Read Vaiphei 1 KHANGTHU 27 Bible Online

1 KHANGTHU 27 - Vaiphei bible

1 KHANGTHU 27

¹Kum tung ah thasin ah kithâk thaw ah Lengpa nasêm ding, hun khat thu ah sîng ni leh sang li jel ah pang dingin, Israel nam zosia sung ah mite chu, a phung chiat ua upate, sang khat chung ah hotute leh za khat chung ah hotute chu zia gual hin a chan ding uh hawm piak a hiu:

²Chan kihawmna lakah tha masapen ah mawpaw ding chu, Zabdiel chapa Jashobeam ahi’n; ama pawl ah chun mi sîng ni leh sang li a pang ui.

³Ama chu Perez suan ah mi leh a tha masa pen ah sepai lak ah hotu lianpen ahi.

⁴A tha ni’na, mawpaw ding lawi lak ah hotu lianpen chu, Dodai, Ahohit mi ahi; ama lawi lak ah Mikloth chu a puitu’n a pang ah; ama pawl ah chun mi sîng ni leh sang li a pang ui.

⁵A tha thumna, a pawl pathumna hotu chu, thiampu Jehoiada chapa Benaiah ahi; ama pawl ah chun mi sîng ni leh sang li a pang ui.

⁶Zia Benaiah hi Sawmthumte lak ah mihat ah minthang leh Sawmthumte chung ah hotupa chu a la hi’n; a chapa Ammizabad chu ama zathuap in a pang hi.

⁷A tha li’na, a pawl pali’na hotu chu, Joab suapi Asahel ahi’n, a chapa Zebadiah in a zathuap ah; ama pawl ah chun mi sîng ni leh sang li a pang ui.

⁸A tha nga’na, a pawl pangana hotu chu, Izrah mi Shamhuth ahi’n; ama pawl ah chun mi sîng ni leh sang li a pang ui.

⁹A tha gukna, a pawl pagukna hotu chu, Tekoa khaw mi Ikkesh chapa Ira ahi’n; ama pawl ah chun mi sîng ni leh sang li a pang ui.

¹⁰A tha sagi’na, a pawl pasagi’na hotu chu, Ephraim suan te lak ah Pelon Inkuan lak ah Helez ahi; ama pawl ah chun mi sîng ni leh sang li a pang ui.

¹¹A tha giatna, a pawl pagiatna hotu chu, Zerah khua Hushath Inkuan ah Sibbekai ahi; ama pawl ah chun mi sîng ni leh sang li a pang ui.

¹²A tha kua’na, a pawl pakuana hotu chu, Benjamin phung ah mi, Anathoth khaw mi Abiezer ahi; ama pawl ah chun mi sîng ni leh sang li a pang ui.

¹³A tha sawmna, a pawl sawmna hotu chu, Zerah suan ah mi Netophah khaw mi Maharai ahi; ama pawl ah chun mi sîng ni leh sang li a pang ui.

¹⁴A tha sawm leh khatna, a pawl sawm leh khatna hotu chu, Ephraim suante lak ah, Pirathon khaw mi Benaiah ahi; ama pawl ah chun mi sîng ni leh sang li a pang ui.

¹⁵A tha sawm leh ni’na, a pawl sawm leh ni’na hotu chu, Othniel suante lak ah Netophat khaw mi Heldai ahi; ama pawl ah chun mi sîng ni leh sang li a pang ui.

¹⁶Israel nam pumpi chung ah phung tin ah hotu a um chiat un: Reuben phung ah hotu lianpen chu Zikri chapa Eliezer ahi’n; Simeon phung ah hotu lianpen chu Maakah chapa Shephatiah ahi.

¹⁷Levi phung ah hotu lianpen chu Kemuel chapa Hashabiah ahi’n; Aron phung ah hotu lianpen chu Zadok ahi.

¹⁸Judah phung ah hotu lianpen chu David suapite lak ah pakhat Elihu ahi’n; Issakhar phung ah hotu lianpen chu Mikael chapa Omri ahi.

¹⁹Zebulun phung ah hotu lianpen chu Obadiah chapa Ishmaiah ahi’n; Naphtali phung ah hotu lianpen chu Azriel chapa Jerimoth ahi.

²⁰Ephraim phung ah hotu lianpen chu Azaziah chapa Hoshea ahi’n; Manasseh phung kimkhatte chung ah hotu lianpen chu Pedaiah chapa Joel ahi.

²¹Gilead gam ah Manasseh phung kimkhatte chung ah hotu lianpen chu Zekhariah chapa Iddo ahi’n; Benjamin phung ah hotu lianpen chu Abner chapa Jaasiel ahi.

²²Dan phung ah hotu lianpen chu Jeroham chapa Azarel ahi. Ziate hi Israel nam chung ah hotute chu a hiu hi.

²³LALPA‘n Israelte chu van ah aksi jat hial ah sukpun a guat ziakin, David in kum sawmni nuai lam mite chu a sim khawm puai.

²⁴Zeruiah chapa Joab in mipi chu sim a gua’n, himaleh, a sim suak zo puai; ahiziak in, zia chungchâng ah hin Israelte chung ah lungnatna a hung kuanjak tak ziakin, Lengpa Chanchin zikna lekhabu ah chun ziklut in a um ta puai.

²⁵Lengpa gothil chung ah chun Adiel chapa Azmaveth chu a thunei pen in a pang ah. A gam sung leh khawpite leh a Insungte ah gothil zosia chung ah thunei pen chu Uzziah chapa Jonathan ahi.

²⁶Lou nasêmte leh loukaite chung ah chu Khelab chapa Ezri chu hotu lianpen in a pang hi.

²⁷Grep huan enkolpa chung ah hotu lianpen chu Ramah khua Shimeia ahi. Uain ding ah grep sûkpawl chung ah hotu lian pen chu Shipham mi Zabdi ahi.

²⁸Shephalah gam ah Oliv leh theichang kungte enkol lak ah hotu lianpen chu Geder mi Baal-hanan ahi. Sathau koikhawmna lam ah hotu lianpen chu Joash ahi.

²⁹Sharon phâijawl ah ganchingte lak ah hotu lianpen chu Sharon khaw mi Shitrai ahi. Chuleh, phâijang mun dang dang ah ganchingte lak ah hotu lianpen chu Adlai chapa Shaphat ahi.

³⁰Sangawngsau chingte lak ah hotu lianpen chu, Ishmael mi Obil ahi. Sabiltungchingte lak ah hotu lian pen chu, Meronost mi Jehdeiah ahi. Belam leh kêlchingte lak ah hotu lianpen chu, Hagri mi Jaziz ahi.

³¹Ziate sia hi lengpa David nei thil enkol ah pangte chu a hiu hi.

³²David paneu Jonathan chu mi lem he, pil tak leh danthiam tak ahi ziakin lekha zikpa lemguat in a pang ah; Hakmoni chapa Jehiel chu lengpa chate enkol in a pang hi.

³³Ahithophel chu lengpa lemguat piak in a pang ah; Arka mi Hushai chu lengpa gual pha ahi.

³⁴Ahithophel nung ah chun Benaiah chapa Jehoiada tawh Abiathar a kithuau ah. Joab chu lengpa sepaite lak ah hotu lianpen in a pang hi.