Read Vaiphei NEHEMIAH 5 Bible Online

NEHEMIAH 5 - Vaiphei bible

NEHEMIAH 5

¹Zia lai ah chun, mipite leh a jiteu chu a unau Judah Inkuante chung ah nasa tak in a phunchiak tau a.

²A lak ua khenkhatte chun, “Chanu chapa ka hau ziak un, ka nêk ua ka hindaw theina ding un, nêk ding bu ka chan têi ding uh ahi,” a tiu a.

³A lak ua khenkhatte chun, “Kial sung ah ka nêk ding uh bu man dingin ka louteu, ka grep huanteu leh ka Inteu kitiamna ka tundaw mai diu ahi tai,” a tiu a.

⁴Chuleh, a khenkhatte chun, “Lengpa kiang ah Sia ka piak theina ding un, ka louteu leh ka grep huanteu man dingin sum ka thunglâk uh a ngai hi.

⁵Ka taksau chu ka unauteu taksa gual tho ahi’n; ka chateu chule amau chate gual tho ahi ngâl un; ahiziak in, ka chapateu leh ka chanuteu chu suak hiding ah ka piak uh a ngai ta’n, ka chanuteu lak ah khenkhatte vang hi suak hiding ah zokdawsa ngen a hitau hi; ka louteu leh ka grep huanteu chu midang a chang zo tau in, bangma ka law thei diak ta puau hi,” a ti tau a.

⁶Zia thute leh a phunchiaknateu chu ka het phat in ka lung a na ma ma ziang a.

⁷Zia thu chu pha tak ah ka ngaitua zaw phatin, miliante leh vaihawmte chu ka vau ah, a kiang un, “La chipiteu kiang ah sumpung del ah a la pia la hiu em?” ka ti’n. Tichun, zia thu chu ngaitua dingin mi tam tak ka ko khawm a;

⁸a kiang un: “Namdangte kiang ah zok mang ah a la um ta, I Judah chanpiteu chu I la tandok tau a; tu’hin, nanghaw’n I unauteu chu I tatdaw kit ding un a la zok mang gaw nalai la hiu maw?” ka ti’n. Tichun, a gen ding uh he lo in a thip chil chel tau hi.

⁹Chuleh, a kiang un, “La thilbawl dan uh hi a pha puai. Namdangte, I mêlmateu ei simmaw lo’na dingin I Pathian uh lau dêk dêk ah I um diu hi zaw lo ding a hem?

¹⁰Zia bep chule hilo in, kei leh ka suapite leh ka nasêmteu hin, sum hileh, bu hileh, ka bat lâksak un. A pung thangaina hi vang haisan chiat tai tiu.

¹¹Tu’ni ma ma hin, a louteu, a grep huanteu, a Oliv huanteu, a Inteu leh sum leh pâi, a bu leh bâl leh uain leh sathau bat zosiau kha pia kit chiat ziang un,” ti’n ka gen a.

¹²Ziaphatchun, amau in, “Amau ah kipat bangma phût umlo in pia kit chiat ing kau. La gen gual ah chun bawl ing kau,” a ti tau a. Tichun, thiampute chu ka koah, a thutiam dungzui ua bawl zui ngâl dingin ka kitiamsak chiat tai.

¹³Ka kawng ah ka puan lom chên chu tham in ka thing a, “Zia thutiamna dungzui ah bawl lo taphot chu, Pathian in a In leh a nei thil zosia zia gual hin thinthâk piak hen la, a hawm ah siam hiu hen,” ka ti tai. Mipi kikhawm zosia chunle, “Amen,” ti chiat in, LALPA chu a pakcha tau ah. Tichun, mipite chunle a thutiam gual chiat un a bawl tau hi.

¹⁴Zia bep chule hilo in, Judai gam ah amau haw awp ding ah ka pan sung kum sawm leh ni, Lengpa Artaxerxes lal kum sawmni’na’ kipat a kum sawmthum leh ni’na tiang in, keima hi’n, ka chanaute hileule, gam awppa chantum him him ka ne puau a.

¹⁵Ka ma-âng ah gam awp ah a la pangsate khan, mipite ah kipat nêk leh dawn, uain a lâkpiak bep uh le hilo in, dangka shekel sawmli a la liausak in, a la sugenthei ma mau a. A suakteu nasan le mipite chung in a la kilalsak ma mau ah; ke’n vang Pathian ka lau ziakin, zia gual chun ka bawl nuam puai.

¹⁶A dik tak in, zia kulbâng tundin kitna ding bep hin ka tha zosia ka la sêng ah, gam him himle ka nei puai; ka suakte le nasêm in a pangkhawm zing uh ahi.

¹⁷Zia bep chule hilo in, I kîm leh kiang ua kipat ei hung ve sek namdangte sim lo in, Judah mite leh vaihawm mite lak ah mi za leh sawmnga an ka nêkpi zing nalai a.

¹⁸Ni khat nêk ding bep inle bawngchal pakhat leh belam doichuam paguk jel leh, kei â ding ah akchale thalup jel ahi’n; zia ban ah chun, ni sawm dan jel leh uain ah luaithe’na a um in; zia gual tuk chu ahi bân in, zia mipite thokna hi a gimum bêk ziakin, gam awpte nêk leh dawn chantum chule ka phût lo mai ahi.

¹⁹Aw ka Pathian, zia mite â ding ah ka thilbawl hi ka phatna dingin hezing in, ti’n ka hun ni hi.