Read Vaiphei NEHEMIAH 12 Bible Online

NEHEMIAH 12 - Vaiphei bible

NEHEMIAH 12

¹Ziate hi Shealtiel chapa Zerubbabel tawh Jeshua hun zui, thiampute leh Levite chu a hiu ah: Seraiah, Jeremiah, Ezra,

²Amariah, Mallukh, Hattush,

³Shekaniah, Rehum, Meremoth,

⁴Iddo, Ginnethoi, Abijah,

⁵Mijamin, Maadiah, Bilgah,

⁶Shemaiah, Joiarib, Jedaiah,

⁷Sallu, Amok, Hilkiah leh Jedaiah a hiu ah. Ziate hi Jeshua hun ah thiampute leh a kithuapiteu chu a hiu hi.

⁸Chuleh, Levite chu: Jeshua, Binnui, Kadmiel, Sherebiah, Judah leh Mattaniah, amau chu a kithuapiteu tawh kipak thu genna hun ah La sa pawlte chung ah thuneite chu a hiu a.

⁹Bakbukiah tawh Unno chu biakna hun ah amau tawh kigâlchân in a ding sek ui.

¹⁰Jeshua chu Joiakim pa ahi’n, Joiakim chu Eliashib pa ahi’n, Eliashib chu Joiada pa ahi’n;

¹¹Joiada chu Jonathan pa ahi’n; chuleh, Jonathan chu Jaddua pa a hi.

¹²Thiampu Joiakim hun lai ah a phung tin ua hotute chu ziate hi a hiu a: Seraiah phung ah Meraiah, Jeremiah phung ah Hananiah,

¹³Ezra phung ah Meshullam, Amariah phung ah Jehohanan;

¹⁴Mallukhi phung ah Jonathan; Shebaniah phung ah Joseph;

¹⁵Harim phung ah Adna; Meraioth phung ah Helkai;

¹⁶Iddo phung ah Zekariah; Ginnethon phung ah Meshullam;

¹⁷Abijah phung ah Zikri; Miniamin leh Moadiah phung ah Piltai;

¹⁸Bilgah phung ah Shammua; Shemaiah phung ah Jehonathan;

¹⁹Joiarib phung ah Mattenai; Jedaiah phung ah Uzzi;

²⁰Sallai phung ah Kallai; Amok phung ah Eber;

²¹Hilkiah phung ah Hashabiah; Jedaiah phung ah Nethanel a hiu a.

²²Levite a hiu leh Eliashib, Joiada, Johanan leh Jaddua a dam lai ua kipat a phung tin ua luchangte min chu pha tak cha zikdawsa a hiu a; chuleh, Persia mi Darius lal kum tiang ah thiampute min chule zik lut a la hi.

²³Levite leh a phung tin ua luchangte chu vang Eliashib chapa Johanan dam lai tiang ah khan, lengte chanchin bu ah zik lut in a la um tai.

²⁴Chun, Levite lak ah hotute chu: Hashabiah, Sherebiah leh Kadmiel chapa Jeshua lawi a pawl pawl in a kisiam un. Pathian mi Lengpa David in thu a la piak tawh kituak in, pawl nite chun hun khat ah Pathian pakcha leh kipak thu gen in a kidawngtuau a.

²⁵Ziate hi kotkhak bul ngâkte lak ah thawlawm pindan vêngte chu a hiu a: Mattaniah, Bakbukiah, Obadiah, Meshullam, Talmon leh Akkub.

²⁶Ziate hi Jozadak tupa Jeshua chapa Joiakim dam lai, gam awppa Nehemiah tawh, thiampu leh lekha zikpa Ezra hun lai ah um a hiu a.

²⁷Jerusalem kulbâng latna ding ah chun, Levi mite chu limna, kipakna, La sakna, vaikhutbet, tumgitte leh tingtangte tawh kithua ah a lopna a hung pan theina ding un, a umnau chiat ah kipat Jerusalem ah hungkhawm dingin a hawl khawm tau a.

²⁸Levite lak ah La sa pawlte chu Jerusalem khawpi kîmvêl leh Netopath gam ah khawneu a chênnateu ah kipat leh,

²⁹Beth-gilgal, Geba leh Azmaveth bial ah kipat inle a hung khawm un; Jerusalem khaw kîmvêl ah chun khua a la kisiam ah chêngsa him a hitau a.

³⁰Tichun, thiampute tawh Levite chu a kilân thiangtho un; chuleh, mipite tawh kul kotkhakte leh kulbângte chule a lân thiangtho tau a.

³¹Ziaphatchun, Judah lak ah hotute chu kulbâng chung in ka puidok ah, kipak thu gen kawm ah mipi kizui dup dup ah chia dingte chu pawlpi lian tak pani in ka siam a. Buaksia Kotpi lam zuan in pawl khatte chu a kizui un;

³²amau nung chu Hoshaiah leh Judai gam vaihawm kimkhatte,

³³Azariah, Ezra, Meshullam,

³⁴Judah, Benjamin, Shemaiah leh Jeremiah in a zui un;

³⁵thiampute lakah kimkhat a khanglai deute, pengkul mut ah pangte chu: Asaph chapa Zakkur chapa Mikaiah chapa Mattaniah chapa Shemaiah chapa Jonathan chapa Zekariah leh,

³⁶a chanauteu, Shemaiah, Azarel, Milalai, Gilalai, Maai, Nethanel, Judah leh Hanani, Pathian mi David in a tumgit sekte chu chawi in a zui un, lekha zikpa Ezra chu a mapui in a pang hi.

³⁷Tuikhuk Kotpi ah kipat chun a ma lam ua, David khawpi kalbite ah kal to in, kulbâng kaltona ah, sualam pang Tui Kotpi lam, David In saklam kâi in a chiau a.

³⁸Chuleh, kipak thu gen pawl dang khatte chu veilam zuan ah chia in, kei tawh kulbâng chung ah mipi a kimkhatte chun ka zui un, Thukkhûk Insawng chung lam ah kipat in Kulbâng Lian lam zuan in,

³⁹Ephraim Kotpi chung lam ah kihei in, Kotpi Lui kiang haw ah, Sanga Kotpi kiang ah Hananel Insâng, Zakhatte Insâng haw malam in, Belam Kotpi lam ka zuan un; chuleh, gâlvêngte Kotpi bul ah chun ka chawl tau a.

⁴⁰Kipak thu gen pawlpite ni chu Pathian In ah chun a ding tau ah, gam vaihawmte lak ah kimkhat tawh keile ka pang chiat ui.

⁴¹Pengkul chawi thiampute chu: Eliakim, Maaseiah, Miniamin, Mikaiah, Elioenai, Zekariah leh Hananiah, chuleh,

⁴²Maaseiah, Shemaiah, Eleazar, Uzzi, Jehohanan, Malkijah, Elam leh Ezer le a um un. Chuleh, Jezrahiah mapuina’n La sa pawl inle La a sau a.

⁴³Zia ni chun kithoina thupi tak a lân un, Pathian in amau chu a suk kipak ma ma ziakin, a kipaknau a sâng ma ma ziang hi; numeite leh naupangte chule a lim ma mau a. Jerusalem ah kipakna husa chu gamla tak ah kipat inle hetphâk ahi.

⁴⁴Zia ni chun pindan chuam chuam: Thawlawm koikhawmna, thawlawm thilpiak ga masa, sawm ah khat haw enkol ding leh lakhawm ah, khawtin ah kipat lou munte ah kipat, dan dungzui ah thiampute leh Levite chanvo ah kipat lakhawm dingte guatdaw a hiu a; Judah mipite chu, amau â ding ah sêm thiampute leh Levite chung ah chun a lungdam ma ma ziak un.

⁴⁵David leh a chapa Solomon in thu a la piak gual un, La sa pawlte leh kotkhak vêngtute’n a bawl gualmau in a Pathian In ua sep leh bawl leh, sukthianthona chu a bawl chiat tau a.

⁴⁶Masang lai ah David leh Asaph dam lai ah khan, La sa pawl hotu a la um ah; chuleh, pâkna La leh Pathian choihoina La te a sa sek ui.

⁴⁷Zerubbabel tawh Nehemiah dam sung in Israel mipi zosia’n, La sa pawlte leh kotkhak vêngte nisi’n chanvo ding a siam piak sek un. Chuleh, Levite chanvo lak ah kipat chun Aron suante chanvo ding chule a khenthâk piak jel sek ui.