Read Vaiphei 2 KHANGTHU 26 Bible Online

2 KHANGTHU 26 - Vaiphei bible

2 KHANGTHU 26

¹Ziaphatchun, Judai gam ah mipite zosia chun, kum sawm leh guk bep ah upa Uzziah chu, a pa Amaziah thasâng ah leng hiding in a guat tau a.

²Lengpa chu a pu leh pate kiang ah a i-mut nung in, Uzziah chun Eloth chu a siampha, Judai gam in a la lût tai.

³Kum sawm leh guk ahi in Uzziah chun vai a hawm pan ah, Jerusalem khua chun kum sawmnga leh ni sung vai a hawm hi. A nu chu Jerusalem khua Jekoliah ahi.

⁴A pa Amaziah gual tho in LALPA mit tung in na a sêm hi.

⁵Pathian lau ding dan a la hil ah pang Zekhariah dam sungsia chu Pathian lam a hawl zing ah; tichun, LALPA a hawl sungsia chu, Pathian in vangphatna a pia tai.

⁶Philistinte do in a kuandok ah; tichun, Gath khaw kulpi leh Jabneh khaw kulpi tawh Ashdod khaw kulpite chu a suchim dik dek ah; Ashdod bial leh Philistinte gam sung ah chun khawpite a tungdok tai.

⁷Pathian in ama chu Philistinte leh Gurbaal ah chêng Arabte leh Meun mite do dingin a kithuapi a.

⁸Ammonte’n le sia Uzziah kiang in a piau ah; a hung hat ma ma phatin Aigupta gam tiang in a min chu a kithang ma ma tai.

⁹Zia ban ah chun, Uzziah in Jerusalem khua kul kotkhak a Ning Kotpi, Phâicham Kotpi leh a Kil kawina Kotpite chule a siam ah, det do tak in a siam tai.

¹⁰Gamthip lam ah chun gâlven Insângte le a bawl ah; gancha tam tak nei ahiziak in Shephalah bial leh phâichâmte ah chun tuikul le tam tak a bawl hi. Lou bawlna lam ah lunglut mi ahiziak in, tânggam leh lei phatna munte ah chun lou bawl mi leh grep huan enkol ding mi tam tak le a nei hi.

¹¹Zia ban ah chun, Uzziah chun sepai tam tak, gâldo ziang thei ding ngen tam tak a nei in; ziate haw zosia chu lengpa sepai hotu liante lak ah pakhat Hananiah thupiak dungzui ah, lekha zikpa Jeiel in sepai hotu Maaseiah tawh kithua in a pawl ding gual un a zikdok tau a.

¹²Gâlhângsan ngen lakah a phung dungzui ua hotute ngen chule sang ni leh za guk a hiu hi.

¹³Amau thupiak dungzui ah lengpa mêlmate do ah pang ziang thei, thilhithei leh hat tak tak ngen sepai nuai thum, sang sagi leh za nga a pang ui.

¹⁴Uzziah chun a sepaite zosia chu phaw, chei, thik lukhuk, thik puanâk, thalpi leh vaisuangse natiang in a thuam chiat a.

¹⁵Chuleh, mi khutthiamte chun Jerusalem ah chun khawl a hun siamdok un; ziate chu thalpi leh suangtumte gamla tak tak kâp thei dingin gâlven buk leh khawpi kul ning tin ah chun a koi un. Tichun, gamla tak tak in a min chu a hung kithang ta’n, a hung hat ma ma ziang masangsia chu lam dang takah panpi in a um ngâl tai.

¹⁶Himaleh, a hung hat phatin ama siatna ding bep in, a hung kiletsak ta’n. LALPA a Pathian chung ah diklo tak ah thil hun bawl in, gimtui hâlna mâichâm ah LALPA kiang ah kithoina lân dingin tempul ah chun a chia ta’n.

¹⁷Himaleh, thiampu Azariah chun LALPA thiampu, mi hangsan ngen sawmgiat chu tawh a delzui tau a;

¹⁸Lengpa Uzziah chu a nang ham ham un, a kiang in, “Uzziah, nang in LALPA kiang ah kithoina la lat ding ahi puai; Aron suan ah thiampu hi ding ah kilân thiangthote bep in LALPA kiang ah kithoina ka lat diu a hi. Mun thiangtho ah kipat in pawtdok in; diklo tak in thil la bawl tai, LALPA Pathian in hun ja lo ding ahi ngâl in,” ti’n a gen tau a.

¹⁹Ziaphatchun, Uzziah chu a lungna ta’n. Gimtui hâlna thaumei, kithoina thillat hâlkuangna ding mei chu a chawi zing a. Thiampute chung ah a lungnat phatin, LALPA In sung ah, gimtui mâichâm bul, thiampute umna mun ma ma ah chun a chalki in phâk natna a hung um ta mai a.

²⁰Thiampu lianpen Azariah leh thiampu dang haw zosia chun a vak et ua leh, a chalki ah phâk natna chu a mu chiat ziang tau a. LALPA‘n a hun gawt phatin, kin tak in a nawdok un, ama le kin tak in a pawtdok tai.

²¹Lengpa Uzziah chu a thi tiang in phâk natna a vei tâk ziakin, In chuam ah koi in a um ta’n, LALPA Insung ah a lut phal ahi ta paw ngâl ah. A chapa Jotham chu lengpa In sung ah mawpua’n a pang in, a gam sung ah mipite chung in vai a hawm tai.

²²Tu’hin, Uzziah thilbawl zosia chu, a masa pen ah kipat a nunungpen tiang in Amoz chapa jawlnei Isai in a la zikdok tai.

²³Uzziah chu a pu leh pate kiang ah a i-mut phatin, “Phâk ahi,” a ti ziak un, lengte kivuina mun ah chun a vui puau hi. A chapa Jotham in a thasâng in vai a hawm tai.