Read Vaiphei 2 KHANGTHU 31 Bible Online

2 KHANGTHU 31 - Vaiphei bible

2 KHANGTHU 31

¹Zia zosia chu a hun bawl zaw phat un, zia kikhopna pang Israelte zosia chu Judai gam ah khawpite ah chun a chiauah, pathian lim ah kisiam suang khuamte leh dawikhuamte chu a khênchim tau ah; chuleh, Judai gam, Benjamin gam, Ephraim gam leh Manasseh gam sung ah thoimualte zosia a susia suak tau a. Zia gual ah chun Israel mipite chu a khawpiu chiat leh a In mun lam chiat un a chia kit tau hi.

²Thiampute leh Levite chu a pawl pawl un, a sepnau dungzui chiat leh a sep dan dungzui chiat un Hezekiah chun a hawm jak ah; thiampute leh Levite chu hâlmang thil lân dingte, kichamna thil lân dingte, LALPA huang kotbul ah choihoina La sa ding leh kipak thu gen dingte in a hawm gual a.

³LALPA Dan Lekhabu a la kizik dungzui in, jingkal leh nitâk ah hâlmang thillat dingte tawh, thathak hun leh a hunbî nei ah thillat dingte bawlna ding ah lengpa tuak ding jatte chu bithiak in a bawltuak a.

⁴Thiampute leh Levite chun, LALPA Dan Lekhabu kizik dungzui ah sep leh bawlna’ a kipumpiak theina ding un, a nêk leh châk dingteu chu Jerusalem khua mipite chun a tuak ding jatteu chu pia ding inle lengpa chun thu a pia’i.

⁵Zia thupiak chu a hun het phat un, Israel mipite chun a ga masateu, uain, sathau, khuaizu leh a lou thâiga zosia lak ah sawm ah pakhat tam tak tak a hun pekhawm tau a.

⁶Judai gam ah chêng Israelte leh Judah mipite chun, a bawng hon leh gan gual lak ah kipat leh LALPA a Pathian uh â ding ah thil kilân thiangthote chu a hun siavum ziang tau hi.

⁷A tha thumna’n a hun koikhawm pan un, a tha sagi’na chun a hun koikhawm suak bep tau hi.

⁸Hezekiah tawh a miliante chun a hung mu phât un, LALPA leh Israel mipite chu a maljawl tau a.

⁹Hezekiah chun zia thil kisia khawmte chungchâng chu, thiampute leh Levite kiang in a dong a.

¹⁰Zadok Inkuan ah mi, thiampu lal Azariah chun a dawnhu ah, “LALPA â ding ah thawlawm a hun piakkhawmteu ziakin, nêk leh châk kiningting tak ka nei tau ah, nêk vâl le tam tak ka nei tau hi; LALPA‘n a mite a maljawl ziakin, zia gual khop ah tam hile nêk vâl ka nei thei tau ahi,” a tia.

¹¹Ziaphatchun, Hezekiah in LALPA In ah pindan siambe dingin thu a pia; zia dungzui ah chun a siam tau hi.

¹²Ginum tak in a thawlawmteu, a sawm ah pakhatteu leh a thilpiakteu chu a hun chawi khawm zing tau a. Zia thilpiakte chung ah hotu chu Levite lak ah Koniah tawh a suapipa Shimei chu a kithuapi in a pang a;

¹³Lengpa Hezekiah tawh LALPA In ah hotu lianpen Azariah chun, Koniah leh a suapipa Shimei kithuapi dingin ziate hile a guat tai: Jehiel, Azaziah, Nahath, Asahel, Jerimoth, Jozabad, Eliel, Ishmakhiah, Mahath leh Benaiah; ziate cheng chu thawlawm enkol dingin a guat tau hi.

¹⁴Levi phung ah mi Imnah chapa Kore, sua lam kotkhak vêngpa chu Pathian kiang ah kiphalna dungzui ah thilpiakte enkol ding leh, thawlawm lak ah LALPA chanvo ding leh thilzek thiangtho pente zendok dingin mawpuakna piak ahi.

¹⁵Ama nuai ah chun Eden, Miniamin, Jeshua, Shemaiah, Amariah leh Shekaniah cheng hi thiampute chênna khawpite ah, a lak ua nêk leh châk bangkim, a têk a khang kibang tak ah hawmpiakna lam ah kithuapi ding in a pansak un;

¹⁶a khanggui uh kizikna dungzui ah pawsal kum thum ah kipat chung lam, a pawl pawl ah a kihop dungzui leh a sepnau dungzui ah nisi’n ah LALPA In ah sêm leh bawl ah pangte tilo ngal chu, a kibang chiat in a hawm piak tau a.

¹⁷Thiampute chu a pu leh pateu phung chiat in a min uh khum a hiu a; chuleh, Levi phung ah mite chule kum sawmni ah kipat chung lam mite chu a pawl pawl in, amau sep ding dan chiat chu hawm piak a hiu a.

¹⁸Thiampute chu a khanggui kisuina chun a chateu zosia, a jiteu, a chapateu leh a chanuteu tawh a leng un a hun sim khawm tau a; amau haw chu ginum tak ah a nasepna ding chiat ua kisuthiangtho ngen a hiu a.

¹⁹Chuleh, Aron suan ah mi, thiampute haw lak ah mi, midangte tawh lou bawl khawm leh amau khawpi ah chêngte chu, a khua a khua’n a tiam un; amau haw lak ah pawsal zosia chule, thiampute leh Levi Inkuan ah mi simna pang a hiziak un, a chan ding uh piak chiat a hiu hi.

²⁰Hezekiah in Judai gam sung zosia’n zia gual chun a bawl ah; LALPA a Pathian mit mu ah pha leh dik tak ngen in a bawl hi.

²¹Tichun, Pathian In ah sep leh bawl hi’n, dan leh thupiak zosia leh Pathian hawlna lam thu inle, a lunggil zosia’n a bawl ah; tichun, a lamzang pek hi.