Read Vaiphei 2 KHANGTHU 35 Bible Online

2 KHANGTHU 35 - Vaiphei bible

2 KHANGTHU 35

¹Josiah chun Jerusalem khua’n LALPA â dingin Chiakân Kût a bawl ah; zia Chiakân Kût bawlna ding belam chu a tha khatna, a ni sawm leh li’ ni chun a hun that tau hi.

²Thiampute chu a sep ding chiat uh a hawm piak ah, LALPA In ah a nasep ding chungchâng un tîlkhona a gen a.

³Israelte zosia hil ah pang Levi mite leh, LALPA â ding ah kikoi thiangthote kiang in zia gual hin tîlkho’na thu a gen a: “Israelte Lengpa David chapa Solomon in, thuthung thingkuang thiangtho a la bawl kha In sung ah koi lut unla; la liangko un paw zing ta kiu in. Tu’hin, LALPA la Pathian uh leh a mipi Israelte â dingin sêm tau in.

⁴Israelte Lengpa David in a la zik dungzui leh, a chapa Solomon in bawl ding dan a la zikdaw dungzui in, la pu leh pateu Inkuan dungzui ah a pawl pawl ah la kihop gual ua sêm ziang thei dingin kisazosa’n um un.

⁵La pu leh pateu in la Inkuan uh, a pawl pawl ah a la hawm jak dungzui in, la Inkuan ua mipite chu, mun thiangtho ah chun la panmun chiat uh luau inla, la Inkuan kihawmjak dungzui un Levi mite chu pawl tin ah chun la pansak diu ahi.

⁶Chiakân Kût matna ding belam chu that un la, nangmau chule kisuthiangtho unla, la Inkuanpiteu thasâng in bangkim chu siam tuak un, Mosi kiang ah LALPA‘n a hil dungzui ah khan la bawl diu ahi,” a tia.

⁷Ziaphatchun, Josiah chun mipite â ding leh Chiakân Kût ah pang zosiate thillat ding chu a hun tuakdok ah; a tuakdaw belam leh belamno zosia chu sîng thum leh bawngchal sang thum ahi; zia zosia chu lengpa’n a neisa lak ah kipat a tuakdaw jat chu ahi.

⁸Lengpa vaihawm ah pangte chunle mipite â ding, thiampute â ding leh Levi mite â ding chunle huangphal tak in a hun tuak khawm tau a. Pathian In ah hotu lian Hilkiah, Zekhariah leh Jehiel chunle, thiampute’n Chiakân Kût a bawlnau ah mat dingin belam leh a no sang ni leh za guk tawh, bawngchal za thum a hun piau a.

⁹Chuleh, Levi phung ah hotu pente Konaniah leh a suapi Shemaiah tawh Nethanel, Hashabiah tawh, Jeiel tawh, Jozabad cheng hinle, Levi mite’n Chiakân Kût bawlna a mat ding un, belam leh a no sang nga tawh, bawngchal za nga a hun pedok ui.

¹⁰Biakna a hun pat phat un thiampute le amau mun chiat in a ding un, Levi mite chule lengpa thupiak dungzui in, a pawl pawl in a hung pang tau a.

¹¹Chiakân Kût matna ding belamte chu a hun that tau a, thiampute kiang ah gancha thisan a piakteu chu a la theu ah, zia sung ah chun Levite chun gancha vun chu a la lip un.

¹²Hâlmang thillat ding ah a gancha tha’teu chu Mosi lekhabu’ kizik gual in, mite’n LALPA kiang ah a lat theina ding un, a Inkuan kikhennau dungzui chiat un a hawm tau a. Bawngchalte chule zia gual tho ah chun a hun bawl tau hi.

¹³Chiakân Kût bawlna belam sate chu dan dungzui tak in mei in a hun em-min tau a; thillat thiante chu vang, bêldal leh khângbel in a huan ua, mipite lak ah chun kin-gang tak in a hun hawm tau a.

¹⁴Ziazaw chun, amau â ding leh thiampute â dingte chu a hun bawl tau a; Aron suan ah thiampute chu jan lam tiang ah hâlmang thillat lân leh sathaute chu lân ah buai a hiziak un; Levi mite chun amau â ding leh Aron suan ah mi thiamputeâ ding chu a hun bawl chuam tau a.

¹⁵Asaph suan ah mi La sate chule David, Asaph, Heman leh lengpa thiamgau Jeduthun te thupiak gual in, amau panmun ding chiat in a pang tau a. Kotkhak vêngte chule kotkhak bul tin in a pang chiat un, amau thasâng ah a chipiteu Levite chun kithoina a la lat piak ziak un, kuama a sepnau sukbuai in a um puau hi.

¹⁶Tichun, Lengpa Josiah thupiak dungzui tak ah chun zia nikhua chun LALPA hona Chiakân Kût chu bawl in, LALPA mâichâm chung ah chun hâlmang thillat chu a lân tau ahi.

¹⁷Israel mipite lak ah zia Chiakân Kût ah vapang zosia chun, thawipanglo kût le ni sagi sung a mang tau hi.

¹⁸Zia gual ah Chiakân Kût bawlna hi jawlnei Samuel hun ah kipat khan Israelte lak ah a la kibawl kha pua’n; Israel lengte lak ah kuama’n le Josiah leh, thiampute tawh Levi mite, Judah leh Israel mipi zosia tawh Jerusalem khua chêngte’n a bawl gual ua bawl kha him him a la um puau hi.

¹⁹Zia Chiakân Kût a matnau hi Josiah vaihawmna kum sawm leh giat tin kum ah a mat uh ahi.

²⁰Josiah chun tempul ah thil um dingte a um ding dan chiat ah a hun bawl zaw phat ah chun, Aigupta gam Lengpa Neko chun a sepaite chu Euphrates lui pang ah Karkhemish do dingin a hun pui to a; amau chu a la do dingin Josiah le a la kipan a.

²¹Neko chun vang a kiang ah palai a sawl ah, “Judai gam ah lengpa, nang do ding ah hung kuan ka hia hem? Tu’ni hin nangma do ding ah hung kuan to ka hipua’n, ka kidopite Insung mi haw bep do ding ah hung kuan ka hi; Pathian in amau haw chu kin tak ah vado dingin thu ei pia ahi. Nangma a hun sukmangthailona dingin, ei umpi zing Pathian hi dodâl dâ mai in,” ti’n a vagensak a.

²²Himaleh, Josiah chun a kiheimangsan nuam pua’n, ama chu a do theina dingin a mêl a siam lamdang zaw bawn nalai sêt ah. Neko kam ah Pathian thu kigen chu ngaisak lo in, Megiddo phâijawl ah kidona chun a vapang tai.

²³Thal kâpte chun Lengpa Josiah a hun kâp khâk phat un, lengpa chun a suakpa kiang in, “Ei pui mang un, ka liam nasa ma ma tai,” a tia.

²⁴Tichun, a suakte chun a kângtalai ah kipat hun zawn tha’n, ama kângtalai dang pakhat ah chuan sak in, Jerusalem khua lam in a taipi tau a. Zia tak ah chun a thi ta’n, a pu leh pate thân pakhat ah chun a vui tau hi. Judah mipi leh Jerusalem khua mipi zosia chun Josiah chu a sûn tau hi.

²⁵Jeremiah in Josiah sûnna La a la phuak ah, tu’ni tiang hin pawsal Lasak thiam leh numei Lasak thiamte chun Josiah chu kâ La’n a awi nalai uh ahi. Zia chu Israelte lak ah chîndan ngai gual in a hun mang theng tau a, zia La te chu kâ La te lak ah zik lut in a um ta ahi.

²⁶Josiah nasep thilbawl dang zosia chule, LALPA Dan Lekhabu kizik dungzui ah ginum tak ah a bawl haw zosia tawh,

²⁷a thilbawl masa pen ah kipat a tawp tiang in, Israel leh Judai gam ah Lengte Khangthu kizikna lekhabu chun zik lut suak ahi.