Read Vaiphei 2 KHANGTHU 32 Bible Online

2 KHANGTHU 32 - Vaiphei bible

2 KHANGTHU 32

¹Zia gual ah ginum tak ah na a sep zaw nung ah chun, Assuriate Lengpa Sennakherib chu Judai gam sim ding in hung kuanah, kulpi det tak tak nei khawpite chu lâk gua’n a hung kuan hi.

²Hezekiah in Sennakherib chu ama do ding leh Jerusalem do ding ah hung kuan ahi ti a het phat in,

³khawpi pawlam ah tuinâkte chu hukbit ding dan a sepai hotute chu tawh a ngaituau ah; nasa tak in a hun panpi tau a.

⁴Amau haw chun, “Assuria lengpa chun a hung phat leh, tui kiningting tak in nei kha’n ah,” ti’n, mipi tam tak hung khawm in, tuinâk zosia chu a hukbing tau hi.

⁵Hezekiah chun kulbâng kisiatnate haw chu phatchuamngai tak in a puapha kit ah, a chung ah gâlvênna bûkte le a siam ah; chuleh, khawpi pawlam ah chunle kulbâng a siambe nalai ah; chuleh, David khawpi’ Millo chule a siampha, gâlvan leh phawte chule tam tak a siambe nalai hi.

⁶Mipite lak ah kipat chun gâlbawlna mapui dingte le a guatchuam ah; amau haw chu khawpi kul kotkhak bul tuatil ah chun a ko khawm ah, amau tîlkho’na dingin thu a gen a:

⁷“Hat tak leh hangsan tak in pang un. Assuriate lengpa leh a kiang ah a sepaite haw chu lau kiu inla, huphul him him kiu in; amau kiang ah umte sâng ah hatzaw ei panpi a um ngâl a.

⁸Amau chu mihing thahâtna bep mang a hiu ah, ei haw ei panpi ding leh I gâlteu ei do piak ding chu LALPA I Pathian uh ahi ngâlah,” ti in. Judai gam ah Lengpa Hezekiah thu gen ziak ah chun mipite chu nasa tak in a kisuhat tau hi.

⁹Zia nung ah chun, Assuriate Lengpa Sennakherib chu a sepaite zosia tawh Lakhish khua’n a um un; a suakte chu Jerusalem ah Judai gam ah Lengpa Hezekiah leh Jerusalem khua Judah mipite zosia kiang in a hun sawl a;

¹⁰a kiang un zia gual hin thu a hung gen un: “Assuriate Lengpa Sennakherib in zia gual hin a gen hi: Bang kineppi ah Jerusalem khua’ chu kikulkhup ziang la hiu em?

¹¹Hezekiah in, ‘LALPA, I Pathian un Assuriate lengpa khut ah kipat ei hukdok ding ahi,’ ti’n nanghaw chu gilkial leh dangchâk ah thigam ding bep in a hun thep zaw mai mai hilo la hiu em?

¹²A thoimualte leh a mâichâmte suchim ah, Judah mipite leh Jerusalem khua mite kiangah, ‘mâichâm pakhat bep ah Pathian la ho ua, zia mun bep ah chu kithoina la lat diu ahi,’ ti ah thupia kha zia Hezekiah ma ma hi hilo a hem?

¹³Keima leh ka pu leh pate khan, gam dang mite chung ah bang gual ah bawl ka hiu em ti kha helo la hiu em? Zia gam ah mite pathian ho haw khan a gamteu chu ka khut ah kipat in a hukdok thei bek ua a hem?

¹⁴Zia namte lak ah kuapen pathian chun, ka pu leh pate khut ah kipat in a mipiteu chu a la hukdok khau ah, la Pathian uh chunle ka khut ah kipat hun hukdok ziang ding ah kinem laizang la hiu em?

¹⁵Ziaziakchun, tu’hin le zia Hezekiah kha kithep zawsak ziang kiu in la, zia gual mai mai ah chun kipuimang sak ziang dingin taksang kiu in; kuate nam hileule, a pathian un amau leh a gam uh hilehle, keima khut leh ka pu leh pate khut ah kipat a pathian un a hukdaw thei him him a um puai. Bangtidan in a hem la Pathian uh chun ka khut ah kipat nanghaw a hun hukdaw diak ding la kinep uh chu!” a vatiu a.

¹⁶A suakte chun LALPA PATHIAN leh a suakpa Hezekiah demsiatna thu tam tak le a genbe nalai un.

¹⁷Sennakherib chun Israelte Pathian, LALPA demna thute le zia gual hin a zikah, “Nam dangte pathiante’n le a gam uh chu ka khut ah kipat a hukdaw thei lo gual tho un, Hezekiah Pathian chunle ka khut ah kipat in a mipite chu hukdok diak pua’n ah,” ti in.

¹⁸A khawpiu chu a lâkpiak theina ding un, Jerusalem khua leh a kulpi chung ah umte suklauna dingin, Judate pau in ngai tak tak in a kiko khum tau hi.

¹⁹Jerusalem khua Pathian chu khawvel ah nam dangte pathian gual bep ah, khut ah kisiam kawm gual bep in a gen tau hi.

²⁰Ziaphatchun, Lengpa Hezekiah tawh Amoz chapa Isai chu zia thu ziak chun pauchap in, van Pathian a ko tau a.

²¹LALPA‘n a vansawlchâk pakhat hun sawl in, Assuriate sepai hangsan leh a hotute leh a sâpliante zosia chu a hung bantan sik sek tai. Tichun, ama chu zakcha tak in a gam lam un a kile’kit tai. A pathian In ah a vachia phatin, ama chate ma ma chun chemjam in a that tau hi.

²²Tichun, Hezekiah leh Jerusalem khua chêngte chu Assuria Lengpa Sennakherib leh a gâlteu zosia khut ah kipat in LALPA‘n a hukdok ta’n; kiltin ah kipat in thamuanna a pia tai.

²³Mi tam tak in Jerusalem khua LALPA kiang ah thilpiakte hun chawi in, Judai gam ah Lengpa Hezekiah â dingin thilpiak lûl tak tak a hun pekhawm tau ah; zia kipat chun nam tinte mit mu ah nasa tak ah choisa’n in a hung um tai.

²⁴Zia hun lai ah chun, Hezekiah chu thi tavang ah damlo in a hung um a. LALPA kiang in a pauchap a, a pauchapna lawtin tepte’na le piak in a um hi.

²⁵Himaleh, Hezekiah chu a chapo ziakin, a chung ah phatna kibawl tawh kigûn in bangma a bawldok puai. Ziaziakchun, ama chung leh Judah mipite leh Jerusalem khua mite chung in hânsia a hung tung ta’n.

²⁶Ziaphatchun, Hezekiah in a chapona lungthim chu hun kheniam in, LALPA lungnatna chu Hezekiah dam sung ah Jerusalem khua chêngte leh ama chung ah chu lo dingin a hung kingainiam tai.

²⁷Hezekiah chu hausakna leh za umna nasa tak a hung chang ta’n; tichun, dangkate, sanate, suangmantamte, gimtuite, phawte leh van man tam tak tak haw koikhawmna dingin a bawlah;

²⁸chuleh, uain leh sathau haw koina ding leh, gancha chitin leh belamte haw khumna dingle a siam a.

²⁹Zia haw bep chule hilo in, ama â dingin khawpite le a bawldok ah; chuleh, belam hon le a hun hau ma ma ta’n; Pathian in nei leh lam tam tak a hun pia tai.

³⁰Zia Hezekiah ma ma hin Gihon lui tuinâk chung lam chu tingtan in, zia lui tui chu David khawpi tumlam kâi in a luansak a. Hezekiah chu a sepna lam zosia’n a lawting pek hi.

³¹A gam ah thilmakte entha dingin Babulon ah miliante chun palai a hun sawl un; a lungthim dik tak kichetna dingin Pathian in ama chu a thathawt tai.

³²Hezekiah thilbawl leh na pha sep haw zosia chu Amoz chapa jawlnei Isai kilâkna lekhabu leh Judai gam leh Israel lengte chanchin zikna lekhabu chun a zikdok sik sek hi.

³³Hezekiah chu a pu leh pate kiang in a la ipmu ta’n; David pu leh pate thân kaltona mun ah chun a vui tau a; Judai gam leh Jerusalem khua chêngte zosia chun a thi ni chun ja’na nasa tak in a bawl tau hi. Ama chapa Manasseh chun a thasâng in vai a hawm tai.