Read Vaiphei 2 KHANGTHU 11 Bible Online

2 KHANGTHU 11 - Vaiphei bible

2 KHANGTHU 11

¹Jerusalem khua lam ah Rehoboam a hung tun kit phatin, Israelte do ah Rehoboam lenggam la kit dingin, Judah leh Benjamin Inkuan lak ah kipat sepai hangsan deu deu mi nuai khat leh sîng giat a kaikhawm tau a.

²Himaleh, Pathian mi Shemaiah kiang ah LALPA‘n zia gual hin thu a hun genah:

³“Judai gam ah Solomon chapa Lengpa Rehoboam leh, Judah Inkuan leh Benjamin Inkuan leh Israelte zosia kiang in zia gual hin gen in:

⁴‘LALPA‘n zia gual hin a gen hi: La vakuan to lo diu ahi; la unauteu chu vado him him kiu in. Mi tin la In lam chiat un chia kit tau in; zia thil hi keima guanggal ahi ngal a,’ ti’n vagen in,” a tia. Tichun, LALPA thugen chu awi in, Jeroboam do ding ah kuan gawte chu a kile’kit tau a.

⁵Rehoboam chu Jerusalem khawpi chun a chêngden ah; Judai gam ah chun kivenna dingin khawpite a siam tai.

⁶Beth-lehem, Etam, Tekoa,

⁷Beth-zur, Soko, Adullam,

⁸Gath, Mareshah, Ziph,

⁹Adoraim, Lakhish, Azekah,

¹⁰Zorah, Aijalon leh Hebron khuate hi a siam piting ah; ziate hi Judai gam leh Benjaminte gam ah kulnei khawpite chu a hitau hi.

¹¹Zia khawpi kulpite chu a hi’det ah, a hotu dingte, a nêk dingteu, sathau te leh uain te a khol khawm a.

¹²Chuleh, khawpi tin ah chun phawte leh cheichate le a koikhawm in, khawpi detdo tak hiding in a siam chiat tai. Tichun, Judah leh Benjamin mite chu a awp khum tai.

¹³Israel gam pumpi thiampu leh Levite um zosia chu a umna mun chiat ua kipat hung pawtdok in, Lengpa kiang in a hung tau a.

¹⁴Jeroboam leh a chapate chun LALPA thiampu na sêm ding a phal lo ziak un, a nasepteu a la haisan zo tau ah; Levite chun a gam leh a umna munteu hun taisan in, Judai gam leh Jerusalem khua lam ah hung a hiu a;

¹⁵kêlchal leh bawngno lim a siamte thoimual ah thiampu pang dingte chu ama’n a la kiguat sik sek ta’ngal a.

¹⁶Israel nam lak ah LALPA Israelte Pathian lam lunglenna nei zosia chun a hun zui un, a pu leh pateu LALPA, Pathian kiangah kithawi dingin Jerusalem khua chun a hung tau hi.

¹⁷Tichun, Judai gam chu a sudet deu deu tau a, kum thum sung chun Solomon chapa Rehoboam chu thamuang tak in a umsak tauah; kum thum sung chu David leh Solomon sulnung chu a zui tau hi.

¹⁸Rehoboam in David chapa Jerimoth chanu Mahalath chu ji’n a nei ah; ama chu Jesse chapa Eliab chanu Abihail chanu ahi.

¹⁹Chapa a hinpiakte chu: Jeush, Shemariah leh Zaham ahiu a.

²⁰A ji pani’na chu Absalom chanu Maakah ahi; ama chu tawh Abijah, Attai, Ziza leh Shelomith a hing ui.

²¹Rehoboam in a jite leh a thâikemte zosia lakin Absalom chanu Maakah chu a lungsiat pen ah (ama chun ji sawm leh giat tawh thâikem sawmguk a nei in, chapa sawmni leh giat tawh chanu sawmguk a nei hi.)

²²Rehoboam in a golua ah leng ah hung pang dingin, Maakah tawh a chapau Abijah chu a hual deu ziakin, a suapi pawsal dang zosia chung ah hotu’n a pansak hi.

²³Pil tak ah lem a guat ziakin, a chapa dang zosia chu Judai gam leh Benjaminte gam ah khawpi kuldet nei zosia ah chun a hawm jak ah; nêk leh dawn kiningting tak in a pia’, ji le tam tak a neisak chiat hi.