Read Vaiphei 1 KHANGTHU 11 Bible Online

1 KHANGTHU 11 - Vaiphei bible

1 KHANGTHU 11

¹Ziaphatchun, Israelte zosia chu Hebron ah David kiang in a hung khawm tau ah, a kiang in, “Ngai in, keihaw hi la chipite ka hiu hi.

²Hun sawt tak a hita’n, Saul kha lengpa ahi lai ah kipat khan, nang hi Israelte sepai hotu lian in la la pang ta’n. LALPA la Pathian chun la kiang in: ‘Nang hi ka mipi Israelte enkoltu ding leh, ka mipi Israelte chung ah vaihawmtu ding chu la hi,’ a la ti’sa ahi,” a hung ti tau.

³Tichun, Israelte lak ah hotute zosia chu Hebron ah lengpa kiang in a hung tau ah, David inle Hebron ah chun LALPA hetpi in thuthung a siam tai. Chuleh, LALPA‘n Samuel kam ah thu a gen gual in, Israelte chung ah leng hiding in David chu sathau a nu’ tau hi.

⁴David tawh Israelte zosia chu a gam ah a la chêng Jebushte chênna khua Jebus, Jerusalem khua lam in a chia tau a.

⁵Jebus khua mite chun David kiang in, “Zia khua hi la hunglut lo ding ahi,” ti’n a la nang un, himaleh, David chun tu’hun ah David khawpi kiti Zion kulpi chu a lak piak tei tei a.

⁶David in, “Kuale Jebuste that masa pen chu a lal pen leh sepai hotu lian ah pansak ding ka hi,” ti’n a la gen a. Tichun, Zeruiah chapa Joab chu a kuan to masa pen in a pan ziakin a thunei pen in a pang tai.

⁷David chu kulpi sung ah chun a chêngden ta’n; ziaziakchun, David khawpi a kiti khawlaw ta’n ahi.

⁸Millo mun ah kipat in khawpi chu a kîmvêl in a siam ah, ama a ki-ûm khum ah; chuleh, Joab in khawpi sung chu a siampha suak tai.

⁹Sepai honte LALPA‘n a kithuapi ziakin, David chu a hat deu deu tai.

¹⁰Israelte chung thu ah LALPA thupiak gual ah David leng ah a pansakna ding thu; Israelte tawh pang khawm David sepai hangsante lak ah hotu, nasa tak ah lenggam tundinna ding ah ama a la panpite chu ziate hi a hiu.

¹¹Zia David sepai hangsante chu: Hakhmoni suan ah mi Jashobeam chu hotu pathumte lak ah a lianpen ahi’n; zia mipa hin khatvei thu in a cheicha’n mi za thum a that hi.

¹²Ama ban ah sepai hangsan pathumte lak ah pang chu Ahoh mi Dodo chapa Eleazar ahi.

¹³Ama hin Pas-dammim mun ah, Philistinte David do ding ah a hung kuan lai ua khan, David tawh a la pang khawm tau a. Zia hun ah chun loulai in Barli bu a dim in a la um in. Zia hun ah chun Israelte chu Philistinte âng ah chun a jamsia tau a,

¹⁴himaleh, ama chu David tawh a paniu in loulai ah chun a pang zing un; Philistinte chu nasa tak ah nang in a that gam tau a; tichun, LALPA‘n zaw’na nasa tak chu a pia tai.

¹⁵Rephaim phâijawl ah Philistinte a kikul lai unle sepai sawmthumte chung ah hotu lian pathumte chu Adullam kawlhawm ah David kiang ah chia dingin kawlsuang lakah chun a kuan suk un.

¹⁶Zia lai tak ah chun David chu kul sung in a um ah; Philistin sepaite chun Beth-lehem a ûm kîmvêl ui.

¹⁷David chun a duthusam a hun gen a: “Beth-lehem khua tuikul, kul kotkhak kiang ah tui kha ka dawn ding ah ei vakhai piak thei mi pakhat bêk um ta ma leh aw!” a hun tia.

¹⁸Mi Pathumte chun Philistinte giamun lak chu hawtheng in, Beth-lehem khawpi kul kotkhak kiang ah tuikul ah tui chu vathal in, David kiang in a hun pia tau a, himaleh, David in zia tui chu a dawn nuam pua’n; LALPA â dingin a buntha ta mai a,

¹⁹“Ka Pathian in zia tui chu dawn dingin ei phal puai. Zia mite thisan hi bang ti’n dawn thei ding ka hi em? Amau hinna phal khop hial ah ei va lak piak uh ahi ngâl a,” a ti ziakin a dawn puai. Zia gual ah chun a sepai hotu lian pathumte chunle a vabawl ui.

²⁰Zia lai ah chun, Joab suapipa Abishai chu sepai hotu lian sawmthumte lak ah chun a hotu lianpen in a pangah. A cheicha bep mang in a gâlte za thum hial a thalup ziakin, hotu lian pathumte sâng ah chun minthanna a la chang pha tai.

²¹Sawmthumte lak ah chun a minthang pen ziakin a hotu lianpen un a la pang ta’n; himaleh, Pathumte lak ah chun vang a pang pha puai.

²²Kabzeelte lak ah mihangsan Jehoiada chapa Benaiah chun thil lopi tak tak a la bawldok a; ama chun Moab mi Ariel chate pawsal pani chule a la that hi. Chuleh, vûk kiak lai in, kawkhûk khat ah a vachia leh sakeibaknei pakhat a vasikha, a that ziang hi.

²³Chuleh, Aigupta mi, milian tak, tong nga hial ah sâng pakhatle a la that a. Zia Aigupta mipa chun cheicha ngul tinbupi tia’ hial ah lian a chawi ah; himaleh, Benaiah chun a moltum bep pan in a delzui ah, Aigupta mipa cheicha chu lak piak in, zia cheicha ma ma chun a that ngâl tai.

²⁴Zia gual ah chu Jehoiada chapa Benaiah in a bawl ziakin, mi hat pathumte lak ah chun minthanna a nei tai.

²⁵Sepai hangsan sawmthumte lak ah chun minthang pen maleh, sepai hotu lian pathumte chu vang a tuk puai. Tichun, ama chu David in ama vengtu lak ah hotu dingin a pansak tai.

²⁶Sepai hotute chu ziate hi a hiu ah: Joab suapipa Asahel, Beth-lehem khua mi Dodo chapa Elhanan,

²⁷Harod ah Shammoth, Pelon mi Helez,

²⁸Tekoa khua Ikkesh chapa Ira, Anathoth khua Abiezer,

²⁹Hushath mi Sibbekai, Aho mi Ilai,

³⁰Netophah mi Maharai, Netophah khaw mi Baanah chapa Heled,

³¹Benjamin phung ah mi, Gibeah khaw mi Ribai chapa Ithai, Pirathon mi Benaiah,

³²Gaash phai ah Hurai, Arbath mi Abiel,

³³Baharum ah Azmaveth, Shaalbon ah Eliahba,

³⁴Gizon mi Hashem, Harari mi Shagee chapa Jonathan,

³⁵Harari mi Sakhar chapa Ahiam, Ur chapa Eliphal,

³⁶Mekerath mi Hephor, Pelon mi Ahijah,

³⁷Karmel ah Hezro, Ezbai chapa Naarai,

³⁸Nathan suapipa Joel, Hagri chapa Mibhar,

³⁹Ammon mi Zelek, Biroth ah Naharai, ama chu Zeruiah chapa Joab gâlvan pawpa ahi;

⁴⁰Ithri mi Ira, Ithri mi Gareb,

⁴¹Hit mi Uriah, Ahlai chapa Zabad,

⁴²Reuben phung ah mi Shiza chapa Adina, ama hi Reuben phung ah hotu a hin, ama zathuap mi sawmthumte le a hiu a;

⁴³Maakah chapa Hanan, Mithan mi Joshaphat,

⁴⁴Ashteroth mi Uzzia, Aroer mi Hotham chate Shama leh Jeiel,

⁴⁵Shimri chapa Jediael leh a suapipa Tiz mi Joha,

⁴⁶Mahav mi Eliel leh Elnaam chate Jeribai leh Joshaviah; chuleh, Moab mi Ithmah,

⁴⁷Mezoba mi Eliel, Obed leh Jaasiel a hiu hi.