Read Vaiphei 2 KHANGTHU 12 Bible Online

2 KHANGTHU 12 - Vaiphei bible

2 KHANGTHU 12

¹Rehoboam in a lenggam a sukdet zaw ah a hung hat ma ma phatin, ama lam ah pang Israelte zosia chu tawh LALPA dan chu a zui ta puau a.

²Lengpa Rehoboam lal kum nga a ti’n phatin, LALPA â dingah a ginum lo ziak un, amau do dingin Aigupta gam ah Lengpa Shishak chu Jerusalem do dingin a hung kuan to a;

³sakol kângtalai sang khat leh za ni tawh, sakol sepai sîng guk a hun pui a. Aigupta gam ah kipat hung kuan to sepai sim sên lo khop ah tamte chu: Lib mite, Suk mite leh Ethiopia mite a hiu a.

⁴Judai gam ah khawpi kuldet neite chu a ban ban in a hun la zung zung in, Jerusalem khua tiang a hung tung tau a.

⁵Ziaphatchun, jawlnei Shemaiah chu Rehoboam tawh Judah mipi hotute, Shishak lau ziak ah Jerusalem khua hung khawmte kiang ah chia in, a kiang un: “LALPA chun zia gual hin a gen hi: Lei kihei mangsan zaw tak ziak un ke’nle Shishak khut ah um dingin ka hun nusia ngâl la hiu,” ti’n a gen a.

⁶Ziaphatchun, Israel mipite lak ah hotute leh lengpa chu hung kingainiam in, “LALPA thilbawl dan chu a dik hi,” a tiu a.

⁷LALPA‘n a hung kingainiam dan uh a mu phât in, jawlnei Shemaiah kiang in zia gual hin a hun genah: “A kingainiam tâk ziak un, sumangthai sik sek ta pua’ng ka; a suachât theina ding uh lampi bawl piak ing ka tin, Jerusalem chungah hin ka lungnatna chu Shishak khut in butthâk khum sak ta pua’ng ka.

⁸A bang chu hileh, a suak un umsak tho tho ding ka hi; keima nasep leh gam dang ah lengte nasep kikhiak dan a hettheina ding un,” ti’n a gen a.

⁹Ziaphatchun, Aigupta Lengpa Shishak chu Jerusalem do ding ah chun a hung kuan ta ngei ah; LALPA In ah gote leh lengpa In ah gote a chomnâm ah; Solomon in sana phaw a siamte kha le a kilâk tai.

¹⁰Lengpa Rehoboam chun zia sana phawte thasâng ah chun sum-eng phawte a siam ah; ziate chu lengpa In kotkhak vêng sepai hotute a matsak tai.

¹¹Lengpa chu LALPA In ah a lut si’n leh a vêngte chun zia haw chu chawi in a zui lut un, ziazaw chuleh gâlvêngte pindan ah chun a koi kit sek tau hi.

¹²A kingainiam tâk ziak ah suksiat dim dem a nop lo phatin, LALPA lungnatna chu a chungah kipat lakmang in a hung um tai; zia bep chule hilo in, Judai gam chu a pha jel nalai hi.

¹³Tichun, Lengpa Rehoboam chu Jerusalem ah chun kisudet in vai a hawm a. Rehoboam chu leng ah a pan lim in kum sawmli leh khat mi ahi ta’n; LALPA‘n a min umsakna ding mun ah Israel nam zosia lak ah kipat a la têlchuam Jerusalem khua chun kum sawm leh sagi sung vai a hawm ah; a nu chu Amon mi a hia, a min chu Naamah ahi.

¹⁴A lunggil tak ah LALPA a hawl lo ziakin, thil phalo tak a la bawl kha tai.

¹⁵Rehoboam chanchin chu a bul ah kipat a tawp tiang in, Jawlnei Shemaiah in a zik Chanchinbu leh, thiamgau Iddo in a zik Chanchinbu ah khangthu a zikna lak ah kizik hinalo a hem? Rehoboam tawh Jeroboam kikâl ah kidona chu sutzom pek ahi nalai hi.

¹⁶Rehoboam chu a pu leh pate kiang in a ipmu ta’n, David khawpi’ vui in a um tai; ama thasâng in a chapa Abijah chu leng in a pang tai.