Read Vaiphei 1 KHANGTHU 16 Bible Online

1 KHANGTHU 16 - Vaiphei bible

1 KHANGTHU 16

¹Pathian thuthung thingkuang chu, David in a koina ding ah puanbûk a bawl ah chun a paw lut tau a; Pathian kiang ah hâlmang kithoina tawh kichamna kithoinate chu a bawl tau hi.

²David in hâlmang kithoina leh kichamna kithoina a lat zaw phatin, LALPA min in mipite chu a maljawl a;

³numei hi’n pawsal hileh, Israel mipi zosia lak ah chun, kibang chiat in vaithum pei khat chiat, sabâk khat chiat leh grep-ho ah vaithum kisiam tangkhat chiat a hawm tai.

⁴Chuleh, Levite lak ah mi khenkhatte chu LALPA thuthung thingkuang enkol ding, kipak thu gen ding leh Israelte Pathian, LALPA pakcha ding in a guat chuam hi.

⁵A lak ua hotu lianpen dingin Asaph leh a kithuapi dingin Zekariah, Jeiel, Shemiramoth, Jehiel, Mattithiah, Eliab, Benaiah, Obed-edom leh Jeiel cheng chu gui sawm neite leh lilu enkol dingin a guat a; Asaph chu dakkhutbet bêng ding leh,

⁶thiampu Benaiah leh Jehaziel chu Pathian thuthung thingkuang kiang ah a hunbî dungzui zel ah pengkulte chu mût dingin a guat hi.

⁷Zia ni chun David in LALPA pâkna La sa dingin Asaph leh a chanaute chu a guat in a sak sak ngal tai.

⁸Aw LALPA kiang ah kipak thu gen in, a min thiangtho chu ko unla; nam tin lak ah a thil bawlte hiatsak tau in.

⁹Ama chawihoi in La sau inla, ama pâkna La sa’n, a thilmak bawl zosia gen vêl un.

¹⁰A min thiangtho chu suang unla, LALPA hawlte lungthim chu kipak ta hen.

¹¹LALPA leh a hatna hawl unla, a mêl hawl zing tau in.

¹²A thilbawl lamdang takte chu hezing unla, a thilmak bawlte leh a vaihawmna kamsuakte chu hezing un.

¹³Aw a suak Israel suante leh, a têlchuam Jakob chate haw.

¹⁴Ama chu LALPA I Pathian uh ahi’n, khawvel zosia ah vaihawmpa chu ahi.

¹⁵A thuthung chu kumkhua’n hezing unla, suan sang khat chan ah thu la piak,

¹⁶Abraham kiangah a thuthung leh, Isak kiang ah a thutiam chu,

¹⁷zia chu Jakob kiangah a thu guat a hi’det in, Israelte kiangah a kumtuang thuthung ding un a hidet ta’n;

¹⁸a kiang un: “Kanaan gam hi la kumkhaw gochan ding un hun pia’ng ka,” a tii.

¹⁹Mi tawmcha bep ahi lai un, hetkham lo ah tawm leh malzin mai ahi lai un,

²⁰nam chuam chuam leh lenggam chuam chuam ah kipat, mi chuam chuam lakah a um lai un,

²¹kuama’n a tawden uh a phal pua’n; amau ziakin lengte natiangle a vau in,

²²a kiang un, Ka sathaunu’te hi khoikha kiu in; ka jawlneite hile su’na kiu in, a la tii.

²³Lei chung lua zosiate haw, LALPA pâk in La sau inla; nisi’n in a hukdamna thu puang un.

²⁴Nam tin lak ah a lopina leh, mi tin lak ah a thil lamdang bawlte chu, puangjak tau in.

²⁵LALPA chu a lopi ma ma ziakin, nasa tak ah pakchat ding ahi’n; pathian dang zosiate sâng ah ja zawk ding ahi.

²⁶Mite pathian haw zosia chu milim po ahi ngal ah, LALPA‘n vang vante khi a siam hi.

²⁷Ja’umna leh choihoina a ma’n a um in; a umna taphot ah hatna leh kipakna a um hi.

²⁸Aw chitin lakah sungkuan zosiate haw, LALPA chu bêl unla, LALPA kiang ah lopina leh hatna piau in.

²⁹LALPA min in lopina a kiang ah piau inla, thillat dingte chawi in, a kiang ah hung tau in. Thiangtho chungchuang in LALPA chu biau inla;

³⁰lei chung ah mi zosiate haw, a ma-âng ah chun kithing tau in. Khawvel hi dettak in a phudet ah; bangmatik in suklîng hipua’n a.

³¹Vante khi lim uh hen la, lei hile kipak hen la; chuleh, namtin kiang in, “LALPA chu Leng ahi,” ti tau hen.

³²Tuisuagiat leh a sung lua dim zosiate chu, gi dul dul uh hen la, gamlak leh a sung ah um zosiate chu thanuam tak in um tau hen.

³³Lei chung vaihawm ding ah a hung phat leh, 7 gammâng thing zosia’n LALPA âng in, kipak in La sa tau hen.

³⁴LALPA chu a pha ngal ah, a kiang ah kipak thu gen un; a ngilneina’n kumtuang a dai hi.

³⁵“Chuleh, a kiang in zia gual hin gen un: Aw, ka hukdamnau Pathian, ei hukdok inla, namtin lak ah kipat ei hukdok in ei pui khawm in; chutileh, la min thiangtho hi pakcha thei ing ka tiu in, nangma choihoina chu kisuanpi thei tâng kau.

³⁶Israelte Pathian, LALPA ngei chu, tu leh kumtuang in maljawl in umzing ziang ta hen,” ti in.

³⁷Nisi’n ah a poimaw dungzui zel ah Pathian hona nasem ah pang den ta ding in, Asaph leh a bête chu LALPA thuthung thingkuang âng ah chun David in a nusia ta’n,

³⁸chuleh, Obed-edom tawh a chanaute mi sawmguk leh pagiatte chule a pang un; Jedutham chapa Obed-edom tawh Hasah chu kotkhak vêng ah pang dingah guat a hiu.

³⁹Chun, Gibeon khua LALPA biakbûk ah Pathian ho’na mun ah mawpaw dingin, thiampu Zadok tawh a chanauteu chu nutsia in a um un,

⁴⁰amau chun Israelte kiangah LALPA‘n dan thu zikdaw ah a la piak dungzui ah, jing leh nitâk si’n ah hâlmang thillat mâichâm ah LALPA kiang ah hâlmang thillat a lat zing ding uh ahi.

⁴¹LALPA ngilneina leh hepina’n kumtuang a dai ziak ah, a kiangah kipakna thu gen zing ding ah Heman, Jeduthun, leh midang a min uh taklat ah umte cheng chu guat a hiu hi.

⁴²Heman tawh Jeduthun chun La thiangtho haw chu a saknau ah a matchâk ding un, pengkulte leh dakkhutbette chule a nei ui. Kotpi veng dingin Jeduthun chate chu a guat ui.

⁴³Ziaphatchun, mipi zosia’n a In lam chiat uh a zuan tau ah, David le a chanaute maljawlna pia ding in a In lam ah a chia tai.