Read Vaiphei 2 KHANGTHU 1 Bible Online

2 KHANGTHU 1 - Vaiphei bible

2 KHANGTHU 1

¹David chapa Solomon chun a lenggam a sukdet ma ma phatin, LALPA a Pathian in a umpi zing ah, nasa tak in a sulian tai.

²Solomon in sepai sang khat chung ah hotute, za khat chung ah hotute, vaihawmte, Israelte chung ah hotute tawh Israel Inkuan tin ah pate zosia chu a ko khawm a;

³Pathian hona ding ah puanbûk, gamthip ah LALPA suak Mosi’n a la bawl kha a um ziakin, Solomon tawh a hung khawm zosia chu Gibeon khua thoimual ah chun a chia to ui.

⁴(Ahi’n, David in Pathian thuthung thingkuang umna ding ah a bawlna mun ah koi dingin Kiriath-jearim ah kipat in a la pawdok zo tau a; Jerusalem ah chun a koina ding puanbûk a la jak zo tai.)

⁵Chuleh, Hur tupa, Uri chapa Bezalel in a la bawl sum-eng mâichâm kha le LALPA biakbûk mai ah chun a la um tai. Zia takah chun Solomon tawh a hung khawm zosia chun Pathian a vahechian tau ahi.

⁶Kikhopna biakbûk sung ah LALPA âng ah sum-eng mâichâm bul chu Solomon in a zuan ah, zia mun ah chun hâlmang thillat dingin gancha sang khat zet a lân tai.

⁷Zia jan ah chun Solomon kiang in Pathian a vakilâk ah, a kiang in, “Bang hun pia ding ka hem don in?” a tia.

⁸Solomon in Pathian kiang ah chun, “Ka pa David chung ah khan ja’ngaina nasa tak la la latsak zo ta’n; chuleh, ama thasâng ah leng hiding in lei siam ta hen,

⁹Aw LALPA Pathian, nang in lei tual ah leivui jat ah tam mipite chung ah leng hiding ah lei siam tâk ziakin, ka pa David kiang ah la thutiam kha ka chung ah guitunsak ta’n.

¹⁰Zia la mipi zozai chung ah hin kua’n vaihawm thiam ding a hem? Zia mipite lakah ka lut ah ka pawttheina dingin pilna leh hiatthiamna ei pia’n,” ti’n a don a.

¹¹Pathian in Solomon chu a dawnhu a, “La lunggil tak ah nei leh lam, hausakna, ja’umna, ahiloleh, la mêlmate hinna leh damsawtna le don lo ah, leng hiding ah ka hun siamna, ka mipite chung ah vai pha tak ah la hawm theina ding bep ah, nangma kamsuak ngei ah pilna leh hetna la dot ziakin,

¹²pilna leh hiatthiamna chu la kiang ah ka hun pia tai. Chuleh, la masang ah leng dang zosia leh la nung ah hung um nalai dingte zosia’n le a nei khak nai lo uh hausakna, nei leh lam leh ja’umna le hun piakbe ding ka hi,” ti’n a hun gen hi.

¹³Ziazaw chun, Solomon chu Gibeon ah thoimual, kikhopna biakbûk ah kipat chun Jerusalem lam in a hung kit tai. Tichun, Israelte chung in vai a hawm tai.

¹⁴Solomon in kângtalai leh sakol tam tak a lakhawm ah; sakol kângtalai sang khat leh za li tawh, sakol sîng khat leh sang ni a nei ah, ziate chu kângtalai khawpi leh Jerusalem ah lengpa kiang in a koikhawm hi.

¹⁵Lengpa chun, Jerusalem khua chun dangka leh sana chu suangchang a batsak ziang ah; chuleh, sidar thingte chule Shephelah lam ah theichang kung gual khop in a koi tai.

¹⁶Solomon sakolte chu Aigupta leh Kue gam ah kipat kila lutte a hiu a; lengpa sumkawlvei mite chun ziate chu Kue gam ah kipat in kiman tak tak in a hun chaw thei ui.

¹⁷Aigupta gam ah kipat a lâklutteu chu: Sakol kângtalai pakhat dangka shekel za guk leh, sakol pakhat dangka shekel za leh sawmnga’n a zuak ah, Hit gam ah lengte leh Aram gam ah lengte zosia kiang in a zuaksawn sek hi.