Read Vaiphei 1 KHANGTHU 23 Bible Online

1 KHANGTHU 23 - Vaiphei bible

1 KHANGTHU 23

¹David chu a upat ah, a damsung nite a bukim phatin, a chapa Solomon chu Israelte chung ah leng ah pang dingin a koi tai.

²Israel miliante, thiampute leh Levite zosia chu David in a ko khawm a.

³Levite lak ah kum sawmthum chunglam mi zosia chu a sim ua leh, sîng thum leh sang giat a ting ui.

⁴David chun, “Ziate lak ah sîng ni leh sang lite chun LALPA In sakna mawpua’n tiu in, sang guk te chu hotu leh vaihawmtu ah a pan ding uh hi’ntin,

⁵sang lite chun kotkhak ngak intiu in, a dang sang li um nalaite chun matchâk ding ah ka guanggalte haw chu mang in, LALPA pâkna La sa a pan ding uh ahi,” ti’n a hil tai.

⁶Chun, David in Levi chate: Gershom, Kohath leh Merari chate chu a pawl pawl in a hawm gual hi.

⁷Gershom chate chu: Ladan tawh Shimei a hiu.

⁸Ladan chate lak ah a upa pen chu Jehiel ahi’n, a dangte chu Zetham tawh Joel, pathum a hiu.

⁹Shimei chate chu: Shelomoth, Haziel tawh Haran, pathum a hiu a. Zia cheng hi Ladan chate lakah hotute a hiu hi.

¹⁰Shimei chate chu: Jahath, Zina, Jeush tawh Beriah a hiu a. Ziate hi Shimei cha pawsal palite chu a hiu.

¹¹Jahath chu a upa pen ahi’n, Zizah a pani’na ahi’n, Jeush tawh Beriah hin vang chapa a nei tam lo ziak un, Inkuan pakhat gual ah sim a hiu hi.

¹²Kohath chate chu: Amram, Izhar, hebron tawh Uzziel, pali a hiu.

¹³Amram chate chu: Aron tawh Mosi a hiu a. Aron chu thilzek thiangtho pente la’n thiangtho ding ah guat a hita’n; ama leh a chate chu LALPA ma-âng ah thillân in pangden ta’n tiu in; zia nasep chu tawh LALPA min ah maljawlna thusap thua zing ta’n au.

¹⁴Pathian mi Mosi chu vang, a chate chu Levi Inkuan lakah simkhawm hita’n au.

¹⁵Mosi chate chu: Gershom leh Eliezer a hiu a,

¹⁶Gershom chate chu: a upa pen Shebuel ahi.

¹⁷Eliezer chate chu: a upa pen Rahabiah ahi’n; Eliezer in chapa dang a nei puai. Himaleh, Rahabiah chate chu tam tak a hiu.

¹⁸Izhar chate chu: a upa pen Shelomoth ahi.

¹⁹Hebron chate chu: A upa pen Jeriah, a zaw ah Amaziah, a pathumna chu Jahaziel, a pali’na Jakameam a hiu a,

²⁰Uzziel chate chu: a upa pen Mikah, a zom ah Isshiah a hiu hi.

²¹Merari chate chu: Mahli tawh Mushi a hiu. Mahli chate chu: Eleazar tawh Kish a hiu.

²²Eleazar in chapa nei lo in, chanu ngen a nei in a thi tai; a chanau uh Kish chate chun a chanute chu a kichenpiu hi.

²³Mushi chate chu: Mahli, Eder leh Jeremoth, pathum a hiu hi.

²⁴Ziate hi Levi chate, a pu leh pateu kisuan sawn dan dungzui ah, a Inkuan ua upa pen leh mimal min kisimna dungzui ah, LALPA In ah nasêm ding ah kumting, kum sawmni chung lam mi cheng chu a min uh khum a hiu.

²⁵David chun, “LALPA, Israelte Pathian chun mipite chawldamna a pia ta’n; chuleh, kumtuang in Jerusalem ah chun a chêng den tai.

²⁶Ziaziakchun, Levite chun biakbûk leh a matchâkte chu a puak tawl tawl uh a ngai ta puai,” a la ti tai.

²⁷David thu vaithâkna dungzui in, Levite Inkuan ah mi, kum sawmni chung lam mite chu zia zat hi ahi ngal un;

²⁸“Himaleh, a mawpuakna ding uh chu, Aron suan ah mite LALPA In ah sep leh bawl, biakbûk huang sung leh a pindante etkolna leh, thilzek zosia sukthianna leh Pathian In ah sep leh bawl zosia ah kithuapi ding leh;

²⁹vaithum tian leh an thillat ah mat ding chângbuang nêl pha tak bawl ah, thawipanglo vaithum siam, vaithum lat ding siam, thillat dingte sathau tawh hel ding leh a jat ding te’tuak te haw ah a kithuapi diu a hi.

³⁰Chuleh, jingkal si’n leh nitâk si’n ah LALPA pâkna La sa a vapan sek ding uh le ahi’n;

³¹LALPA âng ah a hunbî kiguat dungzui ah, sabbath ni leh tha thak ni leh kût nite hinle, a mi kiguat zat dungzui chiat ah chun, hâlmang thillatte ah chun a pan zing diu ahi.

³²Tichun, kikhopna biakbûk leh mun thiangtho ah chun Aron suante tawh, a chanaute chu tawh, LALPA In ah nasepna ding taphot ah chun maw a pua un, a pan zing ding uh ahi,” ti’n a gen tai.