Read Vaiphei 1 KHANGTHU 13 Bible Online

1 KHANGTHU 13 - Vaiphei bible

1 KHANGTHU 13

¹David in a sepai sang khat chung ah thuneite, za khat chung ah thuneite leh hotu zosia chu a ngaidan uh a dong chiat a.

²Israel mipi kikhawm zosia kiang ah chun David in, “Nanghaw’n pha lasak ua, LALPA I Pathian unle lem ei sakpi lam ahi nâk chun, Israel gam ah um nalai, I chanauteu leh thiampute leh Levi mite zosia, khawpi huap sung ah gancha tatna nei ah chêng zosia chu, I kiang ua a hung khawm theina ding ua, va ko khawm dingin mi sawljak hitiu in.

³Ziaphat chuleh, I Pathian uh Thuthung Thingkuang chu kilak kit hitiu; zia chu Saul hun lai ah kipat khan I la limsak ta paw’ngal un,” ti’n a gen a.

⁴Zia a thugen chu mipi zosia lung lam tak ahiziak in, mipi kikhawm zosia chun a ti gual ah chu bawl dingin lem a sa tau hi.

⁵Tichun, David in Israel mipi zosia chu Aigupta gam ah Shihor ah kipat in Lebo-hamath tiang in a ko khawm ah, Kiriath-jearim ah kipat Pathian Thuthung thingkuang chu hung paw lut kit dingin a kisingsa tau hi.

⁶Chun, David tawh Israel mipi zosia chu Baa-lah, zia chu, Kiriath-jearim kiti, lam ah, Judai gam ah chun a chia to tau a; tichun, Pathian Thuthung thingkuang, Kiriath-jearim ah kipat chun, cherubte chung ah LALPA chutna chu pawdok dingin a kuan to tau,

⁷Pathian Thuthung thingkuang chu Abinadab In ah kipat chun bawng kângtalai thak pakhat in, Uzzah tawh Ahio in a tawldok ua.

⁸David tawh Israel mipi zosia chu La sa kawm in, lilute, tumgitte, vai khutbette, gawsemte tawh pengkulte mût in, a theitawp uh sua in Pathian âng ah chun a lâm tau ahi.

⁹Bawng kângtalai chu Khidon phual mun a hung tun phatin, bawngchalte chun a hung suklîng ziak un Uzzah chun Thuthung thingkuang chu a vak tu ta;

¹⁰LALPA lungnatna chu Uzzah chung in a hung kuangjak phut ta’n, Thuthung thingkuang a sukkhak ziak ah chun a that ta’n; zia tak ah chun Pathian âng in a thi dap del ziang tai.

¹¹Pathian in Uzzah chung ah a lungnatna a puansak ziakin David chu a lungna ma ma ah; ziaziakchun, zia mun chu tu’ni tiang hin Perez-Uzzah a ti tau hi.

¹²Zia ni chun David in Pathian a lau ma ma tak ziakin, “Pathian thuthung thingkuang hi bangti etkol ding ka hita diam?” a ti tai.

¹³Tichun, Pathian Thuthung thingkuang chu David Khawpi ah chun a etkol dingin a paw lut ziang ta pua’n; Git mi Obed-edom In ah chun a koi zaw tai.

¹⁴Pathian Thuthung thingkuang chu Obed-edom In ah tha thum sung a um ta’n; tichun, LALPA‘n Obed-edom Inkuante leh a thil nei zosia chu nasa tak in a maljawl tai.