti kha. Ziaziakchun, tu’hin paidok inla, LALPA thu dungzui in, zia mun ngei ah hin pai in,” a tia.

²⁷Judai gam ah Lengpa Ahazia in zia chu a mu phât in, Beth-haggan lam zuan in a jam a. Jehu chun a del zui ah, “Ama le kâp lum un!” a tia. Ibleam kiang ah Gur kaltona mun ah chun a kângtalai chung in a kap kha tau a. Tichun, Megiddo lam in a jam ta’n, zia chun a thi tai.

²⁸A miliante’n kângtalai pakhat in Jerusalem ah a hun paw tung ua, David khawpi ah a pu leh pate thân in a vui tau hi.

²⁹Ahab chapa Joram vaihawm kum sawm leh khatna’n, Ahaziah in Judah chung in vai a la hawm pan hi.

³⁰Jehu chu Jezreel ah a hung phatin, Jezebel in a la he ta’n; a mit te chei ah, a sam te le hiatzawl in, tukvan ah chun a hung dakdok a.

³¹Jehu chu kêlkot ah a hung lut phatin, amanu chun, “thilpha lam thu a hem, Zimri, la hotupa thatpa?” a tia.

³²Tukvan lam chu a en to ah, “Kua a hem kei lam ah pang? Kua la um awm?” a tia. Mi kiget pani pathum a hung dakdok ua.

³³Ama chun, “Amanu chu hun sawn thau in,” a tia. Tichun, a hun sawn thauah; a thisan chu Inbâng leh sakolte chung in a kithe’nât suk ah, sakolte chun a hun childên tau hi.

³⁴Ama chu a lut ah, a ne’n a dawn tai; ama chun, “Zia numei hânsedawlnu kha va enthau inla, vavui un; leng chanu khat ahi ngal in,” a tia.

³⁵Himaleh, a vui dingah a chia phat un, amanu chu a lugu tawh a keng leh a khutpekte tilo ngal a la um ta puai.

³⁶A kiang ah a hung kit ua, a hung hil phat un, ama chun, “Zia hi LALPA thu, a suak Tishbi mi Elijah kiang ah a la gen, ‘Jezreel gam sung in Jezebel sa chu uichate’n ne ding a hiu;

³⁷Jezebel luang chu Jezreel gam sung, loulai ah ek denchek tawhbang hung hi’ntin, tichun, kuamacha’n, zia hi Jezebel ahi ti hethei pua’n au,’ a la ti kha ahi,” a tia.