Read Vaiphei NEHEMIAH 3 Bible Online

NEHEMIAH 3 - Vaiphei bible

NEHEMIAH 3

¹Ziaphatchun, thiampu lianpen Eliashib chu a seppi thiampute tawh a hung kipan ua, Belam Kotpi chu a hun siam tau ah. A thiansua zaw phat un a kotkhakte chu a siamtup tau hi; tichun, Mi za khatte Insâng leh Hananel Insâng tiang in a thiansua tau hi.

²Amau bân chu Jeriko khua mite’n a bawl ua; amau bân chu Imri chapa Zakkur in a siam a.

³Hassenah Inkuante’n Sanga Kotpi a siam ua; a jawlpite zam zo in, a kotkhakte leh a kamnate le a bawl tau hi.

⁴Amau bân chu Hakkoz chapa Uriah chapa Meremoth in a siampha’n. Amau bân chu Meshezabel chapa Berekiah chapa Meshullam in a siampha’n. Amau bân chu Baana chapa Zadok in a siam phai.

⁵Amau bân chu Tekoah khua mite’n a siamphau ah; himaleh, a mi lian leh lalteu chu vang a hotuteu nasepna’n a pang nuam puau hi.

⁶Chuleh, Kotpi Lui chu Paseah chapa Joiada tawh Besodeiah chapa Meshullam in a siamphau ah; a jawlte zam zo in, a kotkhakte, a thikjawlte leh a kamnate le a bawl ui.

⁷Amau bân chu Gibeon mi Melatiah leh Meron mi Jadon in, Luipi gâl lam gam awppa nuai ah umte, Gibeon leh Mizpah mite chu tawh a siampha tau a.

⁸Amau bân chu sana sêkte lak ah pakhat, Harhaiah chapa Uzziel in a siampha’n. Ama bân chu sathau gimtui siamte lak ah pakhat, Hananiah in a siampha’n; tichun, Jerusalem kulbâng chu Kulbâng Lian tiang in a siampha suak tau hi.

⁹Amau bân chu, Jerusalem bial kimkhat ah vaihawmpa, Hur chapa Rephaiah in a siampha’n.

¹⁰Amau bân chu Harumaph chapa Jedaiah chun ama In jawn chu a la siampha’n; ama bân chu Hashabneiah chapa Hattush in a siam phai.

¹¹Harim chapa Malkijah leh Pahath-moab chapa Hashub in, mun dang khat tawh Thukkhûk Insâng chu a la bawlpha tau hi.

¹²Amau bân chu, Jerusalem bial kimkhat ah vaihawmpa, Hallohesh chapa Shallum in a chanute tawh a la siampha tau hi.

¹³Chun, Hanun tawh Zanoah khua chêngte chun Phâijawl Kotpi chu a siampha tau ah; a kotkhakte, a kamnate leh a thikjawlte a siamphat zaw nung un, Buaksia Kotpi tiang ah kulbâng tong za khat sung chu a la siampha zo tau a.

¹⁴Chun, Beth-hekkerem bial ah vaihawmpa, Rekhab chapa Malkijah in Buaksia Kotpi chu a siampha’n; a siam phat zaw nung in a kotkhakte, a kamnate leh a thikjawlte le a la bawl pha tai.

¹⁵Mizpah bial ah vaihawmpa Kolhozeh chapa Shallum in, Tuikhuk Kotpi a siampha’n; a bawl zaw phatin a chungkhû ding, a kotkhakte, a kamnate leh a thikjawlte le a la bawl ah; chuleh, Lengpa huan sung ah Shelah Dil bâng le David Khawpi’ kipat a kumsukna kalbite zosia chule a siam a.

¹⁶Amau zaw ah chun, Beth-zur bial kimkhat ah vaihawmpa, Azbuk chapa Nehemiah in David thân jawn ah kipat dîl kisiam kawm tawh mihangsante In tiang chu a siampha’n.

¹⁷Ama zaw ah chun Levite’n a siam un: Bani chapa Rehu; ama zaw ah chun Keilah bial kimkhat ah vaihawmpa Hashabiah in, ama bial ma ma ding chu a kisiam phat hi.

¹⁸Ama zaw ah chun a unauteu: Keilah bial kimkhat ah vaihawmpa, Henadad chapa Binnui in a siampha’n;

¹⁹ama zaw ah chun Mizpah ah vaihawmtu Jeshua chapa Ezer in, Kul kawina kipat gâlvan koikhawmna zawt to’na mai jawn chu a siam phai.

²⁰Ama bân ah chun, Zabbai chapa Barukh chun Kul kawina kipat in mun dang khat, thiampulal Eliashib In kotkhak tiang in a siampha’n.

²¹Ama bân ah chun, Hakkoz chapa Uriah chapa Meremoth in mun dang khat, Eliashib In kotkhak ah kipat Eliashib In mong langkhat lam tiang chu a siampha’n.

²²Ama bân ah chun, a kiang nai tuam ah um, thiampute chun a siampha tau a.

²³Amau bân chu, Benjamin leh Hashub in amau In jawn chiat a siampha tau hi. Amau bân chu, Ananiah chapa Maaseiah chapa Azariah in ama In kiang a siampha kit a.

²⁴Ama bân chu, Henadad chapa Binnui in mun dang khat, Azariah In ah kipat kul kawina leh a kil tiang in a siampha kit a.

²⁵Uzai chapa Palal in kul kawina jawn ah kipat Lengpa In chungnung zaw kipat ah hung dawkdok Insâng chu a siampha’n. A bân chu, Parosh chapa Pedaiah leh,

²⁶Ophel ah chêng tempul ah nasêmte chun, sualam kâi ah um Tui Kotpi mai jawn leh Insâng hung dawkdok tiang chu a la siampha tau a.

²⁷Ama bân chu, Tekoah lawi in mun dang pakhat, Insâng mai jawn ah kipat in Opel kulbâng tiang in a siampha tau hi.

²⁸Sakol Kotpi chung lam zosia chu, thiampute’n amau In jawn chiat a siampha tau a.

²⁹Amau bân ah chun, Immer chapa Zadok in ama In jawn chu a siampha’n. Ama bân ah chun, Shekaniah chapa Shemaiah, sualam Kotpi vêngpa chun a la siampha ta’n.

³⁰Ama bân chu, Shelemiah chapa Hananiah tawh, Zalaph chapa a pagukna Hanun in mun dang khat a la siamphau ah. Amau bân chu, Berekiah chapa Meshullam in a chênna jawn chu a la siampha’n.

³¹Ama bân chu, sana sêkte lak ah mi pakhat, Malkijah chun tempul ah nasêmte leh sumkawlveite In, Gâlvênna Kotpi jawn leh a kil tiang chu a la siampha tau a.

³²Chuleh, a kil ah pindan chungnung tawh, Belam Kotpi kikâl chu, sana sêkte leh sumkawlveite’n a siampha tau hi.