Read Vaiphei NEHEMIAH 11 Bible Online

NEHEMIAH 11 - Vaiphei bible

NEHEMIAH 11

¹Mipite lak ah hotute chu Jerusalem khua’n a chêng un; mipi dang cheng chu khawpi thiangtho Jerusalem ah chêng ding, amau sawmkhat jel lak ah kipat pakhat chiat têldawna dingin âi a sân un; a lak ua sawmkhat jel lak ah pakuate chu vang khawpineu dang haw ah chêng ding a tiu a.

²Chuleh, amau nopna dungzui ah Jerusalem khua chêng ding ah kipete chu mipite chun mal a jawl tau a.

³Judai gam sung ah khawpineu dang ah chêngte zosia chu, amau In mun chiat in a chêng un; a gam ua kipat Jerusalem khua hung chêng lut lak ah hotute chu: Israel phungte, thiampute, Levite, tempul ah suak nasêmte leh Solomon suakte suan haw chu a hiu a.

⁴Jerusalem khua chun, Judah phung ah mite leh Benjamin phung ah mite le khenkhat a chêng un. Judah phung ah mite chu: Perez suan ah Mahalalel chapa Shephatiah chapa Annaniah chapa Zekariah chapa Uzziah chapa Athaiah tawh;

⁵Sihon suante lakah chun, Zekariah chapa Joiarib chapa Adaiah chapa Hazaiah chapa Kol-hozen chapa Barukh chapa Maaseiah a hiu a.

⁶Perez suante lakah mi, Jerusalem khua sung ah chêng zosia chu, mi hângsan ngen za li sawmguk leh giat a hiu a.

⁷Benjamin phung ah mite chu ziate hi a hiu a: Jeshaiah chapa Ithiel chapa Maaseiah chapa Kolaiah chapa Pedaiah chapa Joed chapa Meshullam chapa Sallu a hiu in.

⁸Amau chanau kinaipite chu, Gabbai tawh Sallai, a leng ua za kua sawmni leh giat a hiu a.

⁹Zikri chapa Joel chu a hotuu ahi; chuleh, Hassenuah chapa Judah chu khawpi sung ah mawpaw pen zathuap in a pang hi.

¹⁰Thiampute lak ah chun: Joiarib chapa Jedaiah, Jakin,

¹¹Ahitub chapa Meraioth chapa Zadok chapa Meshullam chapa Hilkiah chapa Seraiah, Pathian In enkoltu chu ahi’n;

¹²chuleh, Pathian In nasepna kithua khawm zosia chu, za giat sawmni leh ni a hiu a; chun, Malkijah chapa Pashhur chapa Zekariah chapa Amzi chapa Pelaiah chapa Jeroham chapa Adaiah leh,

¹³phung tin ah hotute mi za ni sawmli leh ni a hiu ah; chuleh, Immer chapa Meshillemoth chapa Ahzai chapa Azarel chapa Amashsai chapa leh,

¹⁴gâlhat leh hangsan ngen za khat sawmni leh giat a hiu a; amau lak ah hotu chu Haggedolim chapa Zabdiel chu ahi.

¹⁵Levi mi lak ah mite chu: Bunni chapa Hashabiah chapa Azrikam chapa Hasshub chapa Shemaiah leh,

¹⁶Shabbethai leh Jozabad, Levi mite lak ah hotute cheng chu Pathian In huang sung pawlam ah sêm leh bawl ah pangte cheng tawh,

¹⁷Asaph chapa Zabdi chapa Mika chapa Mattaniah chu, kipak thugenna hun pantu lak ah hotu ahi’n; ama kithuapite lak ah hotu Bakbukiah tawh Jeduthun chapa Galal chapa Shammua chapa Abda le a hiu a.

¹⁸Khawpi thiangtho sung ah Levi mi a chêng zosia chu za ni sawmgiat leh li a hiu a.

¹⁹Chun, kotkhakvêngtu Akkub, Talmon tawh a kithuapiteu a chanaute chu za khat sawmni leh ni a hiu a.

²⁰Israel mipi lak ah a dang cheng tawh, thiampute leh Levite lak ah a dang cheng chu, Judai gam ah khawpineu dangte ah chun, amau gam sung chiat in a chêng tau a.

²¹Himaleh, tempul ah suak nasêmte chuvang, Ophel mun ah chun a chêng den un; Ziha tawh Gishpa te ni hi tempul ah suak nasêmte chung ah hotu a hiu.

²²Jerusalem khua Levi mite lak ah hotu chu Uzzi ahi; ama chu Pathian In ah La sa pawlte suantu Asaph chapa Mika chapa Mattaniah chapa Hashabiah chapa Bani chapa ahi.

²³Nisi’n ah La sa pawlte’n thilgithei a mamaw jat uh piak zing dingin lengpa thupiak a la um tasa ahi.

²⁴Meshezabel chapa Pethahiah, Judah phung ah mi Zerah suan ah mi chu, mipite chung ah bawl ding zosia mawpaw ding ah lengpa thasâng ah pang ahi.

²⁵Chun, mipite chu khawpineu leh a lou munteu ah chun a chêng un, Judah mipite chu Kiriath-arba khua leh a lou gamteu leh, Dibon khua leh a lou gamteu leh, Jekabzeel khua leh a lou gamteu leh,

²⁶Jeshua leh Moladah, chuleh, Beth-pelet,

²⁷Hazar-shual, Beer-sheba leh a khawpelte,

²⁸Ziklag, Mekoniah leh a khawpelte,

²⁹En-rimon, Zorah, Jarmuth,

³⁰Zanoah, Adullam leh a khawpelte leh Lakish leh a lou gamte leh, Azekah leh a khawpelte ah chun a chêng un. Tichun, Beer-sheba ah kipat Hinnom phâijawl tiang in a chêng ui.

³¹Benjamin phung ah mite chule Geba ah kipat in Mikmash, Aija, Bethel leh a khawpelte,

³²Anathoth, Nob, Ananiah,

³³Hazor, Ramah, Gittaim,

³⁴Hadid, Zeboim, Neballat,

³⁵Lod, Ono leh leibêl siamte phâijawl tiang in a chêng ui.

³⁶Chuleh, Juda gam ah Levite lak ah khenkhatte chu, Benjamin phung ah mite chu tawh a chêng khawm tau hi.