Read Vaiphei 1 KHANGTHU 26 Bible Online

1 KHANGTHU 26 - Vaiphei bible

1 KHANGTHU 26

¹Kotkhak vêngtute mawpuakna kihop dan chu zia gual hi ahi: Korah Inkuan lak ah kipat chun Asaph phunggui ah mi Kore chapa Meshelemiah a pang a,

²Meshelemiah chate chu: A upa pen Zekariah, a pani’na Jediael, a pathumna Zebadiah, a pali’na Jathniel,

³a panga’na Elam, a pagukna Jehohanan, a pasagi’na Eliehoenai a hiu hi.

⁴Pathian in a maljawl ziakin Obed-edom chate chu: A upa pen Shemaiah, a pani’na Jehozabad, a pathumna Joah, a pali’na Sakhar, a pangana Nethanel,

⁵a pagukna Ammiel, a pasagi’na Issakhar leh a pagiatna Peullethai a hiu hi.

⁶Chuleh, a chapa Shemaiah inle a khang khang ah vaihawm ah pang ding chapa a nei ah, amau haw chu mi thilhithei tak ngen a hiu hi.

⁷Shemaiah chate chu: Othni, Rephael, Obed tawh Elzabad a hiu ah; chuleh, a suapiteu Elihu tawh Semakhiah chule mi gualchungchuang a hiu hi.

⁸Ziate sia hi Obed-edom suante lak ah mi a hiu ah, a chateu hin a suapiteu hitaleu a leng un nasep lam ah mi suan um tak ngen, Obed-edom Inkuan ah mi ngen sawmguk leh pani a hiu hi.

⁹Meshelemiah inle mi suan um tak tak chapa leh suapite sawm leh pagiat a nei hi.

¹⁰Merari suan ah Hosah inle chapa a nei ah: A lak ua mala thei pen chu Shimri (ama hi a upa pen hilomaleh, a pa’n a mala thei pen ah a mat ahi;)

¹¹a pani’na Hilkiah, a pathumna Tebaliah leh a pali’na Zekariah a hiu hi; tichun, Hosah suapite leh a chapateu chu sawm leh thum a hiu hi.

¹²Kotkhak vêng pawlte chunle, a chanau dangteu in LALPA ho’na In ah mawpuakna tum a nei chiat gual ua a septheina ding un, a puitu ding leh a mawpuakna dingteu chantum kihawm gual in na a sêm un;

¹³a kotkhak vênna dingteu chu a pateu Inkuan dungzui ah, a lian a neu in kigual tak ah a chan theina ding un âi a sân ua.

¹⁴Sualam kotpi ngak ding ah âi sânna chu Shelemiah chung in a kia’n. Chuleh, a chapa, mi lemguat thiam Zekariah chan ding âi a sân ua leh, mallam kotkhak a chang tai.

¹⁵Obed-edom chu simlam kotkhak a chang ah, a chate chu van koikhawmna In vênna a chang ui.

¹⁶Shuppim leh Hosah Inkuante chu tumlam kotkhak tawh chung lam ah kaltona lampi Shallekheth kotkhak lam a chang ua. Vêngtute chu a hunbî dungzui in a kithâk thawu hi.

¹⁷Sualam ah chun nisi’n leh Levite mi paguk a pangjel un, mallam ah chun nisi’n leh mi pali jel, simlam ah chun mi pali ma nisi’n in a pang un, vankoina In ah chun mi pani jel in a kithau a;

¹⁸Chuleh, tumlam pang ah khuam kitiang lamlian ah chun mi pali leh khuam kitiang lak in mi pani a pang ui.

¹⁹Ziate hi Korah chate leh Merari chate, kotkhak vêng ah pangte chan kihop dan chu ahi.

²⁰Chun, Levite lak ah Ahijah chu Pathian In ah thawlawm leh thilpiakte koikhawmnate enkol in a pangah,

²¹Gershon suante lak ah Ladan chate, Ladan suan leh pâkah kisim, Gershon mi Ladan Inkuan ah phung upat dan ah sui in, Jehieli ahi.

²²Jehieli chate Zetham tawh a suapipa Joel chu LALPA In ah thawlawm sum enkol in a pang ui.

²³Amram tawh Izhar tawh Hebron tawh Uzziel suante lak in:

²⁴Mosi tupa Gershom chapa Shebuel chu thawlawm enkolte lak ah hotu pen in a pang a,

²⁵a suapite chu: Eliezer ah kipat chun a chapa Rehabiah ahi’n, ama chapa chu Jeshaiah ahi’n, ama chapa chu Joram ahi’n, ama chapa chu Zikri ahi’n, ama chapa chu Shelomoth ahi.

²⁶Zia Shelomoth hi tawh a suapite chu, Lengpa David tawh, phung tin ah upate tawh, sepai sang khat chung ah leh za khat chung ah hotute leh, sepai lak ah hotu hi’na nei zosiate’n Pathian kiang ah a thillatteu chu enkoltu’n a pang ui.

²⁷Kido’na mun ah gâllâkte LALPA In ah matchâk ding ah thilpiak ah kilân te,

²⁸chuleh, thiamgau Samuel, Kish chapa Saul, Ner chapa Abner leh Zeruiah chapa Joab in Pathian kiang ah a lat thiantho zosiau chule Shelomoth leh a suapite’n a enkol ui.

²⁹Izhar suante lak ah chun, Khenamiah leh a chate chu Israel gam pawlam ah mawpua, hotu leh vaihawm ah pansak a hiu.

³⁰Hebron suante lak ah chun, Hashabiah tawh a suapi gual chungchuang ngen sang khat leh za sagi te chu, Jordan lui tumlam pang ah LALPA leh lengpa a ding ah Israelte nasêm haw enthatu’n a pang ui.

³¹Hebron suante lak ah Jerijah chu hotu’n a pang a. (David vaihawmna kum sawmli a tin in, Gilead gam ah Jazer khua chun Hebron suan ah mite lakah mi chungchuang leh matthei, bang jat a um diam ti hawlna, a Inkuan leh a phunggui uh suina a um a.)

³²Jerijah leh a suapite lak ah kipat in a pu leh pateu ah kipat a malâ a la pang to thei ngen, mi hangsan chungchuang sang ni leh za sagi a hun têldok un, amau chu Reubente, Gadte leh Manasseh nam kimkhatte chung ah Pathian lam leh lengpa kikâl ah thunei dingin, Lengpa David chun a guat tai.