Read Vaiphei EZRA 7 Bible Online

EZRA 7 - Vaiphei bible

EZRA 7

¹Ziazaw chun, Persia gamah Lengpa Artaxerxes vaihawm lai in, Ezra, Seraiah chapa, Azariah chapa, Hilkiah chapa,

²Shallum chapa, Zadok chapa, Ahitub chapa,

³Amaziah chapa, Azariah chapa, Meraioth chapa,

⁴Zerahiah chapa, Uzzi chapa, Bukki chapa,

⁵Abishua chapa, Pinehas chapa, Eleazar chapa, thiampu lal Aron chapa;

⁶zia Ezra chu Babulon ah kipat in a kuandok a. Ama chu LALPA, Israelte Pathian in Mosi kiangah dan thu a la piakte dan thiam tak mi ahi’n; LALPA a Pathian doisakna chang ahiziak in, Lengpa kiangah a dot taphot chu phal piak in a um hi.

⁷Lengpa Artaxerxes lal kum sagi’na chun, Israelte lak ah mipi khenkhat leh thiampute leh Levite lak ah khenkhatte; chuleh, La sa pawlte, kotkhak vêngte leh Tempul ah nasemte chu Jerusalem lam in a chia to tau a.

⁸Lengpa lal kum sagi’na, tha nga’na chun Jerusalem a hung tung tau a.

⁹A tha khatna a ni khat ni chun Babulon in a kipandok ua; a Pathian doisakna a chan ziak un, a tha ngana, a ni khatna chun Jerusalem a hung tung tau a.

¹⁰Ezra in vang LALPA dan thute chu a zui ah, a thugente chu a hiltheina dingin Israelte kivai hawmna ding dante chu a lunggil zosia ah gunchu tak in a kizil zing sek hi.

¹¹Lengpa Artaxerxes in thiampu, lekhazik mi leh, LALPA‘n a mi Israelte zui ding ah a thupiak sawmkhatte leh, dan leh mualte ah mi thiam Ezra kiangah a lekhathot thute chu ziate hi ahi’n:

¹²Leng lopi Artaxerxes in van Pathian dan lekhathiam, thiampu Ezra kiangin: Thamuanna thu chu:

¹³Tu’hin, ka lenggam sung ah um zosia lak ah kipat Jerusalem lam ah chia kit nuam taphot chu, Israel mi vantang hi’n, a thiamputeu leh Levite hi taleu, hun zui ngal leu ti’n thu ka piai.

¹⁴Lengpa leh a thudot mi pasagite chun la khut ah um, la Pathian dan dungzui ah, Judah leh Jerusalem chungchâng thu vakan chian dingah nang a hun sawl dungzui un;

¹⁵Lengpa leh a thudot mite’n, Israelte Pathian, Jerusalem ah umpa â ding ah amau kiphal dungzui ah a piak khawm uh sana leh dangkate chu pua’n,

¹⁶Jerusalem ah Pathian In ding sakna ah mipite leh thiampute’n, amau kiphal dungzui chiatah a piak khawm uh, Babulon gam sung pumpi sana leh dangka la mu zosiau chule paw khawm un.

¹⁷Zia sumte chun bawngchalte, belamchalte, belamnote, an thillat ding leh dawn thillat dingte chaw khawm in, Jerusalem ah la Pathian mâichâm ah chun la valat diu ahi.

¹⁸Sana leh dangka a um nalai sia chu, nang leh la lawite’n pha lasak dan dan un, la Pathian un lem a tiphot leh mang ziang tau in.

¹⁹La Pathian In ah matchâk ding ûm leh bêl ka hun puaksak zosiau chu, Jerusalem ah Pathian âng ah la tut sik sek diu ahi.

²⁰Chun, la Pathian In â dingah la piak ding ah kul leh poimaw dang a um nak lai chun, Lengpa sum ding lak ah kipat in a la pia ziang in.

²¹Keima, Lengpa Artaxerxes ma ma hin, Luipi Gâl lam ah gambung tin ah sumkolte zosia kiang in zia gual hin thu ka la puaksak tai: Thiampu Ezra, van Pathian dan thu thiampa chun a hun dot taphot chu, kin-gang tak leh a ti gual gual ah la la bawl piak ziang theina ding un,

²²dangka talent za khat tiang , gehu bu Kor za khat , uain Bath za khat , sathau Bath za khat , tawh chi a poimaw zat zat a la piau in.

²³Van Pathian in thu a piak taphot chu, van Pathian In â dingah phatchuam ngaina ziakin bawl in um ziang hen; achutiloleh, Lengpa leh a gamngâkte chung ah a lungnatna hung tung kha’n a.

²⁴Zia bep chule hilo in, thiampute lak leh Levi mite, La sa mite leh kotkhak vêngtu leh a Tempul ah sêm leh bawl ah kigoite leh zia Pathian In ah sêm leh bawlte lak ah kipat him him in, van nei mante, thiampu hi’na Sia hi’n, van zokna leh kichawkna Sia him him la phut lo ding uh ahi.

²⁵Chun, nang Ezra in, Pathian in pilna a hun piak dungzui in, vaihawmtu dingte leh thutan dingte, zia Luipi Gâl lam ah mipi, la Pathian dante he mite chung ah thu tan dingin teldok inla; chuleh, dan thu helote chule hil in.

²⁶Kua hitaleh, la Pathian dan leh Lengpa dan botsia tapo chu, a chung un dik tak ah thu tanna bawl hingal hen la, thalup ding a hem, naw mang ding a hem, a vanteu lâkpiak ding leh suangkul ah khum ding a hem ah thutan piak hi kawm kawm ziang uh hen, ti in .

²⁷Jerusalem ah LALPA In chawisâng nopna lunggil nei dingah Lengpa lungthim ah nasem LALPA, I pu leh pateu Pathian chu chawihoi in um hen la,

²⁸chuleh, Lengpa, a thudot mite leh Lengpa sepai hotu lian zosia âng ah zaidawna ei musakpa, LALPA ka Pathian doisakna ka chan ziakin, ka kisuhangsan ta’n; tichun, Israelte lak ah ka kitonpi dingte lak ah hotu dingte chu ka ko khawm tai.