Read Vaiphei 1 KHANGTHU 4 Bible Online

1 KHANGTHU 4 - Vaiphei bible

1 KHANGTHU 4

¹Judah chate chu: Perez, Hezron, Karmi, Hur tawh Shobal a hiu.

²Shobal chapa Reaiah chun Jahath a hing ah, Jahath in Ahumai tawh Lahad a hing hi. Ziate chu Zorath Inkuante chu a hiu hi.

³Etam chate chu: Jezreel, Ishma leh Idbash a hiu ah; a suapinuu min chu Hazzelelponi ahi;

⁴chuleh, Penuel in Gedor a hing ah, Ezer in Hushah a hing hi. Ziate chu Beth-lehem pa Ephrathah chapa upa pen Hur chate chu a hiu hi.

⁵Tekoa pa Ashur in ji pani a nei ah, Helah tawh Naarah a hiu;

⁶Naarah in Ahuzzam, Hepher, Temeni tawh Haahashtari a hingah, ziate hi Naarah chate chu a hiu.

⁷Helah chate chu: Zereth, Izhar tawh Ethnan a hiu.

⁸Koz in Anub, Zobebah tawh Harum chate Ahazhel Inkuante chu a hing hi.

⁹Jabez chu a suapite lak in a ja’um pen ah; a nu’n, “Nat gimpi tak ah ka hin ahi,” a ti ziakin, Jabez min chu a phuak ahi.

¹⁰Jabez in Israelte Pathian min a ko ah, “Ei maljawl in la ka gamgi ei kêklet piak in; chuleh, la khut in ei umpi zing hen la, ei hi’na thei lak ah kipat in ei veng ta hen!” ti’n a don a, tichun, Pathian in a dotna chu a lawtinsak tai.

¹¹Shuhah suapipa Khelub in Mekir a hing ah, ama chun Eshton a hing hi.

¹²Eshton in Beth-rapha, Paseah tawh Irnahash pa Tehinnah a hing hi. Ziate hi Rekah Inkuante chu a hiu.

¹³Kenaz chate chu: Othniel tawh Seraiah a hiu ah; Othniel chate chu: Hathath tawh Meonothai a hiu a,

¹⁴Meonathai in Ophrah a hing ah; chuleh, Seraiah chun Geharashim pa Joab chu a hing hi; amau hi mi khutthiamte kha a hiu.

¹⁵Jephuneh chapa Kaleb chate chu: Iru, Elah tawh Naam a hiu a; chuleh, Elah chapa chu Kenaz ahi.

¹⁶Jehallelel chate chu: Ziph, Ziphah, Tiria tawh Asarel a hiu hi.

¹⁷Ezrah chate chu: Jether, Mered, Epher tawh Jalon a hiu. Ziate hi Mered in a la kichenpi Pharaoh chanu Bithiah chate chu a hiu a: Miriam, Shammai tawh Eshtomoa pa Ishbah cheng hi a hing hi.

¹⁸Chuleh, Judah phung ah mi a ji chu tawh Gedor pa Jered tawh Soko pa Heber tawh, Zanoah pa Jekuthiel cheng hi a hing hi.

¹⁹Naham suapinu tawh Hodiah chate chu: Garma mi Keilah suantupa leh Maakath mi Eshtemoa a hiu.

²⁰Shimon chate chu: Amnon, Rinnah, Ben-hanan leh Tilon a hiu a. Ishi chate chu: Zoheth tawh Benzoheth a hiu.

²¹Judah chapa Shelah chate chu: Lekah pa Er, Mareshah pa Laadah tawh, Beth-ashbea khua puanmalngat siamte Inkuan haw tawh;

²²Jokim tawh, Kozeba ah chêngte tawh, Joash tawh, Moab gam ah ji va neiden ah, Lehem lam ah hung kile’kit Saraph tawh a hiu ah (ziate hi malai tuanthu gual ah upa ahi tai.)

²³Ziate haw hi bêlvêl ah pang, Netaim leh Gedariah khua sungah chêngte a hiu a; zia khua chun lengpa nasem ah chêng khawm a hiu.

²⁴Simeon chate chu: Nemuel, Jamin, Jarib, Zerah, Shaul;

²⁵Shaul chapa chu Shallum ahi’n, ama chapa chu Mibsam ahi’n, ama chapa chu Mishma ahi.

²⁶Mishma chate chu: Hammuel, ama chapa Zakkur tawh a chapa Shimei a hiu.

²⁷Shimei chun chapa sawm leh guk tawh chanu paguk a nei hi; himaleh, a suapite chun vang ama gual in cha tampi a nei puau ah, a Inkuan uh le Judah chate gual in a pung thei puai.

²⁸Amau sia chu Beer-sheba, Moladah, Hazar-shaul,

²⁹Bilhah, Ezem, Tolad,

³⁰Bethuel, Hormah, Ziklag,

³¹Beth-markaboth, Hazar-susim, Beth-biri tawh Shaaraim khuate ah hin a chêng ui. Ziate hi David leng ah a hung pan tiangah a khawpi lianteu chu ahi.

³²Chun, a khawneuteu haw chu: Etam, Ain, Rimmon, Tokhen tawh Ashan, a leng ua khaw nga tawh,

³³a khaw kimvel ah khawneu dang dangte chule Baal khua tiang in a huam hi. Zia cheng hi a la chênnau khuate chu ahi. A khanggui unle zia chu a la kitepte dan ahi.

³⁴Meshobab, Jamlekh tawh Amaziah chapa Joshah,

³⁵Joel tawh Jehu, a pa chu Joshibiah ahi’n, ama pa chu Seraiah ahi’n, ama pa chu Asiel ahi’n;

³⁶Elioenai, Jaakobah, Jeshohaiah, Asaiah, Adiel, Jesimiel, Benaiah;

³⁷chuleh, Ziza, a pa min chu Shiphi, a pa chu Allon, ama pa chu Jedaiah, ama pa chu Shimri, ama pa chu Shemaiah ahi;

³⁸zia a min uh kizikte hi amau Inkuan chiat ah hotu a hiu ah; tichun, a phung uh chu nasa tak in a hung pung tau hi.

³⁹Gedor lutna, phâizawl sualam ah chun a ganchateu tatna ding hampa phatna hawl in a chia tau ah;

⁴⁰zia lam ah chun gancha tatna ding ah pha leh tam tak a vamuu ah; zia tak chu a gam le a lian in, a gâl muang in, a thip ma ma hi. Masang ah zia tak ah a la chêngte chu Ham suante a la hiu hi.

⁴¹Tichun, zia a min kizikte chun Judah gam ah lengpa Hezekiah lal lai ah khan a valut un, zia hun ah a la chêng Meunimte puanbûkte chu a buluu ah, tu’ni tiang dai dingin a la that gam tau hi; a gam chu gancha tatna ding ah a phat ma ma ziakin, a gam ua chun a chêngden tau hi.

⁴²Chuleh, a lak ua khenkhat, Simeon Inkuan ah mi za nga ding vel chu Seir tâng lam in a chiau ah; amau lak ah hotu dingin Ishi chapate Pelatiah, Neariah, Rephaiah leh Uzziel cheng hi a mang ui;

⁴³Amalekte lak ah a dam nalai sunte chu a that gam ua, tu’ni tiang hin zia tak chu a lua den tau hi.