Read Vaiphei 2 KHANGTHU 9 Bible Online

2 KHANGTHU 9 - Vaiphei bible

2 KHANGTHU 9

¹Sheba gam ah Lengnu chun Solomon minthan dan chu a la het phat in, Jerusalem khua hungah, ama patepna ding ah dotna haksa tak tak te dong dingin nungzui tam tak tawh, gimtuite, sana leh suang mantam, tam tak sangawngsau ah hun pua’n a hungah. Solomon kiang a hung tun phatin, a lungthimah a ngaitua zosia chu pholdok in a holimpi tai.

²A dotna bawl zosia chu Solomon in a leng in a dawnhu piak ah; Solomon in a hilchet piak thei lo pakhatle a um puai.

³Sheba Lengnu chun Solomon pil dante, a In sakte,

⁴a annêkna dawkan ah kiluite, a gam vaihawmpite chutkhawm dante, a suak nasêmte sep dan haw leh a sil a chênteu, a no domte leh a kichei danteu leh LALPA In ah a hâlmang thillatte chu a mu phât in, a ngaitua sêng ta puai.

⁵Tichun, lengpa kiangah chun, “Ka gam lam ua la thilbawlte leh la pildan ka la het kha a la dik ma ma na hilam;

⁶himaleh, ka hung ah ka mit ngei in a hung mu masang khan ka la gingcha thei puai. La pildan a lopi dan tak hi a kimkhat le ei la hil puau hilam; a gensawn uh ka la het sâng in la thupi zaw ma ma hi.

⁷La mite chu a hampha nau e! La pilna thu ngaitha zing kawmah la nasêm ah pang, zia la suakte hile a hampha nau e!

⁸LALPA la Pathian, la chung in a lungdam ah, a lengpa hiding ah lalchutpha hun kichutsakpa LALPA la Pathian chu pâk in um ta hen! La Pathian in Israelte a lungsiat ziakah kumtuang ah phudet a guat ziak in, nangma hile a chung ua dik takah vaihawm dingin, leng ah a hun pansak ahi ngâl a,” ti’n a gen a.

⁹Ziaphatchun, lengpa kiang in sana talent za leh sawmni tawh, thil gimtui tam tak tawh suang mantam le a pia tai; Sheba lengnu chun Lengpa Solomon kiang ah thil gimtui a piak tuk ah tam hi a um kha puai.

¹⁰Zia ban ah chun, Huram suakte tawh Solomon suakte, Ophir gam ah sana pua chiate chun, algam thing tawh suang mantamte le a hun puau a.

¹¹Zia algam thingte chu Lengpa chun, LALPA In leh lengpa In ah kalbite leh La sate pekkhuang dingin a siam ah; zia gual hi Judai gam ah tu’ma lam ah chun a kimu ngai puai.

¹²Chuleh, Lengpa Solomon chun Sheba lengnu kiang ah a dawi a gendaw taphot chu a pia’n, lengpa kiang ah a hun puakte sâng ah gamcheng ah tam a pia tai. Ziaphatchun, a suakte tawh a gam lam un a chia kit tau hi.

¹³Solomon in a gam ah hung kiveite leh sumkawlvei mite ah kipat a mu bânin, kumsin leh sana talent za guk sawmguk leh guk ah gik a la lut sek hi.

¹⁴Arabia gam ah leng leh lal zosia tawh, a gam sung ah gam-uk zosia chunle sana leh dangka thikte chu Solomon kiang in a hun pesek ui.

¹⁵Lengpa Solomon in sana ngen in phaw lian za ni a siam ah; zia sana phaw pakhat siamna chun sana thiang talent za guk a lut hi.

¹⁶Chuleh, phawneu zaw le sana thiang in za thum a siam ah; zia phaw pakhat siamna chun sana thiang talent za thum chiat a lut hi; ziate chu lengpa chun Lebanon Gammâng Pindan ah chun a koikhawm a.

¹⁷Lengpa chun saiha lalchutpha thupi tak le pakhat a siam ah, zia chu sana thiang tui a luan khumah.

¹⁸Zia lalchutpha kaltona ding chun kalbi paguk tawh keng ngakna ding sana thiang in a bawlah; ziate chu lalchutpha chu tawh kizopmat ngen ah siam ahi’n; chuleh, a chutna pang langtuak ah chun sakeibaknei lim ah kibawl pani chu a ding gêl un;

¹⁹chuleh, kalbi pagukte mong chiat ah chun sakeibaknei pakhat chiat ding in, a leng ah sawm leh pani chu a um ui. Zia kibatpi chu kuama lenggam ah siamdaw hinai lo ahi.

²⁰Lengpa Solomon no haw chu sana ngen ah kisiam ahi’n, Lebanon Gammâng Pindan sung ah ûm leh bêl zosia chu sana thiang ah kisiam ngen ahi; Solomon dam sung in dangkathik chu bangma’n a ngai puau hi.

²¹Lengpa long haw chu Huram suakte tawh Tarshish lam in a chia khawm sek un; kum thum zaw phat leh Tarshish lam ah long chia sek haw chu sana, dangka thik, saiha, jawng leh vahuangte hun pawkhawm in a hung tung kit bep sek ui.

²²Chutichun, Lengpa Solomon chun khawvel ah leng dang haw zosia chu hausakna leh pilna’n a khum khêl vek hi.

²³Pathian in a lungthim ah a koi piak pilna chu ngaitha dingin, khawvel ah leng dang zosia chun Solomon chu a hung zuan sau sau sek un;

²⁴a hung ve taphot in sanate, dangka thikte, sil leh chênte, gâlvante, thil gimtuite, sakolte leh sabiltungte a hun puak piak sek un; zia gual chun kum si’n leh tam tak tak a hun pekhawm sek ui.

²⁵Solomon in sakol leh kângtalai koikhawmna mun sang li a nei ah; sakol sîng khat leh sang ni a neite chu sakol kângtalai koikhawmna ding ah a guat khawpite leh lengpa kiang ah Jerusalem ah chun a koikhawm hi.

²⁶Euphrates luipi kipat Philistinte gam leh, Aigupta gamgi tiang huap sung ah gamte chung ah leng a la umsate chung in vai a hawm hi.

²⁷Lengpa chun Jerusalem khawlai ah dangka thikte chu a tamsak ma ma ziakin, suangchang gual ah ngai thei hial in a tamsak ah; sidar thingte chule Shephelah mun ah theipi kung gual khop in a umsak hi.

²⁸Solomon â dingin sakolte chu Aigupta leh gam tin ah kipat in a hun tawl lut zung zung ui.

²⁹Solomon thilbawl dang dangte chu a bul a kipat a tawp tiang in, jawlnei Nathan in a zik Chanchinbu leh, Shilon khua jawlnei Ahijah genlawkna lekhabu leh, thiamgau Iddo in Nebat chapa Jeroboam chungchâng ah kilâkna a mute a zikna lekhabu chun a kizik kimna hilo a hem?

³⁰Solomon chun Jerusalem khua’n Israel mipite zosia chung in kum sawmli vai a hawm hi.

³¹Solomon chu a pu leh pate kiang ah chawldam dingin a thi ta’n; a pa David khawpi chun vui in a um tai; chuleh, a chapa Rehoboam chun a go a lua tai.