Read Vaiphei 2 KHANGTHU 36 Bible Online

2 KHANGTHU 36 - Vaiphei bible

2 KHANGTHU 36

¹A gam ah mipite chun Josiah chapa Jehoahaz chu a pui ua, apa thasâng ah Jerusalem khua leng in a pansak tau hi.

²Jehoahaz in vai a hun hawm lim ah chun, ama chu kum sawmni leh thum bep mi ahi’n; Jerusalem khua chun tha thum sung bep vai a hawm hi.

³Aigupta Lengpa Neko chun Jerusalem khua a lalna a paithâk piak ah, a gam un dangka talent za khat leh sana talent za khat Sia a liausak a.

⁴Aigupta lengpa chun, Jehoahaz suapipa Eliakim chu Judai gam leh Jerusalem khua leng ah pang dingin a siam ah; chuleh, a min le Jehoiakim in a then piak hi; ahi’n, Neko chun a suapipa Jehoahaz chu sal in Aigupta gam lam in a pui mang tai.

⁵Jehoiakim chu kum sawmni leh nga ahi in vaihawm in a pang pan ah; Jerusalem khua’ chun kum sawm leh khat sung vai a hawm hi. LALPA a Pathian mit mu ah diklo tak in thil a bawl hi.

⁶Ama do dingin Babulon Lengpa Nebukadnezar a hung kuan ah, thikkol busak in Babulon lam in a pui mang tai.

⁷Nebukadnezar chun LALPA In ah ûm leh bêl khenkhatte chule Babulon lam in a kipuak ah, Babulon ah a lal In ah chun a koi tai.

⁸Tu’hin, Jehoiakim thil bawl dang dangte tawh, a thil bawl ki’dak um tak tak te leh, a thil bawl diklo zosiate chu, Judai gam leh Israel ah Lengte chanchin zikna Lekhabu’ chun zik lut ahi tai; chuleh, a chapa Jehoiachin chu a thasâng in a hung pang tai.

⁹Jehoiachin chu kum giat ahi in vaihawm in a pang pan a; Jerusalem khua chun tha thum leh ni sawm sung bep vai a hawm hi. LALPA mit mu in thil diklo tak a bawl hi.

¹⁰Zia kum ah chavâng hun ah chun, Lengpa Nebukadnezar in LALPA In ah ûm leh bêl man tam tak haw chu tawh, ama chu Babulon lam ah hun pawmang dingin mi a sawl ah; a thasâng ah Judai gam leh Jerusalem khua leng ah pang dingin a suapipa Zedekiah chu a koi tai.

¹¹Zedekiah chu kum sawmni leh khat ahi in vaihawm in a pang pan ah; Jerusalem khua chun kum sawm leh khat vai a hawm hi.

¹²LALPA a Pathian mit mu ah diklo tak in a bawlah. LALPA thugendok ah pang jawlnei Jeremiah ma-âng ah chunle a kingainiam nuam diak puai.

¹³Pathian min ah a la kitiamsak, Lengpa Nebukadnezar chung inle a hung hel a; LALPA, Israelte Pathian lam nga lo dingin a lungthim sutâk in, a ngawng le a hikhau ah, lung det tak in a um hi.

¹⁴Thiampute lak ah hotute zosia leh mipite chunle, namdangte gual in nasa tak in thil ki’dak um takte chu bawl in, Jerusalem khua LALPA In sukthian ah a la um ta chule a hun subuak dik dek kit zo tau hi.

¹⁵A pu leh pateu Pathian LALPA chun, a mipite leh a chênna gam a lainat tun tun ziakin, a kiang ua thugen dingte chu a hun sawl ham ham sek a;

¹⁶himaleh, Pathian in thugen ah a hun sawlteu chu a la nuisan in, a thugenteu chule simmaw in, a jawlneite chule tawtbawlna’n a la mang tau a; a tawp in a mipite chung ah LALPA lungnatna a hung nasa ma ma ta’n, sukdam zaw ding gual a hita puai.

¹⁷Ziaziakchun, Kaldai lengte chu a puilût ah, amau chun a mun thiangtho ah chun a tangvalteu chu chemjam in a sat lum tau ah; tichun, tangval hi’n nungak hileu, teksia tawi zo talote hi ziangleu le, lainatna pang lo in a hun soisa tau hi; amau chu a leng un a khut ua a piak daw suak ahi tai.

¹⁸Pathian In ah ûm leh bêl, a lian hi’n a neu hileh, LALPA In ah gothil sum leh pâi zosia tawh, lengpa leh a milian leh lalte zosia gothilte zosia pum in Babulon ah chun a paw tung tau hi.

¹⁹Pathian In chu a hâl tum un, Jerusalem kulpi chule suchim in, lal In zosia chu a hâl tum un, ûm leh bêl man tam tak tak haw chu a susia dik dek tau hi.

²⁰Chemjam ah thi lo sunte chu Babulon lam ah a suak leh sal ding un a pui mang un; Persia lenggam a hung dindaw masangsia chu, a tu leh chateu tiang ah a suak un a pang tau hi.

²¹Jeremiah kam ah LALPA‘n thu a gen: “Sabbath ni a la chan lo uh zosia tawh kigûn dingin, kum sawmsagi sung chu a gam a la kichawldam ding ahi,” a ti kha a guitun masia tichun a um den tau hi.

²²Persia gam ah Lengpa Kuras a lal kum khatna chun, LALPA‘n jawlnei Jeremiah kam ah a thugen kha a guitunna dingin, Persia Lengpa Kuras lungthim chu LALPA‘n a hun choktho a; tichun, a lenggam sung zosia ah tângsam ding sawldok in, a vahil vêl ding un a thupuan chu a zikdaw piak a:

²³“Persia gam ah Lengpa Kuras in zia gual hin a gen a: Van Pathian, LALPA chun khawvel lenggam zosia hi ka khut in ei pia ta hen; ama chun Judai gam ah Jerusalem khua a In ding pakhat sadok dingin thu ei pia ta ahi. La lak ua kua kua hi ama mi la um awm? LALPA la Pathian un hun umpi ta hen! Zia gual mi taphot chu chia to kit tau hen!” ti in.