Read Vaiphei 1 KHANGTHU 12 Bible Online

1 KHANGTHU 12 - Vaiphei bible

1 KHANGTHU 12

¹Kish chapa Saul ziak ah David chu zalen tak ah a vâkvel thei lo ziak ah, Ziklag khua a kikulkhup lai ah a kiang ah pang leh, a gâldo lai ah panpite lak ah sepai gâl hangsante lak ah mite chu a nuai ah te hi a hiu.

²Amau haw hi Benjamin phung ah mi, Saul chanaute leh thal kap thiam ah minthang, a vei leh chang ua thalpi hileh vaisuangse hileh, mangtheite ngen a hiu hi.

³A hotu lianpen chu Ahiezer ahi’n, a ban ah chun Joash ahi; a paniu in Gibeah ah Shemaah chate gêl gêl a hiu ah; chuleh, Azmaveth chate Jeziel leh Pelet a hiu ah; chun, Anathoth khua Berakah leh Jehu le a hiu;

⁴chuleh, gâlhat sawmthumte lak ah hotu leh sawmthumte lakah gâlhat ah minthang diak, Gibeon khua mi Ishmaiah; chuleh, Gederah khua Jeremiah, Jahaziel, Johanan leh Jozabad tawh,

⁵Haruph mi lakah Eluzai, Jerimoth, Bealiah, Shemariah leh Shephatiah tawh;

⁶Korahte lak ah Elkanah, Isshiah, Azarel, Joezer, leh Jashobeam tawh;

⁷Gedor khua Jehoram chate Joelah leh Zebadiah tawh a hiu hi.

⁸Chun, Gad phung ah mi khen khat, gâlhat leh gâlbawl dan thiam, phaw leh cheicha mang thiam, sakeibaknei mêlpu thei hialte leh tânggam ah sakêl haw tawhbang ah changangte haw, gamthip ah kawlhawm ah David kiang ah hung kipete chu:

⁹A hotu pen chu Ezer, a pani’na chu Obadiah, a pathumna chu Eliab,

¹⁰a pali’na chu Mishmannah, a pangana chu Jeremiah,

¹¹a pagukna chu Attai, a pasagi’na chu Eliel,

¹²a pagiatna chu Johanan, a pakuana chu Elzabad,

¹³A pasawmna chu Jeremiah, a sawm leh khatna chu Makhbannai a hiu hi.

¹⁴Zia Gad phung ah mite hi sepai hat leh hangsante lak ah hotu ngen a hiu ah; a lak ua a jawngkhal pente hile sepai za khat tuk a hiu in, a hat pente vang hi sepai sang khat tuk a hiu.

¹⁵Zia haw hin tha masa pen ah Jordan lui a kam lêt hial ah a lêt lai tak ah hung gâl kâi in, phâijang ah a la chêngsate sualam leh tumlam ah nawjakte kha a la hiu hi.

¹⁶Benjamin leh Judah phung ah mi khenkhat le David kisêlna kulpi lam ah chun a hung ua,

¹⁷amau lamtua dingin David a vachia ah, a kiang un, “Kei lamah pang ah, ei panpi ding ah hung la hiu leh, ka lungthim zosia’n hun pom ziang ing ka tin; himaleh, ka mêlmate kiang ah ei zuak dingah hung la hiu leh vang, la chung un ka khut tha lo malengle, I pu leh pateu Pathian chun hun muchian hen la, vaihawm ta hen,” ti’n a gen a.

¹⁸Ziaphatchun, Sawmthumte lak ah hotu Amasai chu thagau in a hun thuam ah, zia gual hin a hun gen tai: “Aw David, nang â ka hiu hi; Aw Jesse chapa, nang lam ah pang ka hiu! La chung ah thamuanna, thamuanna tung ta hen la, nang hun panpite chung inle thamuanna tung ta hen! La Pathian chu a hun panpipa ahi ngâl a,” ti in.

¹⁹Saul do ding ah Philistinte tawh David a hang kuan lai ua chun, a lak ua Manasseh phung ah mite khenkhat chu David lam ah pang dingin a hung jamdok tau a. Philistinte hotute chun, “Amau hin a pu Saul lam ah hung pang intin, thi law bep kha’i tiu,” a ti ziak ua a la sawl mang him uh ahiziak in, ama hin Philistinte hi a la panpi tak tak man puai.

²⁰Ziklag lam zuan ah a kile’kit lai ah Manasseh te lak ah ama lam ah hung kipete chu ziate hi a hiu: Manasseh sepai sang khat chung ah hotu a la pangte Adnah, Jozabad, Jediael, Mikael, Jozabad, Elihu leh Zillethai a hiu.

²¹Amau hi sepai hotu lian leh gâlhat ngen a hiziak un, David hung bulu gaw pawlte chu do in a panpi tau a,

²²nisi’n in David lam ah pang ding mi a hung lut belap jel un, Pathian sepai gual ah tam a hung ting tau hi.

²³LALPA thupiak dungzui in, lenggam Saul khut ah kipat lakdaw ah um chu, David khut ah piak ding ahi ti ah Hebron khua David panpi ding ah hung khawm, sepai tam dan chu zia gual hi ahi:

²⁴Judah phung ah mi, phaw leh cheicha chawi sepaite zosia chu sang guk leh za giat a hiu a,

²⁵Simeon phung ah mi, sepai hangsan ngen chu sang sagi leh za khat a hiu hi.

²⁶Levi phung ah mite chu, sang li leh za guk a hiu ah,

²⁷Aron Inkuan ah hotu Jehoiada tawh pang khawm cheng chu sang thum leh za sagi a hiu hi.

²⁸Sepai hangsan, tangval Zadok leh amau Inkuan lak ah, hotu ngen sawmni leh pani a hiu hi.

²⁹Benjamin phung ah mi, Saul chanaute lak ah mi a tamzawte Saul â ding in ginum zaw nalai maleu, mi sang thum in David a zui tau hi.

³⁰Ephraim phung ah mi, sepai gâlhat leh hangsan ah minthang, amau Inkuan lak ah minthang chiat sîng ni leh za giat a hiu.

³¹Manasseh phung a kimkhatte lak ah, David leng ah siam ding ahi ti ah hung ding ah a min uh le genlat ah le a la um zo ta ngen sîng khat leh sang giat a hiu hi.

³²Issakhar phung ah mi, hunbî hethiam leh, Israelte’n bang a bawl ua pha a hem ti hethei mi ngen, hausa za ni leh amau thuzawsa ngen a chanauteu zosiau tawh a hiu.

³³Chuleh, Zebulun phung ah kipat in, gâldo dan thiamsa ngen leh gâlvan bukim mangtheisa ngen, lungthim thua bei ah David panpi gua ngen mi sîng nga le a hiu hi.

³⁴Naphtali phung ah sepai hotu sang khat tawh phaw leh cheicha chawisa ngen mi sîng thum leh sâng sagi a hiu a,

³⁵Dan phung ah sepai gâldo ziang dingsa kisazo ngen sîng ni, sâng giat leh za guk a hiu hi.

³⁶Aher phung ah sepai gâldo ziang dingsa kisa zo ngen sîng li a hiu a,

³⁷Reuben leh Gad leh Jordan gâl langkhat lam ah Manasseh phung kimkhat lak ah kipat in, gâlvan chikim mang thei ah kizil thiamsa ngen nuai khat leh sîng ni a hiu hi.

³⁸Zia sepai hangsante hi gâldo ding ah kisazosa’n, Israel zosia chung ah leng ah pang ding ah, lungthim thiangtho tak ah David tundin gua’n Hebron khua chun a hung tau ah; zia gual ma chun, Israel mipi dang zosia chule lung kigual tak ah David chu leng ah tundin gua’n a pang chiat tau hi.

³⁹A chanauteu in a nêk ding uh a la ngaitua piak zawsau ahiziak in, David kiang ah chun ni thum sung ne leh dawn in a um tau hi.

⁴⁰Chuleh, Israel gam ah kipakna nasa tak a um tak ziakin, a unauteu Issakhar tawh Zebulun tawh Naphtali lam pek ah kipat in, sa leh bu, theiga, grep ga, uain tawh sathau haw chu tam tak, sabiltungte, sangawngsaute, sakolte a hun puaksak un, bawngchal leh belamte natiang a hun tawl suk tau hi.