Read Vaiphei EZRA 1 Bible Online

EZRA 1 - Vaiphei bible

EZRA 1

¹Persia gam ah Lengpa Kuras lal kum khatna’n, Jeremiah kiang ah LALPA thugen a guitun theina dingin, LALPA chun Persia Lengpa Kuras in lekhazik ah gam sung pumpi’ tângsam ding sawl dingin a lungthim a hun choktho ah, zia gual hin tâng a sapsak a.

²Persia gam ah Lengpa Kuras in zia gual hin a gen a: “LALPA, van Pathian in khawvel lenggam zosia chu pia’n, Judai gam ah Jerusalem ah a In ding sa kit dingin thu ei pia’n.

³La lak ua Ama mi taphot chu, a Pathian un hun umpi chiat ta hen! Judai gam ah Jerusalem ah, LALPA, Israelte Pathian Insa ding ah chia kit dingin phal la hiu; Ama chu Jerusalem khua Pathian a hi;

⁴khoitak ah chêng hita leh, Jerusalem khua Pathian In sakna ding in a umnau mun chiat ah mipite’n, sum-eng, sana, thil leh gancha tawh a kiphalna dungzui chiat un thawlawm thilpiak in a la panpi chiat uh hen,” ti in.

⁵Judah leh Benjamin phung ah luchangte leh thiampute leh Levite lak ah Pathian Thagau in, Jerusalem khua LALPA In sa ding ah a chaw’phul zosia chu a kuan ziang dingin a kisa zo tau a.

⁶A Invêngteu chiat in dangka ûm leh bêlte, sanate, thil chi chuam chuam, ganchate leh thil go takte chu, amau kiphalna dungzui ah a piakkhawmteu bân in panpi’na a pechiat tau a.

⁷Lengpa Nebukadnezar in Jerusalem ah LALPA In ah ûm leh bêl a puakdaw zosia, a pathian In ah a koi chu Lengpa Kuras in a hun ladok a;

⁸Persia gam ah Lengpa Kuras in sumkolpa Mithredath khut in a pedok a; zia chu ama ngei in a jat a sim ah, Judai gam ah Lengpa chapa Shesh-bazzar khut in a pelut tai.

⁹A tam dan chu zia gual hi ahi: Sana kuang sawmthum; sum-eng kuang sang khat, chemcha sawmni leh kua;

¹⁰sana kuangneu sawmthum; sum-eng kuangneu za li leh sawmkhat; ûm leh bêl dang zosia sang khat;

¹¹sana leh sum-eng ah kisiam ûm leh bêl zosia chu sang nga leh za li a ting hi. Zia haw zosia chu Babulon ah kipat Jerusalem zuan ah Shesh-bazzar in saltângte a pui to phatin a paw tau ahi.