Read Vaiphei 2 KHANGTHU 24 Bible Online

2 KHANGTHU 24 - Vaiphei bible

2 KHANGTHU 24

¹Joash chun vai a hawm pat kum in kum sagi mi bep ahi’n; Jerusalem ah chun kum sawmli sung vai a hawm hi; a nu chu Beer-sheba chanu Zibia a hi.

²Joash chun thiampu Jehoiada dam sungsia LALPA mittung in vai a hawm hi.

³Jehoiada in ji pani a neisak ah; tichun, chapa leh chanu bang jat a hem tak a nei hi.

⁴Hun bang chan a hem nung in Joash in LALPA In siamphat a hun gua’n.

⁵Thiampute leh Levi mite chu a ko khawm ah, a kiang un, “Kum si’n ah la Pathian In uh puaphatna ding sumdawl dingin Judai gam ah khawpi tin ah vachiau inla, Israel mipi zosia ah kipat in sum hun lakhawm un; kin tak in vachia ngâl un,” ti’n a gen a.

⁶Tichun, lengpa chun thiampu lianpen Jehoiada chu a ko ah, a kiang in, “LALPA suak Mosi thupiak dungzui ah Judai gam leh Jerusalem khua cheng zosia ah kipat, thuthung puanbûk ah matchâk ding, Israel mipi zosia lak ah kipat in hun lakhawm ding ah bangatia Levite chu thu pelo la hem?” a tia.

⁷Zia numei nunsia, Athaliah chate khan, Pathian In susia dikdek in. LALPA In sung bep ah matchâk ding ah kikoi thiangthote natiang in Baal haw ho’na matchâk dingin a la mang polche tau ahi.

⁸Tichun, lengpa thupiak in thingkuang pakhat a siam un, zia chu LALPA In kotkhak pawlam ah chun a koi tau a.

⁹Gamthip ah Pathian in Israel mipite bawl ding dan ah a suak Mosi’n a bituk ding ua a guat dungzui ua, LALPA â ding ah hun pekhawm dingin Judai gam zosia leh Jerusalem ah chun thu a than velsak tau a.

¹⁰A hotuteu hi’n, mipite hileu, a kipak ma mau ah, amau piak ding bituk gual chiat in a hun pekhawm un, zia thingkuang chu a dim hial masia chu a sung lut zung zung ziang tau hi.

¹¹Dangka tam tak a um tai ti a het phat ua leh Levite chun lengpa miliante kiang in a hun paw lut un, lengpa lekhazikte leh thiampute lak ah hotute chu hung lut in, thingkuang chu hong in a ladok sek un; ziazaw phat chuleh a koina mun lam in a thak kit sek ui. Tichun, nisi’n in zia gual chun a bawl sek un, paisa tam tak a lakhawm tau hi.

¹²Lengpa tawh Jehoiada chun LALPA In ah nasepna lam ah hotute kiang in a pedok un, ziate chu mang in LALPA In siampha ding ah suangsêk thiamte leh mi khutthiamte a gawi un; tichun, LALPA In bawlpha dingah thik leh sum-eng bawldan thiamte chule a gawi tau hi.

¹³Tichun, nasêm dingah a mi gawiteu chun pha tak leh gunchu tak ah na a sep ziak un, nasep chu a machâl ma ma ah; tichun, Pathian In chu ahi ding gual tak in a bawlpha kit un, a bawl zo tau hi.

¹⁴A bawl zaw suak phat un, paisa um nalai cheng chu lengpa leh Jehoiada kiang in a hun lau ah; ziate chu LALPA In ah ûm leh bêl ding, hâlmang thillat ah matchâk ding, thik haikhaw ding, sana leh sum-eng matchâk ding chi chuam chuam siamna’n a mang tau hi. Tichun, Jehoiada dam sungsia’n, LALPA In ah hâlmang thillat chu a hunbî dungzui in a lân zing tau hi.

¹⁵Jehoiada chu a hung upa ta’n, a hung têk thi tai; a thi ah chun kum za leh sawmthum mi ahi.

¹⁶Israelte â ding leh Pathian leh a In â ding ah thil a bawl phat ziak in, David khawpi chun lengte lakah vui ahi tai.

¹⁷Jehoiada thi’nung in Judai gam ah miliante chu hung in, lengpa chu chibai a hung bûk tau a; ziaphatchun, lengpa chunle a thuu chu a mang tai.

¹⁸A pu leh pateu Pathian, LALPA In chu limsak talo in, dawikhuamte leh milimte chu a hun hosan tau a. Zia gual ah a thilbawl sualnau ziak ah chun, Judai gam leh Jerusalem khawpi chung in lungnatna a hung tung tai.

¹⁹Ahi’n la, LALPA kiang lam ah amau haw pui kit dingin a jawlneite chu a sawl ah; a diklonau a vagen un; himaleh, a ngaisak diak puau hi.

²⁰Ziaphatchun, thiampu Jehoiada chapa Zekhariah chu Pathian thagau in a hun thuam ah; mipite muthei dingin a dingdok ah, a kiang un: “Pathian in zia gual hin a gen hi: Bang ding ah la lamzan theilo khawlawna hial ding ua LALPA thupiakte botsia ziang la hiu em? LALPA chu la kihei mangsan tâk ziak un, ama’nle a hun kiheimangsan ta a hi, a tii,” ti’n a gen a.

²¹Ahi’n, ama thâlup ding dan a ngaitua tauah; tichun, lengpa thupiak in, LALPA In huang sung ah chun suang in a seplum tau hi.

²²Zekhariah pa Jehoiada khan, Lengpa Joash chung ah thilpha a la bawlte kha he talo in, a chapa chu a that tai. Zekhariah chu a thi ding kuan in, “LALPA‘n la thilbawl uh hun en hen la phuba hun la mai ta hen!” ti’n a gen tai.

²³Zia kumtawp lam ah chun Joash do dingin Aram sepaite a hung kuan un. Judai gam leh Jerusalem khua chu a hun do tau ah, a milianteu zosia a that gam tau hi; tichun, a gâl lâk zosiau chu Damaska khua lengpa kiang in a paw tung tau hi.

²⁴Aram sepaite chu tawmcha hi maleu, LALPA‘n a pu leh pateu Pathian, LALPA chu a kiheimangsan ziak un, a khut un sepai tam takte chu a pedok ta ahi. Tichun, Joash chu a gawt tai.

²⁵Nasa tak ah a liam nung in a gâlteu in a nusia tau ah, thiampu Jehoiada chapa a thâlup ziakin, a suakte chunle ama chu a lupna chung in a that tau hi. A thi phatin, David khawpi chun a vui tau ah, lengte thân in vang a vui puau hi.

²⁶Ama tha’na ding ah vaisawmte chu: Ammon mi Shimeath chapa Zabad tawh, Moab mi Shimrith chapa Jehozabad a hiu hi.

²⁷A chate chanchin leh ama demna thute leh Pathian In a sak phat dante haw zosia chu Lengte Chanchin Hilchetna Lekhabu ah chun ziklut suak a hi. Chuleh, a chapa Amaziah chu a thasâng ah leng in a pang tai.