Read Vaiphei NEHEMIAH 8 Bible Online

NEHEMIAH 8 - Vaiphei bible

NEHEMIAH 8

¹Chun, tha sagi’na a tin phatin, Israel mipi zosia amau khua chiat ah a chên muan zaw phat un, mipite chu Tui Kotpi ah mun thawveng ah chun a kikhawm tau a. Lekhabu zikpa Ezra kiang in, LALPA chun Israelte â ding ah Mosi kiang ah Dan zikna lekhabu chu hun ladok dingin a don tau a.

²A dot dungzui un thiampu Ezra chunle Dan Lekhabu chu mipi kikhawmte, numei leh pawsal zosia, hetna nei zosia’n a het ding un a kiang un a hun chawi a. Zia hun chu a tha sagi’na a ni khat ni ahi.

³Jingkal vaima tak ah kipat sûnkim tiang, Tui Kotpi lam nga’n, numei leh pawsal hiatthiamna nei zosiate hiat thei dingin a hun sim tha ta’n; tichun, mipi zosiate chun zia Dan Lekhabu thute chu lunglut tak in a ngaitha tau a.

⁴Lekhabu zikpa Ezra chu thing ah khang dawsân ah chun a dingdok ah, zia ding mawng ah chu kibawl himle ahi’n; chuleh, a kiang ah chun a changlam ah Mattithiah, Shema, Anaiah, Uriah, Hilkiah leh Maaseiah te hi a ding zing un. A veilam ah chun Pedaiah, Mishael, Malkijah, Hashum, Hash-baddanah, Zekariah leh Meshullam te hi a ding un.

⁵Ezra chun mipi zosia mit mu in lekhabu chu a phêt ah, ama chu mipi zosia sâng ah sang zaw dingdok him ahi’n; lekhabu a hun phêt phat ah chun mipi zosia chule a dingdok chiat tau a.

⁶Ezra in, LALPA Pathian lopi tak chu a chawihoi ah, mipite chunle, “Amen, Amen,” ti ah dawnhu in a khut teu a jak ua. Chuleh, a luchang uh kûn in, a maichang ua lei tual si hial hial in LALPA chu a ho tau a.

⁷Mipite a mun chiat ua a um zing lai un, dan thute chu a hiat thiam theina ding un, Jeshua, Bani, Sherebiah, Jamin, Akkub, Shabbethai, Hodiah, Maaseiah, Kelita, Azariah, Jozabad, Haman, Pelaiah leh Levite chun a la panpiu a.

⁸Tichun, Pathian Dan Lekhabu chu a hilchianna tawh a simdok tau a. Tichun, a kisimdok haw chu hiat thiamsak in, ngaidan kitup tak a nei sak tau hi.

⁹Mipite chun dan thu kisimdokte chu a het phat un, a lung uh a khoi ma ma ziakin a kap jak ziang tau a. Tichun, gam awppa Nehemiah, thiampu leh lekha zikpa Ezra leh mipite hilchian piak ah pang Levite zosia chun, “Tu’ni hi LALPA la Pathian uh â ding ah ni thiangtho ahi; thasiatna leh kâna’n mang kiu in,” ti’n mipite chu a hil tau a.

¹⁰Chuleh, a kiang un, “Chiau inla, an tui pen ne’n, uain thum tak chu dawn unla; bangma neilote â dinginle a chanvo ding uh thot piak un; zia ni hi I LALPAu â ding ah ni thiangtho a hi’ngâl in; lungngaina’n mang kiu in, LALPA kipakna chu la hâtnau ahi ngâl in,” ti’n a gen a.

¹¹Tichun, Levite chun mipite chu a thêmbi tau ah, a kiang un, “Thip un, zia ni hi a thiangtho ngâl ah; lungngaina’n mang kiu in,” a tiu a.

¹²A kiang ua thu kigente chu a hetchian tâk ziak un mipite chu peljak in, ne leh dawn in, midangte le chanvo thot in, kipakna thupi tak a nei tau hi.

¹³A jing ah chun, phung tin ah luchangte chu thiampute leh Levite tawh, lekha zikpa Ezra kiang ah Dan thute chu zil dingin a hung khawm tau a.

¹⁴Chuleh, Dan Lekhabu kipat in, “Tha sagi’na Kût a mat phat ua leh, Israelte chu bawkcha ah a chên diu ahi,” ti Mosi kiang ah LALPA‘n thu a piak a la kizik chu a hun mudok tau a.

¹⁵Chuleh, a kizik dungzui ah chun, “Tâng ah te kuan to unla, Oliv, gamlak Oliv, thingtheimi, tûm thing leh thingbawk pha chite bâk haw paw khawm in bawkcha siam un,” tia a khawpiu zosia leh Jerusalem ah chun tângsam in, la phuanjak diu ahi, ti le a chuang a.

¹⁶Tichun, mipite chu a kuandok ua, ziate chu lakhawm in bawkcha te chu amau â ding chiat in, a In uh tawh kizom a hem, a huang sung chiat uh a hem, Pathian In tualjawl leh Tui Kotpi leh Ephraim Kotpite ah chun a suang chiat tau hi.

¹⁷Tichun, saltâng hung pawt kit zosia chun, bawkcha te chu siam in a chêng tau ah; Nun chapa Jeshua hun ah kipat khan zia gual chu Israel mipite’n a bawl khâk nai lo uh ahi. Tichun, kipakna nasa tak a um tai.

¹⁸A ni masa pen ah kipat a tawp tiang ah, nisi’n in Pathian Dan Lekhabu chu a sim tau a. Kût chu ni sagi sung a bawl un; a ni giat tin ni chun dan dungzui in kikhopna thiangtho a bawl tau hi.