Read Vaiphei 1 KHANGTHU 28 Bible Online

1 KHANGTHU 28 - Vaiphei bible

1 KHANGTHU 28

¹Israel gam vaihawmte zosia tawh, phung tin ah vaihawmte zosia tawh, lengpa nasêm ding ah a pawl pawl ah kisiamte chung ah hotute zosia tawh, sepai a sang têl chung ah hotute tawh, sepai a za têl chung ah hotute tawh, lengpa leh a chate go thil leh gan-gual zosia chung ah mawpawte zosia tawh, leng Inpi sung ah milian leh lalte tawh, gâlhangsante tawh, sepai hat zosia chu Jerusalem khua hung khawm dingin David in a ko khawm tai.

²Ziaphatchun, Lengpa David chu a hung dingdok ah, a kiang un zia gual hin thu a hun gen a: “Ka suapi, ka mipite haw a la ngai un. I Pathian un a keng a ngakna ding ah LALPA thuthunna thingkuang kicholdamna ding In pakhat sak ding ka la guanggal in; ziaziakchun, a In van dingte chule ka la lakhawm tai,” a tia.

³Himaleh, Pathian in ka kiang in, “Nang hi gâldo mi leh thisan tam tak sua mi la hiziak in, ka min ding ah In la sak lo ding ahi,” ei la ti tai.

⁴Ahi’n la, Israelte LALPA Pathian chun, ka pu leh pate Inkuan zosia lak ah kipat in, kumtuang ah Israelte chung ah leng hiding in ei la têl ta’n; ama chun Judah phung lak ah chunle ka pa Inkuan a têlchuam ah, ka pa Inkuan lak inle Israelte zosia chung ah leng hi dingin a chate zosia lak in keima ei têlchuam kit nalai hi.

⁵LALPA‘n chapa tam tak ei piakte lak in, LALPA lenggam ah Israelte chung ah lalchutpha kichu dingin Solomon chu a têl in.

⁶Ka kiang in zia gual hin a gen a: “Ka In ding leh a huang sung ding siam ding ah ka guat chu la chapa Solomon hi ahi; ama hi ka chapa hiding leh a pa ka hi’na dingin ka têl ta’ngâl in.

⁷Tu’ni hun ah ka thupiakte leh ka dan thuguatte a vopdet gual ah a vopdet zing nâk ahi chun, a lenggam chu kumtuang dai dingin tungding ding ka hi,” ti in.

⁸Ziaziakchun, tu’hin, Israel mipi zosia leh, LALPA mipite leh I Pathian un a het ngei ah hin, LALPA la Pathian uh thupiakte chu gunchu tak in en un la hawl un; chutileh, zia gam pha tak hi lua in la tiu in, la nung ua la chateu in a kumkhaw go dingin nutsia piak ding la hiu.

⁹Chuleh, nang ka chapa Solomon, la pa Pathian chu hezing inla, thanuam tak leh lunglut tak in a na chu sêm in; LALPA chun ngaituana zosia a patep sek in, thiltup leh ngaituana zosia le a hechian ma ma ngâl ah. Ama chu la hawl ahi chun, hun kimusak ding ahi’n; la nungngat leh vang kumkhua’n hun nusia ding ahi.

¹⁰Tu’hin, LALPA chun a mun thiangtho In sa ding ah chun a hun têl ta’ngâl a; lunglut tak leh hat tak in um inla, sêm mualsua ta’n, ti’n a gen tai.

¹¹Ziaphatchun, David in a chapa Solomon kiang ah chun, a In hulliap um ding dan, a In leh a sung um ding dan, thawlawm bawm ding, pindan ding dan, a pindan sungnung um ding dan leh ja’ngaina chutpha kisiam ding dante haw zosia chu a etsak ah; chuleh,

¹²a lunggil ah a la guanggal dan zosia: LALPA In huang sung ûm ding dante, pindan in a ûm kîmvêl ding dante, Pathian In ah thawlawm kuang ding leh, thilpiak kilân thiangtho koikhawmna dingte;

¹³thiampute leh Levite a pawl pawl ah siam tuak ding dan leh LALPA In ah nasep thilbawl ding dan zosia tawh; LALPA In ah nasepna matchâk ding ûm leh bêl ding zosia tawh,

¹⁴matchâk ding sana ûm leh bêl haw gik ding dan zosia tawh, dangka ûm leh bêl haw gik ding dan zosia tawh,

¹⁵sana thaumei tunna gik ding dante, sana thaumei um ding dante, a tunna ding siam ding dante, thaumei tunna pakhat leh a thaumei pakhat gik ding dante, dangka ah kisiam thaumei leh a tunnate leh a kimatna ding dan haw zosia tawh;

¹⁶etsakna vaithum tianna ding ah dawkan pakhat zel ah sana kimang ding jat leh dawkan siamna’ dangka thik lut ding jatte tawh,

¹⁷sasutna ah sana thikhaikhaw kikâ siamna ah sana lut ding jatte leh, kuangpi leh no siamna dingte, sana belbu pakhat gik ding zat;

¹⁸sana thiangtho ah gimtui hâlna mâichâm siam ding dan leh a gik ding dante zosia tawh; chuleh, cherub thajak ah LALPA Thuthung thingkuang chung ah um dingte, a puakna ding kângtalai siamna ding ah sana lut ding jat haw chule a hil suak kêi hi.

¹⁹Zia haw zosia bawldaw ding dan LALPA thupiak dungzui ah zikdok in, ka kiang ah kichian tak in ei hil tai, a tia.

²⁰Zia ban ah chun, David in a chapa Solomon kiang ah chun zia gual hin a gen a: “Hat tak leh hangsan tak in um in, zia haw chu bawldok sik sek in. Lauthawng kin la, lungthuai diak kin; LALPA Pathian, ka Pathian chun a hun umpi la hi.

²¹A pawl pawl ah kisiam tuaksa thiampute leh Levite chu, Pathian Insa ding ah kisazosa ngen a hiu a; nasepna bangkim ah hun kithuapi ding mi khutthiam ngen, vaihawmtu leh mipi zosia hi nangma thupiak ngak ah kisa zo sa ngen a hitau hi,” ti’n a gen hi.