Read Vaiphei 2 KHANGTHU 29 Bible Online

2 KHANGTHU 29 - Vaiphei bible

2 KHANGTHU 29

¹Hezekiah chu kum sawmni leh nga ahi in vai a hawm pan a; Jerusalem khua chun kum sawmni leh kua sung vai a hawm hi. A nu chu Zekhariah chanu Abijah ahi.

²A pu David gual in LALPA mittung ah dik tak in a um hi.

³A vaihawm pat kum, a tha masa pen ah chun LALPA In kotkhak haw chu hong in, a siatna zosia chu a siampha pan ngal a.

⁴Thiampute leh Levi mite zosia chu, sualam kâi ah huang sung ah chun a ko khawm ah;

⁵a kiang un zia gual hin a gen a: “Levi mite haw, ka thugen hi ngai un! Kisuthiangtho unla, la pu leh pateu Pathian, LALPA In hi suthiangtho unla, mun thiangtho ah kipat buaksia zosia hi chomdok un.

⁶I pu leh pateu kha a la ginum zaw tâk lo ziak un, LALPA I Pathian uh mit mu in thil phalo tak a la bawl zo tau hi; ama chu a la nusia in, LALPA chênna mun chu a la kiheisan in, a la nungngatsan tau a hi.

⁷Hulliap kotkhakte a la kam chak in, a thaumeite chule a la mitsak tau hi; chuleh, Israelte Pathian mun thiangtho ah chunle gimtui leh hâlmang thillatte le a la lân ta puau hi.

⁸Ziaziakchun, Judai gam leh Jerusalem khua chung in LALPA a lungna ta’n; tichun, tu’ni la mu gual un, mite tizat, maksak leh simmaw in a umsak ta’n ahi.

⁹I pu leh pateu chu chemjam ah sat lup in a la um zo tau ah, I chapateu leh I chanuteu le sal ah mat in a la um khawlaw tau ahi.

¹⁰Tu’hin, Israelte Pathian in I chung ua a lungnatna a lâk mang khâk leh ti’n LALPA kiang ah thuthung siamthak leu hin ti ka ngaitua hi.

¹¹Ka chate haw, tu’hin thil mawk ngaidau mai mai ziang kiu in, LALPA‘n a ma-âng ah ding ah, nasem leh a kiang ah thillat lân dingin a hun têldaw la hi’ngal un,” ti in.

¹²Ziaphatchun, Levite chu a hung dingdok un: Kohath Inkuan ah kipat in Amasai chapa Mahath tawh, Azariah chapa Joel; Merari Inkuan ah kipat in Abdi chapa Kish tawh Jehallel chapa Azariah; Gershon Inkuan ah kipat in Zimmah chapa Joah tawh Joah chapa Eden;

¹³Elizaphan Inkuan ah kipat in Shimri tawh Jeuel; Asaph Inkuan lak ah kipat in Zekhariah tawh Mattaniah a hiuah;

¹⁴Heman Inkuan ah kipat in Jehuel tawh Shimei a hiuah; Jeduthun Inkuan ah kipat in Shemaiah tawh Uzziel a hiu.

¹⁵A suapiteu chu a ko khawm un, a kisuthiangtho chiat tau ah; chuleh LALPA thugen dungzui leh lengpa thupiak dungzui in, LALPA In suthiangtho dingin a chiau a.

¹⁶Thiampute chu LALPA In sunggil lam suthiangtho dingin a lut un; tichun, LALPA In huang sunggil leh LALPA tempul sung ah kidak buaksia a muu zosiau chu a chomdok tau ah; Levite chun ziate chu Kidron guam lam ah chun a thakdok tau hi.

¹⁷Tha masa pen ah a ni masa pen ah kipat chun a suthiang pan un, a tha giatna chun LALPA hulliap tiang a hung tung tau ah; tichun, ni giat sung chu LALPA In sukthianna’n a mang kit un, a tha khatna a ni sawm leh guk tin ni chun a suthiang zo tau hi.

¹⁸Ziaphatchun, Lengpa Hezekiah kiang in a lut un, a kiang in, “LALPA In sung ah um zosia chu ka suthiang tau hi: hâlmang thillatna mâichâm leh a matchâk zosia leh, vaithum tianna dawkan leh a matchâk zosia tawh.

¹⁹Lengpa Ahaz in gin umlo tak ah a vaihawm sung ah a la sukpolche ûm leh bêl zosia khale ka suthiangtho un, mat kit thei dingin ka siamtup kit zo tau in, LALPA mâichâm bul ah ka koitup kit zo tau hi ti a la hia’n,” a vatiu a.

²⁰Ziaphatchun, Lengpa Hezekiah chu jingkal ma tak in a tho ah, khawpi sung ah a milian leh lalte zosia a ko khawm ah, LALPA In lam zuan in a chia to tau a.

²¹A lenggam leh mun thiangtho leh Judai gam mipi zosiate gitlo thoina dingin: bawngchal pasagi, belamchal pasagi, belamno pasagi tawh kêlchal pasagi a keng un. Ziate chu LALPA mâichâm ah lân dingin Aron chapa thiampute chu thu a pia tai.

²²Tichun, bawngchalte chu a that un, a thisan chu thiampute chun a lau ah mâichâm a the’khum un; chuleh, belamchalte chule a that un, a thisan chu mâichâm a the’khum un; chuleh, belamno haw chule a that un, a thisan chu mâichâm a the’khum tau hi.

²³Chuleh, gitlo thoina ding kêlchalte chu lengpa leh mipi kikhawmte kiang in a hun kai un, a luchung un a khut uh a nga chiat tau hi;

²⁴tichun, mâichâm ah kithoina thisan ziak ah Israel mipi zosia gitlona ngaidam a hitheina dingin, thiampute chun a that tau a. Israel mipi zosia â ding ah hâlmang thilpiak leh gitlo ngaidamna ding ah thilpiakte chu bawl dingin, Lengpa’n thu a piak ahi ngal a.

²⁵LALPA‘n a jawlneite thu a la piak dungzui ah David tawh Lengpa thiamgau Gad tawh jawlnei Nathan in thu a la piak dungzui un, LALPA In ah Levi mite chu a vai khutbetteu, a guipekteu leh a pekkhuangteu tawh a um densak tai.

²⁶Levi mite chun David thilgitheite chu chawi in a ding un, thiampute chun pengkul a chawi ui.

²⁷Ziaphatchun, Hezekiah in mâichâm ah chun hâlmang thillatte chu lân dingin thu a pia. Hâlmang thillat a piak phat un, Israelte Lengpa David thilgitheite chu tawh, pengkulte chu thua in, LALPA pâkna’n La a sa pan ngal un.

²⁸Mipi kikhawm zosia chun LALPA a biau ah, La sa pawlte chun La a sau ah, pengkul chawite chun a mût chiat un; hâlmang thillat zaw masia zia gual chun a bawl tau hi.

²⁹Thillat zaw phat chun, lengpa tawh a kiang ah um haw zosia chun, bokkhup in Pathian a ho tau hi.

³⁰Lengpa Hezekiah tawh a milian leh lalte chun, David La phuakte leh thiamgau Asaph La te chu LALPA pâkna ding ah sa dingin, Levi mite chu thu a piau a. Lim tak in pâkna La te chu a sau ah, Pathian ho in a bokkhup tau hi.

³¹Ziaphatchun, Hezekiah in a kiang un, “Tu’hin, LALPA â dingin la kilân thiangtho suak tau ah; hun nai unla, LALPA In ah kithoina ding leh kipakna thilpiak dingte chu hun chawi khawm tau in,” ti’n a gen a. Mipi kikhawmte chun kithoina ding leh kipakna thilpiak dingte chu a hun chawi tau ah; a nuam tapo inle hâlmang thillat ding a hun chawi tau hi.

³²Hâlmang thillat ding ah mipite choikhawm zosia chu: Bawngchal sawmsagi, belamchal za khat leh belamno za ni ahi; zia zosia hi LALPA kiang ah hâlmang thillat ding ah hung kipia chu ahi.

³³Kithoina ding ah hung kipekhawm zosia chu: Bawngchal za guk tawh belam sang thum ahi.

³⁴Himaleh, thiampute chu a tawm ziak un, hâlmang thillat ding ah ganchate chu a vun a lip sêng puau ah; ahi’n, a suapiteu Levi mite chun a nasep diu a zawthian masangsiau a la kithuapiu ah; Levi mite chun thiampute sâng in kisukthianna lam thu hi a ngaichîk zawu a.

³⁵Hâlmang thillat dingte a tam bep le hilo in, kichamna thillat sathau leh, hâlmang thillat tawh kithua dawn chi thillat hawle a um nalai a. Tichun, LALPA In ah sep leh bawl chu sutzom in a hung um pan kit thei tai.

³⁶Tichun, Pathian in mipite â ding ah zia gual ah chu thakhat ah thil a hun bawl ziang phatin, Hezekiah tawh mipite zosia chu a lim ta ma ma ziang ui.