Read Vaiphei NEHEMIAH 6 Bible Online

NEHEMIAH 6 - Vaiphei bible

NEHEMIAH 6

¹Sanballat, Tobiah leh Arab mi Geshem leh ka mêlmateu zosia’n, (a kotkhakte chu siam zo nai lo ma leng unle) kulbângte chu ka siam zo tau hi ti leh, a kâl ah a awnna um talo ah zo ka hitau ti a het phat un;

²Sanballat leh Geshem in, “Hung inla, Ono phâijang ah khua pakhat pen pen ah hin kimu tiam hitiu,” ti’n thu a hun thot un. Himaleh, ka chung ah thil phalo bawl gua a la hizing ngâl un.

³Tichun, palai sawl in a kiang un, “Na thupi tak ka sep lai tak a hiziak in, hung suk thei lo ding ka hi. Bang ding ah la kiang ua ka hung suk kâl in zia na hi a la chawl mai ding a hem?” a vatiu a.

⁴Zia gual ah chun livei hial a hun sawl un, ke’n le ka gen ngai ngai chu gen in ka dawnhu jel a.

⁵Zia gual ma chun, Sanballat in a ngaveina dingin a suak khut ah lekhathot honsa a hun choisak a.

⁶Zia gual hin lekha a hun zik a: “Nang leh Judate hin hel ding la vaisawm ziak ua kulbâng hi bawl la hiu, ti thu namdangte leh Geshem in a gen thang veng vung un; chuleh, a gendan un, nang hi leng ah pan gua hiding la hi a tiu a.

⁷Chuleh, ‘Judai gam ah hin leng a um tai,’ ti ah la chanchin puangjak dingin Jerusalem ah hin jawlneite le la koi tai. Chuleh, tu’hin zia thu chu Lengpa kiang ah a la tut ngei ngei ding a hiu. Ziaziakchun, hung inla, ngaitua khawm him him tiam hitiu,” a hung tiu a.

⁸Ziaphatchun, a kiang in, “La gen gual chu bangma a um puai; la lungthim ah um dungzui ah la phuak kawm mai mai ahi chu,” ti’n ka dawnhu a.

⁹Amau in, “A khutteu in a nasep uh cholsan in, a nau chu zawdâ leu,” a ti ziak ua ei sulau ah ei hi’lungthuai gaw zing ahi zawu a. Himaleh, tu’hin, aw Pathian, ka khutteu hi hi’hat zing in.

¹⁰Ni khat chu, Mehetabel tupa Delaiah chapa Shemaiah In ah chun ka vakhawlai leng ah, ama chu a In ah kipat tual pawt lo ah um a hi’n; ama chun ka kiang in, “Tempul sung ah Pathian In ah chia khawm hi tin, nang hun thalup gua a hiziak un tempul ah kot kikam khum hi ti; tu’jan ma ma hin nang hun that ding ah hung kuan ding a hiu,” ti’n ei gen a.

¹¹Himaleh, “Keima tawh bang hi kua a hem jam ngai ding? Kua a hem, keima gual hi a hinna ding hawl ah tempul bêl ding? Chia talojen ing ka!” ti’n ka dawnhu a.

¹²Pathian in zia gual thu gen ding ah chun ama chu a sawl puai ti ka hechian ma ma ngâl a; Tobiah leh Sanballat in ei that ding ah a goi ziak un, zia gual thu chu a gen a hizaw ngâl a.

¹³Ei sulau ah, thil phalo tak bawl guan ka minsiat ah, ei simmaw theina ding uh hawl ah ama chu a la goi uh ahi him a.

¹⁴Aw ka Pathian, Tobiah leh Sanballat te hin a thilbawl dan zosiau hi hezing inla; chuleh, jawlneinu Noadiah leh jawlnei dangte, ei suklau gua kipei zosia hi hezing in.

¹⁵Tichun, kulbâng chu ni sawmnga leh ni tin ni, Elul tha, ni sawmni leh nga ni chun zaw thian ahi tai.

¹⁶Ka mêlmateu zosia’n zia thu chu a het phat un, ka kîmvêl ua namdangte zosia chu a lau ta ma mau ah; ka Pathian un ei panpi’na jal ah zia chu mualsua ka hiu ti ei het ziak un, a mai uh a mual chiat tai.

¹⁷Zia bep chule hilo in, zia hun lai ah Judai gam ah milian leh lalte chun, Tobiah kiang in lekha tam tak a la thot tau a; Tobiah inle lekha a thotthukte chule a la mu tau a.

¹⁸Ama chu Judai gam ah Arah chapa Shekaniah chanu pawsal a hiziak in, mi tam tak ama lam ah pang dingin a la kitiam tau a; chuleh, a chapa Meshullam chanu chu ji’n a la nei a.

¹⁹Chuleh, ka kiang inle a thilbawl phatte a gen ua, ka thugente chule a kiang a tut jel un. Tichun, Tobiah in ei suklauna ding in lekha ei thot nâk lai ahi.