Read Vaiphei 2 KHANGTHU 30 Bible Online

2 KHANGTHU 30 - Vaiphei bible

2 KHANGTHU 30

¹Hezekiah in Israel gam ah mipi zosia tawh Judai gam ah mipi zosia ko khawm dingin mi a sawl ah; chuleh, Ephraim mipi tawh Manasseh mipite kona dingin lekha a thot ah; Israel Pathian LALPA â ding ah Chiakân Kût, Jerusalem khua LALPA In ma ma ah lopi tak ah bawl ding in a ko khawm a.

²Lengpa tawh a khawnbawl zosia leh Jerusalem khua’ hung khawm zosia chun, a tha ni na chu Chiakân Kût bawl dingin a la kiholem tau a;

³(thiampute a la kisukthiantho man lo ziak leh, mipite le Jerusalem khua a chia khawm tam man lo ziak un, a mat hun dik tak in a la mang thei ta puau hi.)

⁴A thil guanggal dan uh chu lengpa leh mipi hung khawmte chun lem a sa chiat tau a.

⁵A dan dungzui ah mipi tam tak in a matthei nai lo ziak un, Israel gam pumpi Dan ah kipat Beer-sheba tiang ah, mipi a tamthei pen ah Jerusalem khua Israelte Pathian, LALPA kiang ah Chiakân Kût mang ding ah ko khawm ding chu lem a sa chiat tau a.

⁶Tichun, lengpa leh a khawnbawlte chun lekhathot chu a thotdok zung zung ziang tau a; Israel gam leh Judai gam pumpi chun lengpa thupiak in a thotdok suak tau a; zia gual hin thupiak chu a zik un: “Aw, Israel mipite haw, Abraham, Isak leh Israel Pathian, LALPA kiang lam ah hin hung kihei kit tau in; chutileh, ama le a thibang sunte kiang lam ah hin hung kihei kit in tin, nanghaw Assuria lengte khut ah kipat suakcha sunte hi hun nai kit ding ahi ngal a;

⁷la pu leh pateu leh la suanteu in la pu leh pateu LALPA Pathian a la kilepsan ziak ua, a gam uh a la sukgam piak khawlaw gual un um kiu in la;

⁸tu’hin vang, la pu leh pateu gual ah genhak in um ta kiu in; LALPA kiang ah hung kitulut unla, a mun thiangtho ah hin hung un; zia tak mun chu kumtuang dai ding ah a sukthian ahi ta’ngal in; la chung ua a lungnatna a lâkmang thei khâk leh LALPA la Pathian uh na chu sêm un.

⁹LALPA lam ah la hung kihei kit ua ahi chun, la suapiteu leh la chateu chun sal ah mante lainatna hung chang intiu in, zia gam ah hin hun pui tung kit ding ahi. LALPA la Pathian uh hi lainatna dim leh, ja’ngai tak ahi ngal ah; ama lam la ngat kit ua leh ama’nle nang uh lam hun nga kit ding ahi ngalah,” ti’n a thot tau hi.

¹⁰Lekhathot hawm ah chiate chun Ephraim leh Manasseh gam ah khawpi haw chu a ban ban in a chiau a, Zebulun gam tiang in a chuan suak tau a; himaleh, simmaw tak in a la nuisan in, a la hosia tau hi.

¹¹Asher, Manasseh leh Zebulun mite lak ah mi tawmcha bep chu kingaitawm tak in Jerusalem khua’n a hung tau a.

¹²Judai gam ah mite chung ah Pathian in na a sep ziakin, lengpa leh a khawnbawlte chun LALPA thugen dungzui ah thu a piakteu chu, lungthim kithu gual tak ah zui dingin a hung kipe tau a.

¹³A tha ni’na chun Thawipanglo Kût mang dingin, Jerusalem khua mi tam tak a hung khawm tau a.

¹⁴Jerusalem khua mâichâmte chu hun ladok in, gimtui hâlna mâichâmte chule Kidron guam lam in a vapai mang tau a.

¹⁵Tha ni’na, a ni sawm leh li tin ni chun Chiakân Kût belam chu a that tau a. Thiampute leh Levi mite chu a zakcha hial tau ah; tichun, amau kisukthian zaw phatin, LALPA In ah chun hâlmang thillatte chu a hun la lut tau a.

¹⁶Pathian mi Mosi Dan dungzui in, a sep dingteu chu kithu gual tak in a hun sêm pan tau ah; Levi chite ah kipat thisan a lakkhawmteu chu, thiampute chun a the’ tau a.

¹⁷A hung kikhawmte lak ah mi tam takte chu sukthian lo a hiziak un, a thianglote sukthianna dingin Levi chite chun Chiakân Kût belam chu mi tin â dingin a that tau hi.

¹⁸Ephraim, Manasseh, Issakhar leh Zebulun nam ah mi tam takte chun, amau kisuthiang lo lai in Chiakân Kût an a la ne tau ah, zia chu dan lo gual tak ahi ngal a. Ahi’n, Hezekiah chun a pauchap piak a:

¹⁹“Kuale a lungthim gil tak ah, a pu leh pateu Pathian, LALPA hawl tapo chu, mun thiangtho dan dungzui ah kisuthiang nai lo himaleule LALPA pha tak chun a ngaidam tai,” ti’n a gen a.

²⁰LALPA chun Hezekiah pauchapna chu a ngaithâk ziakin mipite chu a hi’dam tai.

²¹Jerusalem khua mipi hungkhawmte chun, Thawipanglo Kût chu kipak tak in ni sagi sung a mang tau hi. Chuleh, thiampute tawh Levi chite zosia chun, thilgithei zosia tawh thua in LALPA choihoina La ngai tak in a sa tau hi.

²²Hezekiah in LALPA nasepna thiam tak ah pang Levi chite zosia tîlkhona thu nasa tak in a gen tai. Tichun, mipite chun ni sagi sung chu luaithena an chu a neu ah, a pu leh pateu LALPA, Pathian kiangah Kichamna thillat lân in, kipak thute a gen tau hi.

²³Ziaphatchun, mipi kikhawmte zosia chun zia kût chu ni sagi mat zom dingin a hun lemguat tau a; tichun, ni sagi sung chu lim leh kipak tak in kût a mangzom tau hi.

²⁴Judai gam ah Lengpa Hezekiah in mipi kikhawmte kithoina thillat ding in: bawngchal sang khat tawh, belam sang sagi a pia’n; a khawnbawlte chun mipi kikhawmte â dingin bawngchal sang khat tawh, belam sang sagi a piau hi. Thiampute le tam tawk tak chu a hung kisuthiangtho tau hi.

²⁵Judai gam ah mipi hungkhawmte, thiampute leh Levi chite leh, Israel gam ah kipat hung khawm zosia tawh, Israel gam ah gam dang mi a chêngdente leh Judai gam ah gam dang mi a chêngdente chu tawh, a leng un a kipak ta ma mau hi.

²⁶Israelte Lengpa David chapa Solomon hun ah kipat khan, zia gual tuk ah kipakna thupi hi Jerusalem khua sung in a um ngai ta puai.

²⁷Ziaphatchun, thiampute tawh, Levi chite chu a dingdok un mipite chu a maljawl tau ah, a kipaknau husa chu LALPA het in a um tai; a pauchapnau chun a chênna thiangtho van a thawng tai.