Read Vaiphei 1 KHANGTHU 5 Bible Online

1 KHANGTHU 5 - Vaiphei bible

1 KHANGTHU 5

¹Israel chapa upa pen Reuben chate chu: (Ama chu cha upa pen himaleh, a pa jalkhun a sukbuak ziakin a u’pa hi’na chu Israel chapa Joseph chate kiang ah piakdaw in a la um tai; tichun, phunggui suina chun ama chu u’pa hi’na a chang ta puai;

²Judah chu a suapite lak ah chungnung pen leh ama ah kipat leng chi pawtdok maleh, u’pa hi’na vang Joseph a chang tai.)

³Israel chapa upa pen Reuben chate chu: Hanokh, Pallu, Hezron tawh Karmi a hiu.

⁴Joel chate chu: a chapa Shemaiah, ama chapa chu Gog ahi’n, ama chapa chu Shimei ahi’n,

⁵ama chapa chu Mikah ahi’n, ama chapa chu Reaiah a hi’n, ama chapa chu Baal ahi’n,

⁶ama chapa chu Beerah ahi’n, ama chu Assuria Lengpa Tilgath-pilnesar in sal ah a puimang kha ala hita’n; ama chu Reuben phung ah hotu lian pen a la hi.

⁷Chuleh, a Inkuan dungzui ua a suapite tawh a khanggui uh kisuina dan ah a Inpi dingteu chu: Jeiel, Zekhariah;

⁸chuleh, Aroer ah kipat Nebo leh Baalmeon tiang ah a la chêng, Joel chapa, Shema chapa, Azaz chapa Bela a hiu.

⁹Gilead gam ah chun a gan-gualteu a pun ma ma ziakin, Euphrates luipi ah kipat a sualam kâi ah gamkeu tawh kichin tiang in a lua tau hi.

¹⁰Saul hun lai ah khan Hagar suante tawh a kido ua, a zo tau a; tichun, a puanbûkteu ah chêngden in, Gilead gam sualam zosia chu a lua suak tau hi.

¹¹Gad suante chun amau (Reuben suante) umna ban ah, Bashan gam leh Salkah tiang in a hun luau a;

¹²Joel chu a Inpi pen in a pang ah, ama ban ah chun Shapham a hung hi’n; chuleh, Bashan gam ah chun Janai leh Shaphat a hung hitau.

¹³Chuleh, a phung dungzuiah a Inkuanteu chu: Mikael, Meshullam, Sheba, Jorasi, Jakan, Zia leh Eber a hiu ah, a leng un pasagi a hiu.

¹⁴Ziate hi Huri chapa Abihail chate chu a hiu a: Ama chu Jaroah chapa ahi’n, ama chu Gilead chapa ahi’n, ama chu Mikael chapa ahi’n, ama chu Jeshishai chapa ahi’n, ama chu Jahdo chapa ahi’n, ama chu Buz chapa ahi;

¹⁵ama chu Abdiel chapa ahi, ama chu Guni chapa leh a phung ua Inpi pen a hi;

¹⁶amau chu Gilead leh Bashan khawpite leh a khawpelteu tawh, Sharon gamgi’n a huapna tiang ah gancha tatna munte zosia lua suak ah chêng a hiu hi.

¹⁷Ziate zosia hi Judai gam ah Lengpa Jotham leh Israel gam ah Lengpa Jeroboam lal lai ah, a khanggui ua a la kiziklutsa ngen a la hiu hi.

¹⁸Reuben suante, Gad suante leh Manasseh phung lak ah a kimkhatte chun a leng ua kigawm in sepai hangsan, phaw leh chemjam, thalpi mang ah galdo thiam ngen galdo ding ah kisazosa sîng li sang li za sagi leh sawmguk a hiu.

¹⁹Hagar suante, Jetur suante, Naphish suante leh Nodab suante chu a vado un;

²⁰chuleh, amau in panpi’na a mu phât un, Hagar suante leh a kithuapi zosiau chu a khut ua chun piak in a um tau a; kido’na chun Pathian kiang in a kiko ua, ama a muan ziak un, ama’n a dotnau a lawtin piak ta ahi.

²¹A gancha honteu chu a hun lak piak tau a: Sangawngsau sîng nga, belam nuai khat leh sîng nga, sabiltung sang ni tawh mihing salmat nuai khat a hun man tau hi.

²²Pathian melmate do a hiziak un duaisan a that puau hi. Sal ah pui mang ahi masiau zia gam ah chun a chêng den tau hi.

²³Manasseh phung ah mi a kimkhatte chu zia gam ah chun a chêng un; Bashan gam ah kipat Baal-hermon, Semir leh Hermon tâng tiang ah lua dim hial in a hung pung ta ma mau hi.

²⁴Phung tin ah kipat a hotuteu chu ziate hi a hiu ah: Epher, Ishi, Eliel, Azriel, Jeremiah, Hodaviah tawh Jahdiel, amau haw hi gâlhat leh mi minthang, a phung chiat ua hotute chu a hiu.

²⁵Himaleh, a masang ua a gam ah a la chêngte, Pathian in a la sukmangthai takte haw, pathiante haw ho ah a la kisukbuak tak ziak un, a pu leh pateu Pathian doi lo lam tak chu bawl in thil a la hikhial zo tau a,

²⁶tichun, Israel Pathian chun Assuria Lengpa Pul tawh Assuria Lengpa Tilgath-Pilneser lungthim hun choktho in, Reuben suante, Gad suante leh Manasseh phung ah mi a kimkhatte chu sal ah pui mang in, Halah, Habor, Hara khua leh Gozan luipi tiang hial in tu’ni tiang hin sal in a um khawlaw tau hi.