Read Vaiphei 1 KHANGTHU 17 Bible Online

1 KHANGTHU 17 - Vaiphei bible

1 KHANGTHU 17

¹David chu ama In ah a chên lut phatin, David in jawlnei Nathan kiang in, “Keima sidar thing Insung in ka chêng ah, LALPA Thuthung thingkuang chu lah puanbûk mai mai in a um hen,” ti’n a gen a,

²Nathan in David kiang ah chun, “Pathian in a hun umpi ngâl ah, la lungthim ah um gual gual chun bawl ziang ta’n la,” ti’n a dawnhu tai.

³Himaleh, zia jan ma ma ah chun LALPA‘n Nathan kiang in:

⁴“Chia inla, ka suak David kiang ah zia gual hin vagen in, a hun ti’n: LALPA‘n zia gual hin a gen hi: Ka chênna ding In nang in ei sak piak lo ding la hi.

⁵Israelte ka puidaw ni kipat tu’ni tiang hin In ah chêng ngai lo in, puanbûk leh biakbûk ngen in ka la chêng zing hi.

⁶Israelte lak ah ka chiana lam lam ah le, Israelte lak ah vaihawmte leh ka mipite pui huai ding ah ka sawlte kuama kiang inle, ‘Bang ding ah sidar thing ah In ei sak piak lo la hi em?’ ka la ti kha him him puai.

⁷Ziaziakchun, tu’hin ka suak David kiang ah chia inla, a kiangah zia gual hin vagen in: Sepai honte LALPA chun zia gual hin a gen hi: Nangma hi gancha tatna mun ah la belam chinna kipat in, ka mipi Israelte chung ah vaihawm dingah ka hun lakdaw la hi’n;

⁸la chiana lam lam in ka hun umpi pek ah, la âng ah la mêlmate zosia ka tha gam piak pek in; chuleh, khawvel ah mi minthang te lak ah la min chu pakhat hisak ding ka hi.

⁹Ka mipi Israelte â ding mun ka guat piak ah a chên det tak uh leh, tu’ma gual ah khan thil phalo bawlte’n subuai in tawden ta pua’n au.

¹⁰Tichun, ka mipi Israelte chung ah vaihawm ding ka koi ah kipat in, la gâlteu zosia hun zo dim dem ding ka hi tai. Zia bep chule hilo in, LALPA‘n nang a dingin In hun sak piak ding ahi tile ka hun hil hi.

¹¹La pu leh pate kiang ah la chiana ding ni a tin phat leh, nangma hun tungding ing ka tin, la chate lak ah pakhat chun la gamngâk in tin, lenggam sukdet piak ding ka hi.

¹²Ama chun, ka In ding ei sak piak intin, a lalchutpha chu kumtuang dai dingin sudet ngei ding ka hi.

¹³Ama â dingin a pa hi’ng ka tin, ama chule kei a dingin ka chapa hi’n ah. Chuleh, la masang ah Saul ah kipat ka ngilneina ka lakdaw gual ah khan, ama ah kipat in vang ladok ta pua’ng ka tin,

¹⁴ahi’n la, ka In leh ka lenggam ah chun kumtuang in chên detsak ing ka tin, chuleh, a lalchutpha chule kumtuang dai dingin phudet ding ka hi,” ti in.

¹⁵Tichun, Nathan in zia a thil mu leh a het dungzui ah chun David kiang in a vahil tai

¹⁶Ziaphatchun, Lengpa David chu biakbûk ah chun a lut ah, LALPA âng ah chun a kichu, “Aw LALPA Pathian, keima hi kua ka hia, ka Inkuan uh le kua ka hiu ah zia tiang tiang hi lei pui ahi em?

¹⁷Aw Pathian, zia hile nang a ding ah thil neucha ahi nalai hi. Aw LALPA ka Pathian, nang in milian tak gual in lei ngai nalai sêt a!

¹⁸Aleh, la suak hi la hechian ma ma ngâl a, la suak hi choisa’n ah a umna thu ah hin, David hin la kiang ah bang gen nalai ding a hem?

¹⁹Aw LALPA, la suak ziak leh la lung gual tak in zia tawhbang ah thil lopi takte hi bawl in, zia gual tuk ah nasa hi la hiatsak ta ahi.

²⁰Aw LALPA, ka bil ua ka het gual un, nangma tawhbang hi kuama a um pua’n, nangma lo’ngâl Pathian dang him himle a um puai.

²¹Aigupta gam ah kipat la tatdaw la mite ma-âng ah namdangte tawden ah, thil lopi tak leh lau um takte bawl ah, min thupi tak siam piak ding ah Pathian in ama mite hiding ah a hukdaw, la mi Israelte gual hi khawvel ah nam dang kua a um em?

²²Chuleh, la mipi Israelte hi kumtuang ah la mipi hiding in la la siam ta’n; chuleh, nangma chu aw LALPA, a Pathian uh la hi,” a ti tai.

²³Tu’hin aw LALPA, la suak chung thu leh a In sung thu ding la gen haw zosia hi kumtuang dai dingin sudet inla, la tiam dungzui in bawl ta’n.

²⁴Chutichun, “Sepai honte LALPA chu Israelte Pathian, Israelte â ding him ah Pathian ahi,” ti’n la min chu kumtuang ah hi’det in, chawihoi in um hen la; la suak David Inkuante chule la ma-âng ah hi’det in um tau hen.

²⁵Aw nang ka Pathian, la suak kiang ah hin Inkuan det hun bawl piak ing ka, ti’n la taklang ta’ngâl a; ziaziakchun, la suak hin la kiang ah ka hung pauchap ngam ta ahi.

²⁶Aw LALPA, tu’hin nang chu Pathian la hi’n, zia thilpha hi la suak kiang in la tiam ta’ngâl in;

²⁷ziaziakchun, la suak Inkuan hi kumtuang ah la kiang ah a um zing theina ding un, lungsiat tak in maljawl ta’n. Aw LALPA, nang in la maljawl tâk chu kumtuang ah maljawl in um tau hen, a ti tai.