Read Vaiphei EZRA 4 Bible Online

EZRA 4 - Vaiphei bible

EZRA 4

¹Judah leh Benjamin mêlmate chun, sal ah tâng hung pawt kitte chun, LALPA, Israelte Pathian Tempul chu a sa kit tau hi ti a het phat un,

²Zerubbabel leh Inkuan tinah puitute kiang in a hung ua, a kiang un, “Assuria Lengpa Esar-haddan in zia tak mun ei tut ni kipat khan, zia tak mun ah hin kithoina a la la’n sek ah, nanghaw bawl gual gual ahin la Pathian uh kei unle ka la ho sek him uh a hiziak in, hun sakpi ing kau,” ti’n a hun gen tau a.

³Himaleh, Zerubbabel, Jeshua, leh Israel Inkuan tin ah puitute chun a kiang un, “Ka Pathian In ding uh sakna hin nanghaw hung kisaklâ a ngai puai; Persia Lengpa Kuras in thu ei piak dungzui in, LALPA, Israelte Pathian â ding chu kei uh ngen in ka sak ding uh ahi,” ti’n a la dawnhu tau hi.

⁴Ziaphatchun, a gam ah mite chun Judah mipite chu suklungkiak ah, In chu sa ngam lo ah umsak ding a hun gaw tau a,

⁵tichun, Persia Lengpa Kuras vaihawm sung zosia ah kipat, Persia Lengpa Darius lal tiang in, a thiltup uh sukbuaina ding ngaitua in gam vaihawm miliante chu a golgu tau hi.

⁶Ahasueras a lal lai ah, a lal lim a chun, Judai gam leh Jerusalem khua chêngte hêkna’n lekha a la zik un.

⁷Chuleh, Artaxerxes lal lai in, Bishlam, Mithredath, Tabeel leh a lawite zosia’n Persia Lengpa Artaxerxes kiang in lekha a zik un; zia lekha chu Aramaik pau ah a zik uh kiletdok ahi .

⁸Gam awppa Rehum tawh lekha zikpa Shimshai in, Jerusalem kãl zawng in Lengpa Artaxerxes kiang in zia gual hin lekha a zik tau a:

⁹(zia hun ah chun Rehum chu gamawptu, Shimshai chu lekha ziktu, a dangte chu a lawiteu ngen, vaihawmte, gam palaite, solkal nasêmte, Persia mite, Erek mite, Babulon mite, Susa mi a tiu Elamte,

¹⁰chuleh, a dangte cheng chu mi lopi Osnapar in gam tin ah kipat a chom khawm, Samaria leh Luipi Gâl lam ah chêngte zosia kigawm in a zik uh a hi’n,

¹¹a lekhathot uh thute chu zia hih ahi:) Lengpa Artaxerxes kiang in: La suakte, Luipi Gâl lam ah chêngte zosia’n chibai ka hun bûk ui.

¹²Tu’hin, la kiang ah kipat Judah mi hung pawtdok ah ka kiang lam ua hungte hin Jerusalem a zuan ui ti hi, Lengpa’n a la he hen la. Amau in zia khawpi hel hat leh nunsiatna dim chu a sa pan kit tau hi; a suangphûmte siampha’n a bângte chu a zo vang vang tau hi.

¹³Tu’hin, zia khawpi hi tundin kit ahi ah, a kulbângte chu sak zaw kit ahi ngei ngei leh vang, pânchi , thil zok man leh thil nei mante chu pepua’n tiu in, Lengpa sumnâk hi hung kiam ding ahi ti hi, Lengpa’n a la he ta’n.

¹⁴Tu’hin Lengpa Inpi ah kipat nêk leh châk leh bangkim mu ka hiziak un, Lengpa simmaw tak ah thil kibawl ding chu ka thokzaw lo ziak un, zia thute hi hun zik in Lengpa ka hun hil uh ahi;

¹⁵la pu la pate thillui tepte’na sui kit hi hen. Zia lekhabute ah kipat chun zia khawpi hi helmang, lengte leh gambung tin â ding ah natna leh nidang lai pek ah kipat zia khawpi kipat hi thil phalo pawt zing ahi dante chu kimudok in ah. Ziaziak ma ma chun zia khawpi hi suksiat a la hi’n.

¹⁶Zia khawpi hi tundin kit ahi ah, a kulbângte hi sak zaw ahi kit ngei ngei leh vang, zia Luipi Gâl langkhat lam ah gam bung haw hi hun mansua tei tei ding la hi ti Lengpa ka hun hiatsak uh la hi, ti’n a zik tau a.

¹⁷Lengpa’n a dawnhuna zia gual hin a thot ah: “Gam awppa Rehum leh lekha zikpa Shimshai leh a lawiteu, Samaria gam leh Luipi Gâl langkhat lam ah chêng zosia chibai!

¹⁸Tu’hin, lekha lei hun thot uh kha a le’dawna ei simdaw piak tau hi.

¹⁹Thupiak ka bawl dungzui in a kibawl ta’n, zia khawpi hi nidang lai pek ah kipat khan leng leh lal tam tak chungah a la hel in, buaina kipatna mun a la hi zing hi ti mudaw ahi tai.

²⁰Jerusalem ah hin Lengpa thil hi’thei takte le a la dingdok un, zia Luipi Gâl langkhat lam zosia ah gambung tin chung ah vaihawm in, pânchi , thil nei man leh zok mante a la lakhawm sek ui ti het ahi.

²¹Ziaziakchun, thupiak dang khat ka hun bawl kit masang sia, zia mite chu a la chawl tadi ding leh, khawpi chu a la sa tadi lo dingin thu a la piau in.

²²Zia ban ah chun, zia thu hi a la ngaikhawk ma mau in; bang dingah Lengpa siatna dingin phatlona chu sukpun hi maijen ding a hem?” ti’n a zik tai.

²³Lengpa Artaxerxes lekhathot chu Rehum tawh lekha zikpa Shimshai leh a lawiteu zosia maiah simdaw a hizaw phatin, Jerusalem ah Judate chu thagum ah a nasep lai uh cholsak dingin thu a pia tau a.

²⁴Zia kipat chun Jerusalem ah Pathian Insakna chu Persia Lengpa Darius lal hun kum ni’na tiang hial in cholsan ahi tai.