Read Vaiphei 1 KHANGTHU 21 Bible Online

1 KHANGTHU 21 - Vaiphei bible

1 KHANGTHU 21

¹Israelte kilanpi dingin Setan a hung kipan ah, Israel mipi bulu dingin David a hun chokphûl ta’n.

²Tichun, David in Joab leh a sepai hotute kiang ah chun, “Chiau inla, Beer-sheba ah kipat Dan tiang ah Israel mi jat vasim unla, bang jat a hiu em ka hettheina dingin ei hung hil un,” ti’n a gen a,

³himaleh, Joab chun, “LALPA‘n a mipite chu a le za khat in hi’pung ta hen! Ka LALPA lengpa, a leng un ka LALPA suakte ngen hilo a hiu em? Bang ding ah ka LALPA‘n sim gua a hem? Bang ding ah Israelte chungah thiam mawna chuksak gua la hi em?” ti’n a dawnhu tai.

⁴Himaleh, lengpa chun Joab chu a nial zo ta’n, tichun, Joab chu a kuandok ah, Israelte zosia lakah chia zo in Jerusalem a hung tung kit tai.

⁵Joab in mipi zosia jat chu David a hil ah. Israelte lak ah chun gâldo ah pang thei cheng maktaduai khat leh nuai khat a um un; Judah nam lak ah chun gâldo ah pang thei zosia nuai li leh sîng sagi a ting ui.

⁶Himaleh, lengpa thupiak chu a doi lo ziakin, Joab chun Levi leh Benjamin phung ah mite chu a sim nuam puai.

⁷Zia thu ah hin Pathian a lung a awi ta pua’n, Israelte chu a gawt khawlaw tai.

⁸David in Pathian kiang in, “Zia thil ka la bawl ah hin la chungah ka sukhial nasa ma ma tai. Himaleh, tu’hin, ngolhuai tak ah thil ka la bawl tak ziakin, la suakpa sukkhialna hi ngaidam piak dingin ka hun don la hi,” ti’n a gen a;

⁹ziaphatchun, David in thiamgau ah a nei Gad kiang in, zia gual hin LALPA‘n a hun gen ta’i:

¹⁰“Chia inla, David kiang in, ‘LALPA‘n zia gual hin a gen hi,’ vati’n la: ‘Thil pathum lak ah pakhat pen pen la têl ding hun pia’ng ka tin; la têl pen chu la chung ah hun tunsak ding ka hi,’ a tii, ti’n vahil in,” a tia.

¹¹Tichun, Gad chu David kiang in a hung ah, a kiang in zia gual hin a gen tai: “Zia gual hin LALPA‘n a gen hi, ‘La dawi têl in:

¹²Kum thum sung kial ding a hem, mêlmate nuai ah tha thum um ah, mêlmate chemjam lakah khawsak ding tawh, ni thum sung LALPA chemjam, a gam ah natpi lensak ah, Israel gam sung zosia chu LALPA vansawlchâk in a sukchimit ding’. Tu’hin, ei sawlpa kiang ah ka gen kit theina dingin la têl chu ei hil in,” a ti tai.

¹³Ziaphatchun, David in Gad kiang ah chun, “Ka ngaitua thei ta puai; LALPA chu jaidawna nasa tak nei ahiziak in mihing khut ah kipiak sâng in, ama khut ah kipe lut mai ing ka,” ti’n a dawnhu tai.

¹⁴Tichun, Israelte lak ah LALPA‘n natpi a hun tunsak ta’n; Israelte lak ah mi sîng sagi a thi tau hi.

¹⁵Chuleh, Pathian in Jerusalem khua susia dingin vansawlchâk le a sawl ah; himaleh, a suksiat ding kuan in, LALPA‘n a chung ua siatna tung ding chu ngai ngam lo in a khut a juk kit ah, a susia ding vansawlchâk kiang ah chun, “Hun ta hen! Hai ta’n,” a ti tai. LALPA vansawlchâk chu Jebus mi Ornan buphual ah a din lai tak ahi.

¹⁶David in a et to leh, LALPA vansawlchâk Jerusalem lam zuan ah chemjam lâmsa, lei leh van kikâlah ding zing chu a mu ta’n. Ziaphatchun, David tawh a miliante chu saidip puan sil in, a maichang ua lei tual si’n a bokkhup tau hi.

¹⁷Chuleh, David in Pathian kiang in, “Mipite sim ding ah thupia kha keima hilo ka hia a hem? A gilo chu kei ka hi’n, a thil gilo bawl chu keima ka hi. Himaleh, zia belamte hin bang a hi’khial ua a hem? Aw LALPA ka Pathian, la khut chu keima leh ka Inkuante chung ah chu ta hen la, la mipite chung ah natpi tunsak kin!” ti’n a pauchap tai.

¹⁸Ziaphatchun, LALPA vansawlchâk chun Gad kiang ah chun, David in LALPA a ding ah mâichâm pakhat Jebus mi Ornan buphual ah chu a bawl ding ahi, ti a vahilsak a,

¹⁹tichun, LALPA min ah Gad thupiak chu mang in David a kuan to tai.

²⁰Ornan chu a vak kihei leh vansawlchâk chu a mu’n; a chapa palite chu lau ah a kisel kâl un Ornan in a phual ah chun gehu a khen zingah;

²¹Ornan lam zuan ah David chia chu Ornan in a vak mu pai ah, buphual ah kipat hung pawtdok ngâl in, a maichang ah lei tual si hial in David chu jana a hung pia tai.

²²Ornan kiang ah chun David in, “LALPA â ding ah mâichâm ka bawl ah, zia natpi hi mipite lak ah kipat a beitheina dingin, la phual mun hi ei pia’n la, a man ting in hun pena’ng ka,” ti’n a don tai.

²³Ziaphatchun, David kiangah chun Ornan in, “Kichan ziang in; ka lalpa Lengpa’n la bawl nop zosia bawlna’n mang ziang in; en in, hâlmang thillat dingin bawngchal leh buvokna molte hi a thing ah mat ding leh thâi thillat ding ah gehu haw hile ka hun pia ngâl hi. A leng in ka hun pia’i,” a tia.

²⁴Himaleh, Lengpa David in Ornan kiang ah chun, “Ahipuai; a man dik tak ka hun piak ding ahi. Nang neisa lak piak in LALPA kiang ah pia thei pua’ng ka tin, keima sênna pang lo in hâlmang thillat chule la’n thei pua’ng ka,” a ti tai.

²⁵Tichun, zia mun man dingah chun David in sana shekel za guk te’dok in Ornan a pia tai.

²⁶David in LALPA â dingin mâichâm pakhat a siam ah, zia tak ah chun hâlmang thillat leh kichamna thillatte chu lân in, LALPA a ko ah, ama’nle mâichâm chungah hâlmang thillat chu van ah kipat meikuang in a hun dawnhu tai.

²⁷Ziaphatchun, LALPA‘n vansawlchâk chu thu a hun pia’n, ama’nle a chemjam chu a pâi in a thun kit tai.

²⁸Ziaphatchun, David in LALPA‘n a hun dawnhu tai ti a het phat in, Jebus mi Ornan buphual ah chun kithoina a la’n tai.

²⁹Zia lai ah chun, Mosi’n gamthip ah LALPA biakbûk ding ah a la siam pen leh, hâlmang thilpiak latna mâichâm chu Gibeon khua thoimual ah chu um zing nalai ahi’n;

³⁰LALPA vansawlchâk chemjam chawi chu a lau ziakin, David chu Pathian dong dingin zia tak mun ah chun a vachia ziang ngam puai.