Read Vaiphei 1 KHANGTHU 22 Bible Online

1 KHANGTHU 22 - Vaiphei bible

1 KHANGTHU 22

¹Ziaphatchun, David in, “LALPA Pathian In ding leh Israelte hâlmang thillatna ding chu zia takah hin a um ding ahi,” a ti tai.

²Tichun, David in Israel gam ah gam dang mi umsate haw zosia chu a ko khawm a; Pathian In sakna ding ah suangsêk mite chu suang a sêk sak a.

³Chuleh, David in thikkil ding, kotkhak ding leh a zoptuana dingin thik leh sum-eng tam tak, te’sen lo khop in a lakhawm a.

⁴Chun, Sidonte leh Tura lam ah mite chun sidar thing tam tak le David kiang in a hun thak khawm ui.

⁵David chun, “Ka chapa Solomon la a naupang in khua a henai paw’ngâl ah, LALPA In ding chu a thupi thei pen, gam zosia ah gensim ah lopi ah sak ding ahiziak in, a van ding chu ka ngaitua ding ahi,” a ti’n, David chun a thi masang in a In van dingte chu a tam thei pen a guanggal tai.

⁶Ziaphatchun, David in a chapa Solomon chu a ko ah, Israelte Pathian, LALPA In sak piak dingin thu a pia tai.

⁷Solomon kiang in David in, “Ka chapa, LALPA ka Pathian min ah In sak piak ding ka la tup ahi’n,

⁸himaleh, LALPA‘n ka kiang in, ‘nang in thisan la sua tam talua’n, gâl le la do tam ta luai; ka mit mu in lei chung ah thisan la sua tam tâkluat ziakin, ka min ah In ding chu la sak lo ding ahi.

⁹Ngai in, chapa hun nei ding la hi; ama chun kicham dial dial in vaihawm intin, kiltin ah kipat a mêlmate tawh kichamsak ding ka hi; a min chule Solomon hi’ntin, ama dam sung in Israelte lak ah gâlmuanna leh thamuanna hun pia ding ka hi.

¹⁰Ama chun, ka min â dingin In chu ei sak piak ding ahi. Ama chu ka chapa hi’ntin, ama â dinginle pa hiding ka hi’n; chuleh, Israelte lakah a lenggam chule kumtuang dai dingin hi’det ding ka hi,’ a ti tai.

¹¹Tu’hin, nang ka chapa, nang chung thu ah a gen dungzui ah LALPA la Pathian In ding chu la sakdaw theina dingin LALPA‘n hun umpi zing ta hen.

¹²Israelte chung ah vaihawm ah a hun pansak phat leh, LALPA la Pathian dan chu la vopdet theina dingin, hiatthiamna leh lemhiatna chu hun pia ta hen.

¹³Israelte â ding ah, Mosi kiang ah LALPA thuguat leh dan leh mual a la piakte zosia phatakcha la vop chun, hung hampha ding la hi. Hat tak leh hangsan tak in um in. Lau kin la, lungthuai diak kin.

¹⁴Zia LALPA In sakna ding ah hin gim tak in, sana talent nuai khat tawh, dangka thik talent maktaduai khat tawh, sum-eng leh thik tam tak te’sen lo ka lakhawm in, kiningting ma ma ding ahi’n; chuleh, thing leh suang le ka lakhawm hi. Zia ban ah hinle la lak khawm be ding ahi.

¹⁵Nasêm dingle mi tam tak la nei hi: suang sek dingte, mi khutthiamte, suangkhuak thiamte, thingbawl dingte leh mi them thiam simsên lo khop ah tam,

¹⁶sanate, dangkate, sum-engte leh thik bawl dan chi chuam chuam ah thiamte le la nei hi. Tu’hin na chu sêm pan ngâl inla, LALPA‘n hun kithuapi ta hen,” ti’n a gen hi.

¹⁷David chun Israelte lakah hotute’n le a chapa Solomon panpi dingin a chial ah, a kiang un,

¹⁸“LALPA, la Pathian un a hun umpi hilo a hem? Kil tin ah kipat gâlmuanna a hun pia hilo a hem? A gam ah a la chêngsate hi ka khutah ei piak tak ziakin, a gam hi LALPA mit mu ah a mipite nuai ah koi ahi tai.

¹⁹Tu’hin, la lungthim leh ngaituanau chun LALPA la Pathian uh hawl tau in. Kipan unla, LALPA thuthung thingkuang tawh, Pathian ûm leh bêl thiangthote chu a In ah koikhawm hiding in, LALPA min in LALPA Pathian a ding ah mun thiangtho chu hun tungding tau in,” ti’n a gen tai.