Read Vaiphei EZRA 9 Bible Online

EZRA 9 - Vaiphei bible

EZRA 9

¹Zia haw chu bawl zaw ahi’phat in, Lengpa nasêmte chun ei hun nai un, ka kiang in, “Israel mipite, thiampute leh Levite chu zia gam ah mite lak ah kipat hin kikoi thiang lo in, Kanaan mite, Hit mite, Periz mite, Jebus mite, Ammon mite leh Amor mite lak in a kisupolche zo tau a.

²Zia gam ah mite chanute chu amau ji ding leh a chapateu ji dingin a kilâk tau a. Tichun, chijiat thiangtho tak chu a gam ah mite tawh a kichenpol tâk ziak un, zia gual ah ginum lo tak ah chun a vaihawmteu leh puituteu chu a mapui in a pang zo tau hi,” ti in.

³Zia thute chu ka het phat in, ka puanâk leh ka puansilte chu botthêk in, ka lujang sam leh ka khamulte chu bot tha’n a ngaina he lo in ka kichutha suk ta mai hi.

⁴Ziaphatchun, saltânna’ kipat hung kile’kitte lak ah ginumlote ziakin, Israelte Pathian kamsuak ziakah lau ah kithing zosia chu, ka kiang in a hung khawm tau a, kei chule nitâk lam kithoina hun tiang in lungngai tak in ka kichu den tai.

⁵Nitâk lam kithoi hun a hung hi’phatin, ka puanâk leh puansil tel nêt nût in, ka anngawlna kipat hung thodok in ka khupdin ah, ka khutbânte jak in, LALPA ka Pathian kiang ah zia gual hin ka pauchap a:

⁶“Aw ka Pathian, la kiang lam hun nga, dak to dingin ka zak a cha talua’n, ka kiphalam talua ahi; ka khawlonau ka luvûm sâng in a sâng zaw’n, ka bawsiatnau in van a supha hial tai.

⁷Ka pu leh pateu hun laiah kipat tu’ni tiang hin ka gitlo’nateu chu a gil ma ma ta’n; keimau, ka lengteu leh ka thiamputeu khawlo’na ziak un, gam dangte lengte khut leh chemjamte âng leh, saltânna munte leh, gâl lâk ding leh mualphona zâhuai tak, tu’ni ka tuak gual uh hin ka la tuak tau ahi.

⁸Tu’hin vang, ka Pathian un ka mitteu ei sukvak piak ah, ka saltânnau ah kipat halthakna neukhat ka neitheina ding un, tu’hin hun chomkhat sung â dingin LALPA ka Pathian uh doisakna a hung kilang ah; tichun, a suakcha ding leh nutsia ah um nalai dingte bang ei umsak nalai hi.

⁹Mi suak ah um ka hi’ngâl un; I Pathian In uh sa kit ding leh a siatnate siampha kit ah, Judai gam leh Jerusalem kulbâng siam dingah hinna thak ei piak theina dingin, suak ah I umnau inle I Pathian un ei la nusia diak lo in, Persia Lengpa lainatna ei la musak nalai hi,” a tia.

¹⁰A leh, tu’hin, aw ka Pathian uh, ziazaw hileh bang hun gen ding ka hitau em? La thupiakte ka la nusia ta’ngâl un;

¹¹zia chu la suak jawlneite mang ah, “La lua ding ua la zawtnau gam chu, a gam ah mite buakna ziakah sukbuak zawsa a la hita’n. A ki’dak umnateu in a gam sung pumpi a dung a vai in a subuak zo tau hi.

¹²Ziaziakchun, la hung hat ua, a gam phatna ga la nêk ua, la chateu in go ah a luaden ding ua la nutsia piak theina ding un, la chateu chu a chapateu ji dingin pekiu inla, amau chanute chule la chapateu ji dingin la diak kiu in; amau tawh kihothei gaw kiu inla, a nei a lamteu le enla kiu in, la ti’n.

¹³Chuti gual ah ka gitlonau ziak leh ka mawnau tam ziak ah, ka chung ua hung tung dingle, nang ka Pathian un ka gitlonateule a kiphutawk sâng ah nep zaw’n ei gawt ah, zia gual ah um nalai dingte bang la umsak nalai a;

¹⁴la thupiakte botsia nalai ah, zia gual ah thil ki’dak um tak bawl mite hi tawh kichengpol nalai lai ding ka hiu em? A um nalai ding le um talo khop ah, a suakcha dingle um talo ding khop hial ah lei lungnat khum ma sia, ka chung un lungna zing talo ding la hia hem?

¹⁵Aw LALPA, Israelte Pathian, nang vang la dik in, keihaw vang tu’ni ka um gual un, a suakcha um nalai sunte chu ka hitau hi. La mêl hawl tâk khat chale um talo maleng uh le, ka mawnau pum in, zia tak ah hin la ma-âng in ka hung ui,” ti’n ka pauchap tai.